ភ្នំពេញ៖ ប្រភពបាននិយាយទៀតថាទីតាំងទីស្នាក់ការធំ របស់កំពង់ផែភ្នំពេញ ត្រូវបានផ្លាស់ប្ដូរ ជាលើកទី៣ហើយ គឺប្ដូរពីខាងកើតវត្តភ្នំ ទៅក្បែរស្ពានជ្រោយចង្វារ និងចុងក្រោយប្ដូរពី ក្បែរស្ពានជ្រោយចង្វារ ទៅដាក់តាំងនៅ ភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល ។ តែមុខតំណែងអគ្គនាយក កំពង់ផែភ្នំពេញនេះ នៅតែមិនទាន់មានការ ផ្លាស់ប្ដូរម្ដងណាសោះ ពោលគឺអស់រយៈពេល ជាច្រើនឆ្នាំកន្លងមក មានតែបុគ្គល ហ៊ឺ បាវី ម្នាក់គត់ជាអ្នកកាន់កាប់ ក្ដោបក្ដាប់ មុខតំណែងខ្លាញ់នេះ តាមរបៀបផ្ដាច់មុខដុះស្លែ ដោយមិនមានមន្ត្រីណា អាចមានវាសនាល្អ កម្ររកបានដូចលោក ហ៊ឺ បាវី នោះទេ ទោះបីគាត់ (ហ៊ឺ បាវី ) ធ្លាប់ត្រូវបានបុគ្គលិក មន្ត្រីរាជការ កម្មករ កម្មការិនីរាប់រយនាក់ នាំគ្នាធ្វើបាតុកម្ម ប្រឆាំងយ៉ាងខ្លាំងក្លា យ៉ាងណាក៍ដោយ ។ ឥឡូវឮដំណឹងថា លោក ហ៊ឺ បាវី បាននិងកំពុងខិតខំ ប្រឹងប្រែងយ៉ាងខ្លាំង ក្នុងការជ្រែទប់មុខតំណែង ដុះស្លែរបស់គាត់នោះឲ្យជាប់ ដើម្បីបាននៅធ្វើជា “ឯកឧត្តម អគ្គនាយកដុះស្លែ កំពង់ផែភ្នំពេញ” នៅអណត្តិទី៥ ឆ្នាំ២០១៣ -២០១៨ ប្រមូលខ្លាញ់ឲ្យបានច្រើន ជាបន្តទៅទៀត ។
កំពង់ផែភ្នំពេញ អាចនឹងមានការ រីកចម្រើនឆាប់រហ័ស ឬអាចនឹងរកចំណូល ចូលថវិកាជាតិ បានច្រើនឡើងជាងមុន រហូតដល់ទ្វេរដង ឬច្រើនជាងនេះ ជាមិនខានឡើយ បើសម្ដេចតេជោ នាយករដ្ឋមន្ត្រី ហ៊ុន សែន ហ៊ានវះកាត់ ធ្វើការផ្លាស់ប្ដូរ ឬដកមុខតំណែងលោក ហ៊ឺ បាវី ពី អគ្គនាយកដុះស្លែ ហើយតែងតាំងមន្ត្រីថ្មី ឲ្យទៅជំនួសម្ដងវិញនោះ ។ តែបើមិនអញ្ចឹងទេ កំពង់ផែភ្នំពេញ នៅតែអាចរកចំណូល ចូលថវិកាជាតិ បានតិចតួចបំផុត ដែលមិនសក្ដិសម នឹងមានឈ្មោះជា កំពង់ផែភ្នំពេញ របស់ជាតិនោះទេ…។
