ឯកឧត្តម ទេសរដ្ឋមន្ត្រី អ៊ឹម ឈុនលឹម រដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់បានស៊ីញ៉េតែងតាំង យ៉ាងតក់ក្រហល់លឿនដូចខ្យល់ព្យុះឲ្យលោក ប្រាក់ ប៉ូលី ឡើងតំណែងបុណ្យសក្ដិ ពីត្រឹមថ្នាក់ជាប្រធានភូមិបាលក្រុងប៉ោយប៉ែត លោតផ្លោះមកធ្វើជាប្រធានស្ដីទី និងក្លាយជាប្រធានពេញសិទ្ធិ នៅមន្ទីររៀបចំដែនដី នគរូបនីយកម្ម និង សំណង់ខេត្តបន្ទាយមានជ័យ តែក្នុងរយៈពេល ២ថ្ងៃ ជាប់គ្នាប៉ុណ្ណោះ ។
ឯកឧត្តម ទេសរដ្ឋមន្ត្រី អ៊ឹម ឈុនលឹម រដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ បានស៊ីញ៉េតែងតាំងលោក ប្រាក់ ប៉ូលី ជាប្រធានស្ដីទី ដោយរំលងបានតែ១ថ្ងៃគត់… ស្រាប់តែមកដល់ថ្ងៃទី៣១ ខែកក្កដា ឆ្នាំ២០១៥ ទេសរដ្ឋមន្ត្រី អ៊ឹម ឈុនលឹម ដដែលនេះ ក៍បានតែងតាំងលោក ប្រាក់ ប៉ូលី ជាប្រធានពេញសិទ្ធិ នៃមន្ទីររៀបចំដែនដី នគរូបនីយកម្ម និងសំណង់ ខេត្តបន្ទាយមានជ័យដូចជប់ឡើងតែម្ដង ធ្វើឲ្យអនុប្រធានមន្ទីរនោះ ៥នាក់ និងមន្ត្រីៗក្រោមឱវាទ ជាច្រើននាក់ផ្សេងទៀត បានត្រឹមមើល៍មុខគ្នា គ្រវីក្បាលតតាត់ អត់និយាយស្អីចេញ… ។
បើតាមប្រភព ពីវេបសាយមួយ បានសរសេរបង្ហោះផ្សាយ ឲ្យគេដឹងថ្មីៗនេះថា មូលហេតុដែលលោក ប្រាក់ ប៉ូលី បានទទួលការតែងតាំង តំណែងធំតាមបែប មហាលោតផ្លោះ មហាអស្ចារ្យបែបនេះ ព្រោះគាត់ (ប្រាក់ ប៉ូលី) បានត្រៀមលុយចំនួន ៥០ ម៉ឺនដុល្លាអាមេរិក ដើម្បីរត់ការយកតំណែង ប្រធានមន្ទីររៀបចំដែនដី នគរូបនីយកម្ម និងសំណង់ ខេត្តបន្ទាយមានជ័យនោះ… ដែលព័ត៌មាននេះ ត្រូវបានអ្នកលេង ហ្វេសប៊ុកមួយចំនួន ថតចម្លង (Copy) យកមកផ្សាយបន្តតៗគ្នា និងទទួលបានការខមម៉ិន រិះគន់រាប់ពាន់នាក់… [តែទោះយ៉ាងណា គេហទំព័រយើង នៅមិនទាន់អាច យកជាផ្លូវការបាន នូវព័ត៌មាននេះទេ… ដោយសារតែ មិនទាន់អាចទាក់ទង សុំការបំភ្លឺពីលោក ប្រាក់ ប៉ូលី និងឯកឧត្តម ទេសរដ្ឋមន្ត្រី អ៊ឹម ឈុនលឹម បាននៅឡើយ]… ។
