មានមន្ត្រីប៉ូលីសនិងប្រជាពលរដ្ឋមួយចំនួន បាននាំគ្នានិយាយរិះគន់ ជាច្រើនឆ្នាំមកហើយ ទៅលើថ្នាក់ដឹកនាំ នាយកដ្ឋាននគរបាល ប្រឆាំងបទល្មើសសេដ្ឋកិច្ច នៃក្រសួងមហាផ្ទៃ ដែលតែងតែបានចាត់តាំង ប្រគល់អំណាចឲ្យមន្ត្រីៗ ប៉ូលិសសេដ្ឋកិច្ច មួយក្ដាប់តូចរបស់ខ្លួន មានសិទ្ធិទៅគ្រប់គ្រងត្រួតត្រា លើការបង្ក្រាបទប់ស្កាត់ បទល្មើសសេដ្ឋកិច្ច រហូតដល់ទៅពីរ ឬបី ឬបួន ឬប្រាំខេត្ត ផ្ដាច់មុខតែម្នាក់ឯង ដូចជាករណីលោក អ៊ុំ វណ្ណា ជាដើម ប្រៀបដូចជានាយកដ្ឋាន ប៉ូលិសសេដ្ឋកិច្ចនេះ ខ្វះខាតធនធានមនុស្ស ខ្លាំងណាស់អញ្ចឹង…។
ការប្រគល់អំណាចឲ្យលោក អ៊ុំ វណ្ណា ក្ដោបក្ដាប់ការងារផ្ដាច់មុខ បង្ក្រាបបទល្មើសសេដ្ឋកិច្ច ៥ខេត្ត តែម្នាក់ឯងបែបនេះ បាននិងកំពុងធ្វើឲ្យ អ្នកដែលបានដឹងរឿងនោះ នាំគ្នានិយាយរិះគន់យ៉ាងធ្ងន់ៗថា មិនគួរថ្នាក់ដឹកនាំ ក្រសួងមហាផ្ទៃ ដែលមានសម្ដេច ក្រឡាហោម ឧបនាយករដ្ឋមន្ត្រី ស ខេង ជារដ្ឋមន្ត្រី និងឯកឧត្តម នាយឧត្តមសេនីយ៍ នេត សាវឿន ជាអគ្គស្នងការ នគរបាលជាតិ ព្រមទាំងឯកឧត្តម ឧត្តមសេនីយ៍ឯក ចាន់ វ៉ាន់ធឿន ជាប្រធានថ្មី នៃនាយកដ្ឋាន នគរបាលប្រឆាំង បទល្មើសសេដ្ឋកិច្ច ឲ្យតម្លៃខ្លាំងលើលោក អ៊ុំ វណ្ណា តែ ម្នាក់ ហាក់បីដូចជាបំភ្លេចចោល ឬមិនឲ្យតម្លៃចំពោះ មន្ត្រីៗប៉ូលិសសេដ្ឋកិច្ច ជាច្រើននាក់ផ្សេងទៀត ដែលនៅគរជើងលើគ្នា និងមានអ្នកខ្លះ គ្មានការងារអ្វីធ្វើ ឬអង្គុយអានកាសែតនៅកន្លែង រាល់ថ្ងៃ ។
កន្លងមក មានការរិះគន់ថា កាលលោក អ៊ុំ វណ្ណា គ្រប់គ្រង ការងារ ៣-៤ រាជធានី/ខេត្ត តែម្នាក់ឯងនោះ បានធ្វើឲ្យកើតមាន បទល្មើសសេដ្ឋកិច្ច មិនតិចទេនៅខេត្តទាំងនោះ ជាពិសេស បទល្មើសព្រៃឈើតែម្ដង… ព្រោះមានមន្ត្រីៗ ប៉ូលីសសេដ្ឋកិច្ច ក្រោមការដឹកនាំ គ្រប់គ្រងដោយលោក អ៊ុំ វណ្ណា តែងតែបានយក តួនាទីរបស់ខ្លួន ទៅប្រព្រឹត្តអំពើពុករលួយ ជាមួយពួកឈ្មួញ ប្រព្រិត្តបទល្មើស ច្រើនជាងការទៅ បង្ក្រាបទប់ស្កាត់ បទល្មើសសេដ្ឋកិច្ច ។
ទង្វើអសកម្មបែបនេះ ក៍បានធ្វើឲ្យលោក អ៊ុំ វណ្ណា ក្លាយទៅជាអ្នកមាន ទ្រព្យសម្បត្តិស្ដុកស្ដម្ភ ដែលត្រឹមឧកញ៉ាល្មមៗ មិនមានទ្រព្យសម្បត្តិស្មើ ឬប្រហាក់ប្រហែលលោក អ៊ុំ វណ្ណា ដ៍អស្ចារ្យនោះទេ ៕
Recent Comments