កាលពីព្រឹកថ្ងៃទី១៨ ខែកុម្ភៈ ឆ្នាំ២០១៦នៅសាលប្រជុំទូរគមនាគមន៍បានប្រារព្ធពិធីប្រកាសតែងតាំងនិង ប្រគល់ភារកិច្ចជូនប្រធានក្រុមប្រឹក្សាភិបាលថ្មី និងអគ្គនាយកស្តីទីនៃទូរគមនាគមន៍កម្ពុជា ក្រោមវត្តមានរបស់លោកប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ព្រមទាំងមានការអញ្ជើញ ចូលរួមពីសំណាក់ថ្នាក់ដឹកនាំក្រសួងប្រៃសណីយ៍និងទូរគមនាគមន៍ ថ្នាក់ដឹកនាំទូរគមនាគមន៍និងតំណាង នៃបណ្តាលក្រសួងស្ថាប័នពាក់ព័ន្ធ។នេះបើយោងតាមសេចក្តីប្រកាសព័ត៌មាន របស់ក្រសួងប្រៃសណីយ៍និងទូរគមនាគមន៍។
នៅក្នុងសេចក្តីប្រកាសព័ត៌មានឲ្យដឹងថា ការផ្លាស់ប្តូរកែសំរួលរចនាសម្ព័ន្ធដឹកនាំនៃទូរគមនាគមន៍កម្ពុជា ត្រូវបានធ្វើឡើងបន្ទាប់ពីលទ្ធផលនៃអធិការកិច្ចរួមមួយ រវាងអគ្គាធិការដ្ឋាននៃក្រសួងប្រៃសណីយ៍ និងទូរគមនាគមន៍និងក្រុមការងារនៃអង្គភាពប្រឆាំងអំពើពុករលួយបាន រកឃើញថា មានការខ្វះខាតធ្ងន់ធ្ងរ លើការងារគ្រប់គ្រងនិងការដឹកនាំរបស់ថ្នាក់ដឹកនាំទូរគមនាគមន៍កម្ពុជា ដែលនាំឲ្យមានបញ្ហាមួយចំនួនដូចជា៖
-មានការកិបកេងលួចបន្លំយកប្រាក់ចំណូលរបស់អង្គភាពចំនួន២៣ម៉ឺនដុល្លារអាមេរិកប្រាកដមែន
-ការគ្រប់គ្រងចំណូល ចំណាយមិនច្បាស់លាស់ គ្មានប្រសិទ្ធិភាពតម្លាភាពនិងគណនេយ្យភាពធ្វើឲ្យចំណូលធ្លាក់ចុះ បំណុលកើនឡើងជាលំដាប់ និងមានចន្លោះប្រហោងជាច្រើនដែលឈានទៅដល់ការកិបកេងនិងការលុបបំណុល
-មិនបានយកចិត្តទុកដាក់ត្រួតពិនិត្យការគ្រប់គ្រងបញ្ជីគណនេយ្យនិង ឯកសារពាក់ព័ន្ធដែលឈានទៅដល់ការបាត់បង់ដ៏មានសារៈសំខាន់ទាំងនេះដោយ ចេតនា។
ការផ្លាស់ប្តូរថ្នាក់ដឹកនាំសហគ្រាសសាធារណៈមានដូចជា៖
-លោក ខូវ មករា អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ ត្រូវបានតែងតាំងជាប្រធានក្រុមប្រឹក្សាភិបាលទូរគមនាគមន៍កម្ពុជាជំនួស លោក មាស ប៉ូ ដែលត្រូវបានបញ្ចប់មុខតំណែងជាប្រធានក្រុមប្រឹក្សាភិបាល
-លោក សន វី អគ្គនាយកនៃទូរគមនាគមន៍កម្ពុជា ត្រូវបានប្រគល់ភារកិច្ចជាអគ្គនាយកស្តីទីនៃទូរគមនាគមន៍កម្ពុជា ជំនួសលោក ឡាយ ម៉ារីវ៉ូ ដែលត្រូវបាន បញ្ចប់មុខតំណែងពីប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ទូរគមនាគមន៍កម្ពុជា។
ចំពោះដំណើរការនៃការកែសំរួលរចនាសម្ព័ន្ធដឹកនាំរបស់អង្គភាពនេះ សមាសភាពក្រុមប្រឹក្សាត្រូវបានកាត់បន្ថយមកត្រឹម៥រូបគឺ៖
-តំណាងក្រសួងប្រៃសណីយ៍និងទូរគមនាគមន៍ មួយរូប ជាប្រធាន
-តំណាងទីស្តីការគណៈរដ្ឋមន្ត្រី មួយរូបជាសមាជិក
-តំណាងក្រសួងសេដ្ឋកិច្ចនិងហិរញ្ញវត្ថុ មួយរូប ជាសមាជិក
-អគ្គនាយកទូរគមនាគន៍កម្ពុជា មួយរូប ជាសមាជិក
-តំណាងនិយោជិតរបស់ទូរគមនាគមន៍កម្ពុជា មួយរូប ជាសមាជិក។
បើតាមសេចក្តីប្រកាសព័ត៌មានដដែលឲ្យដឹងថា អគ្គនាយករងមួយរូបត្រូវបានជ្រើសរើសយកមកពីវិស័យឯកជន ដើម្បីជួយស្តារនិងពង្រឹងបន្ថែមស្ថានភាពអាជីវកម្មនិងបង្កើនចំណូល អង្គភាពនេះទៅថៃ្ងមុខ៕
Recent Comments