លោក សៀន ស៊ីវន មេបញ្ជាការវរសេនាតូច ៣០៣ ប្រចាំច្រកដាក់ចូរ រងការចោទថាបានឃុបឃិតជាមួយឈ្មួញធំៗជនជាតិយួនក្នុងការអនុញ្ញាតឲ្យ មានការដឹកជញ្ជូនឈើឆ្លងដែន ហើយដែលឈើទាំងនេះត្រូវបានគេកាប់ចេញពីតំបន់ព្រៃការពារភ្នំណាំលៀ នេះបើយោងតាមការអះអាងរបស់ប្រជាពលរដ្ឋស្រុកពេជ្រាដា និងសកម្មជនព្រៃឈើនៅខេត្តមណ្ឌលគិរី។ ប្រភពដដែលបានបញ្ជាក់ថា ក្រុមឈ្មួញឈើធំៗដែលលាក់ទុកឈើត្រៀមដឹកឆ្លងដែនទៅលក់បន្តនៅក្នុង ប្រទេសយួនតាមច្រកដាក់ចូរ ហៅប៉ុស្តិ៍ ៦ ដែលស្ថិតក្រោមការគ្រប់គ្រងរបស់មេបញ្ជាការវរសេនាតូច៣០៣ លោក សៀន ស៊ីវន បានទទួលស្គាល់ថាពួកគេពិតជាមានការត្រូវរ៉ូវជាមួយសមត្ថកិច្ចជំនាញ នៅតាមព្រំដែនពិតមែន ទើបអាចដឹកឈើឆ្លងដែនបានយ៉ាងរលូន។
សកម្មជនព្រៃឈើនៅខេត្តមណ្ឌលគិរី បានឲ្យដឹងនៅចុងសប្តាហ៍នេះថា ឈើប្រណីតចំនួន១០០ដុំ បានត្រូវគេប្រទះឃើញនៅក្នុងអូរមួយកន្លែង ស្ថិតក្នុងឃុំប៊ូស្រា ស្រុកពេជ្រាដា ខេត្តមណ្ឌលគិរី។ ប្រភពដដែលបានបញ្ជាក់ថាឈើដែលត្រូវរកឃើញខាងលើនេះមិនមែនជាលើកទីមួយ នោះទេ ព្រោះកន្លងមកគេក៏ធ្លាប់ប្រទះឃើញសកម្មភាពដឹកជញ្ជូនឈើនៅក្នុង ភូមិសាស្ត្រស្រុកពេជ្រាដាផងដែរ ហើយគេសង្ស័យថាមានជាប់ពាក់ព័ន្ធជាមួយកងកម្លាំងប្រដាប់អាវុធ។
ប្រជាពលរដ្ឋស្រុកពេជ្រាដា ខេត្តមណ្ឌលគិរី បានលើកឡើងថា បទល្មើសព្រៃឈើនៅក្នុងខេត្តមណ្ឌលគិរី ភាគច្រើនជាប់ពាក់ព័ន្ធជាមួយសមត្ថកិច្ចជំនាញដែលបញ្ហាទាំងនេះ គឺបណ្តាលមកពីយន្តការនៃការអនុវត្តច្បាប់របស់ប្រទេសកម្ពុជាគ្មាន ប្រសិទ្ធភាព ខណៈមន្ត្រីជំនាញមានកម្រិតប្រាក់ខែទាបនៅឡើយ។ ប្រភពដដែលបានបញ្ជាក់ថា បណ្តាខេត្តរបស់ប្រទេសយួនពុំមានករណីសមត្ថកិច្ចជំនាញឃុបឃិត ប្រព្រឹត្តបទល្មើសផ្សេងៗ ពិសេសបទល្មើសព្រៃឈើដូចនៅក្នុងប្រទេសកម្ពុជានោះទេ ហើយបើមានមន្ត្រីខិលខូចនឹងប្រឈមចំពោះមុខច្បាប់ ៕
Recent Comments