ប្រភពព័ត៌មាននោះ បានឲ្យដឹងថា លោក ប្រាក់ ប៉ូលី ប្រធាន ភូមិបាល ក្រុងប៉ោយប៉ែត ដែលប្រជាពលរដ្ឋ នៅតំបន់ជាយដែន កម្ពុជា-ថៃ ក្រុងប៉ោយប៉ែត ហៅថា សេដ្ឋីវ័យក្មេងនោះ បាននិងកំពុងតែ ត្រៀមលុយចំនួន ៥០ម៉ឺនដុល្លារ ដើម្បីរត់ការយកតំណែង ប្រធានមន្ទីរដែនដី នគរូបនីយកម្ម និងសំណង់ ខេត្តបន្ទាយមានជ័យ ដែលគ្រប់គ្រងដោយលោក លី សារី ។ លោក ប្រាក់ ប៉ូលី ក្រោយពីឡើងកាន់តំណែង ជាប្រធានភូមិបាល ក្រុងប៉ោយប៉ែត រយៈពេលប្រមាណមួយអាណត្តិមកនេះ គឺបានយកបងប្រុស បង្កើតម្នាក់ឈ្មោះ ប្រាក់ ប៉ូលីន ជាមន្ត្រីក្រោមឱវាទ ឱ្យដើរប្រមូលរក ផលប្រយោជន៍ ពីប្រជាពលរដ្ឋ ដែលសាងសង់ សំណង់ផ្ទះល្វែង ឬអគារផ្សេងៗ រីកដូចផ្សិតក្នុង ១ល្វែង ប្រមាណចំនួន ៥០០ដុល្លារ រហូតដល់ ១០០០ដុល្លារ… បើពលរដ្ឋណាម្នាក់ គ្មានលុយបង់ឱ្យ តាមការកំណត់ទេនោះ គឺមិនអាចសាងសង់ បានឡើយ ។
ចំពោះប្រជាពលរដ្ឋណាម្នាក់ ចង់ទៅធ្វើប្លង់រឹង ដល់ក្រសួងវិញនោះ គឺលោក ប្រាក់ ប៉ូលី ទារលុយឆៅៗពី ៣,០០០ដុល្លារ រហូតដល់ ៥,០០០ដុល្លារ ទើបអាចធ្វើបាន… Sic តែម្តង ។
ប្រភពបានបញ្ជាក់ប្រាប់ថា សំណង់ខុសច្បាប់ អនាធិបតេយ្យ បានកើតរីកដុះដាល ច្រើនឡើងៗនៅទឹកដី ក្រុងប៉ោយប៉ែត ដោយសារតែលោកប្រធានមន្ទីរ លី សារី បណ្ដោយឲ្យលោក ប្រធានការិយាល័យ ប្រាក់ ប៉ូលី ដឹកនាំធ្វើការងារប្រព្រឹត្ត អំពើពុករលួយតាមអំពើចិត្ត ដោយមិនគិតបំពេញតួនាទី ឲ្យបានល្អប្រសើរ ក្នុងការជួយរៀបចំ សណ្ដាប់ធ្នាប់ សំណង់ផ្សេងៗ ឲ្យបានត្រឹមត្រូវ តាមច្បាប់កំណត់នោះទេ ។ ការប្រព្រិត្តប្រព្រឹត្ត អំពើពុករលួយនេះ បានធ្វើឲ្យឲ្យលោក ប្រាក់ ប៉ូលី ក្លាយទៅជាអ្នកមានលុយកាក់ ទ្រព្យសម្បត្តិយ៉ាងច្រើន ក្នុងរយៈពេល តែមួយពព្រិចភ្នែក… ។
ឯកឧត្តម ទេសរដ្ឋមន្ត្រី អ៊ឹម ឈុនលឹម រដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ ដ៍ឧត្តុង្គឧត្តម ស៊ីញ៉េតែងតាំង យ៉ាងតក់ក្រហល់ លឿនដូចខ្យល់ព្យុះឲ្យឡើងតំណែង បុណ្យសក្ដិ ពីត្រឹមថ្នាក់ ជាប្រធានភូមិបាល ក្រុងប៉ោយប៉ែត លោតផ្លោះមកធ្វើជា ប្រធានស្ដីទី និងក្លាយជា ប្រធានពេញសិទ្ធិ នៅមន្ទីររៀបចំដែនដី នគរូបនីយកម្ម និងសំណង់ ខេត្តបន្ទាយមានជ័យ តែក្នុងរយៈពេល ២ថ្ងៃ ជាប់គ្នាប៉ុណ្ណោះ… ចំណែកឯលោក លី សារី ក៍ត្រូវបានតែងតាំងឲ្យឡើង បុណ្យសក្ដិ ធំជាងមុនជា អភិបាលរង ខេត្តបន្ទាយមានជ័យ ផងដែរ បន្ទាប់ពីគាត់ (លី សារី ) ធ្លាប់ត្រូវបាន អង្គភាពប្រឆាំងអំពើពុករលួយ កោះហៅទៅសាកសួរ ពាក់ព័ន្ធនឹងការប្រព្រិត្ត អំពើពុលរលួយ ៕
Recent Comments