តាមការថ្លែងដោះសាររបស់ លោក សុ ផល មន្ត្រីកាំកុងត្រូល ច្រកទ្វារព្រំដែនភ្នំដី ស្រុកសំពៅលូន ខេត្តបាត់ដំបងបានថ្លែង ប្រាប់អ្នកសារព័ត៌មានថា គ្មានការនាំចូលទំនិញគេចពន្ធ និងទំនិញគ្មានគុណភាពតាមច្រកទ្វារព្រំដែនភ្នំដីដូចការចោទប្រកាន់ រប ស់ប្រជាពលរដ្ឋនោះទេ។
ពាក់ព័ន្ធទៅនឹងការចោទប្រកាន់របស់ប្រជាពលរដ្ឋលោក សុ ផល បានពន្យល់ថា លោកនិងមន្ត្រីក្រោមឱវាទបានធ្វើការ ត្រួតពិនិត្យតាមជំនាញ ជារៀងរាល់ថ្ងៃ សំដៅទប់ស្កាត់មិនឱ្យទំនិញខូចគុណភាព និងទំនិញគេចពន្ធនាំចូលប្រទេសកម្ពុជា។ តែការលើកឡើងរបស់លោក សុ ផល ត្រូវបានប្រជាពលរដ្ឋបដិសេធឱ្យរួចតែពីមាត់ប៉ុណ្ណោះ ព្រោះតែគេឃើញសកម្មភាពបទ ល្មើសទំនិញខូចគុណភាពនាំចូលតាមច្រកនោះដដែល ។
ប្រជាពលរដ្ឋស្រុកសំពៅលូន ខេត្តបាត់ដំបង បានរាយការណ៍មកថា ជារៀងរាល់ថ្ងៃគេតែងតែឃើញក្រុមឈ្មួញបានដឹកទំនិញ និងចំណី ត្រី សាច់ជាច្រើនប្រភេទដែលខូចគុណភាពឆ្លងកាត់តាមច្រកតំបន់ភ្នំដី ក្នុងស្រុកសំពៅលូន យកទៅចែកចាយក្នុងភូមិសាស្ត្រខេត្តបាត់ដំបង។
ប្រភពដដែលបានរៀបរាប់ថា គេមិនដែលឃើញមានមន្ត្រីពាក់ព័ន្ធណាចេញមកធ្វើការត្រួតពិនិត្យឡើយ ហើយទំនិញទាំង នោះមានដូចជា ទឹកក្រូច ទឹកផ្លែឈើផ្សេងៗ ពិសេសគឺសាច់ជ្រូក ត្រី និងមាន់ត្រូវមីន ស្លាប ជង្គង់មាន់នោះតែម្តង ដែលត្រូវ បានឈ្មួញនាំចូលទាំងយប់ទាំងថ្ងៃហើយភាគច្រើនមិនបានបង់ពន្ធឱ្យ បានត្រឹមត្រូវនោះទេ។
ផ្ទុយទៅវិញ បើទោះជាមន្ត្រីជំនាញនៅច្រកទ្វារព្រំដែនភ្នំដីបានព្យាយាមថ្លែង ការពារខ្លួនយ៉ាងណាក៏ដោយ ក៏ប្រជាពលរដ្ឋស្រុកសំពៅលូន បានបញ្ជាក់ថា ឈ្មួញធំៗមន្ត្រីជំនាញមិនទាំងហ៊ានទៅក្បែរ ឬរុះរើទំនិញគេឡើយ គឺមានតែសម្រួលឱ្យឈ្មួញនាំចូលទំនិញដោយរលូន ដើម្បីយកគាប់យកគួរ និងគ្រាន់បានទទួលជាប្រចាំខែនោះ ។
ដោយឡែក ឯឈ្មួញតូចតាចវិញត្រូវក្រុមមន្ត្រីជំនាញបង្កការរាំងស្ទះតាមគ្រប់ រូបភាពដើម្បីជម្រិតទារលុយ ។ ចំពោះ បញ្ហាខាងលើនេះ ត្រូវបានគេសង្ស័យថា កាំកុងត្រូល និងសមត្ថកិច្ចពាក់ព័ន្ធនៅច្រកភ្នំដីអាចទទួលបានលាភសក្ការៈពីឈ្មួញ យ៉ាងត្រូវប៉ាន់បំផុតប្រចាំខែ ។
ជាងនេះទៅទៀត ប្រជាពលរដ្ឋស្រុកសំពៅលូន ខេត្តបាត់ដំបង បានលើកឡើងថាមន្ត្រីនៅអគ្គនាយកដ្ឋានកាំកុងត្រូល និងនៅក្រសួងពាណិជ្ជកម្មគប្បីចាត់មន្ត្រីជំនាញឱ្យចុះមកស៊ើបអង្កេត ករណីខាងលើឱ្យបានឆាប់ និងមានប្រសិទ្ធភាព ព្រោះបើនៅតែបណ្តែតបណ្តោយឱ្យធ្វើដូចសព្វថ្ងៃនេះទៀត ថវិកាជាតិក៏បាត់បង់ ប្រជាពលរដ្ឋក៏រងគ្រោះដោយការប្រើ ប្រាស់ផលិតផលគ្មានគុណភាព ឱ្យចូលយ៉ាងទំនើងដោយគ្មានការទប់ស្កាត់នោះ ៕
Recent Comments