បុគ្គលិកមន្ត្រី រាជការមួយចំនួន នៅកំពង់ផែភ្នំពេញ ដែលសុំមិនឲ្យបញ្ចេញឈ្មោះ ព្រោះខ្លាចគេដក ចេញពីការងារ បាននិយាយប្រាប់ថា បើគ្រាន់តែធ្វើការអភិវឌ្ឈ ទីតាំងថ្មីនៃកំពង់ផែភ្នំពេញ ឲ្យបានល្អប្រសើរ ធំទូលាយជាងមុន ដោយមិនធ្វើការផ្លាស់ប្ដូរ ឬដកមុខតំណែង អគ្គនាយកចាស់ដុះស្លែលោក ហ៊ឺ បាវី ចេញដើម្បីតែងតាំង អគ្គនាយកថ្មី ដែលមានលក្ខណៈសម្បត្តិ ល្អជាងមុនដែរទេ គឺមិនខុសពីការ យកតៃកុងឡាន សេរីចាស់ហួសដឺឡេ ឲ្យទៅបើកឡានថ្មី ទំនើបសេរី២០១៦ នោះឡើយ ។
បុគ្គលិកមន្ត្រីរាជការ បាននិយាយរិះគន់ថា លោក ហ៊ឺ បាវី បាន ក្រាញក្ដោបក្ដាប់ តួនាទីជា អគ្គនាយកដុះស្លែ នៃកំពង់ផែភ្នំពេញ ជាច្រើនឆ្នាំស្ទើរតែក្លាយ ទៅជាកម្មសិទ្ធិ ផ្ដាច់មុខទៅហើយ ធ្វើឲ្យគាត់មានទ្រព្យ សម្បត្តិស្ដុកស្ដម្ភ ដែលឧកញ៉ាល្មមៗ មិនអាចប្រៀបផ្ទឹម ស្មើគាត់បានទេ ។ ពួកគាត់បានបន្តថា កាលកំពង់ភ្នំពេញ មានទីស្នាក់ការធំ ស្ថិតនៅខាងកើតវត្តភ្នំ មានបុគ្គលិក កម្មកររាប់រយនាក់ បាននាំគ្នាធ្វើបាតុកម្ម ប្រឆាំងតវ៉ាជាច្រើនថ្ងៃ ដើម្បីទាមទារឲ្យ ថ្នាក់លើកំពូលៗដកលោក ហ៊ឺ បាវី ចេញពីតួនាទី ដាក់មន្ត្រីថ្មីជំនួសវិញ ដោយចោទប្រកាន់ថា ហ៊ឺ បាវី ដឹកនាំការងារ តាមបែបការិយាធិបតេយ្យ បក្ខពួកនិយម យ៉ាងស៊ីជម្រៅបំផុត និងប្រព្រិត្តអំពើ ពុករលួយ ធ្វើឲ្យបាត់បងចំណូល ថវិកាជាតិយ៉ាងច្រើន ។ ប៉ុន្តែតាំងពីពេលនោះមកលោក ហ៊ឺ បាវី នៅតែត្រូវបានថ្នាក់លើ ជាពិសេស រដ្ឋមន្ត្រី ក្រសួងសាធារណការ និងដឹកជញ្ជូន ជួយកាងធ្វើជាខ្នងបង្អែក ឲ្យគាត់ (ហ៊ឺ បាវី ) បន្តអង្គុយលើកៅអី ជាអគ្គនាយកដុះស្លែ ផ្ដាច់មុខនៅកំពង់ផែភ្នំពេញ ពីមួយអាណត្តិ ទៅមួយអាណត្តិ រហូតមកដល់ពេលនេះ ដោយមិនខ្វល់ពីរឿង បងប្អូនបុគ្គលិក កម្មកររាប់រយនាក់ នៅកំពង់ផែភ្នំពេញ ធ្លាប់ធ្វើបាតុកម្ម ប្រឆាំងនឹង ហ៊ឺ បាវី យ៉ាងខ្លាំងក្លា ដែលជាការបញ្ជាក់ ពីការស្អប់ខ្ពើម ឬមិនពេញចិត្ត ចំពោះការដឹកនាំរបស់ បុគ្គលម្នាក់នេះឡើយ ៕
Recent Comments