ព្រឹត្តិការណ៍ថ្មីៗមានសេចក្តីរាយការណ៍ថា រថយន្តស៊េរីទំនើបៗ បង់ពន្ធតិចតួចបាននិងកំពុងនាំចូលជាចំហរពីប្រទេសថៃតាម ច្រកព្រំដែន នៅក្នុងខេត្តបន្ទាយមានជ័យ តាមរយៈមេឈ្មួញដ៏ល្បីម្នាក់ឈ្មោះ តាម៉ាន់ ។
មន្ត្រីគយកំពុងផ្អែមមាត់ជាមួយបទល្មើសនៃការនាំរថយន្តទំនើបចូល ដោយ បន្លំជាមួយនឹងការមិនបង់ពន្ធ ។ ហើយបានធ្វើ ឱ្យកើតមានជនរងគ្រោះនៅក្នុងទង្វើឃុបឃិតគ្នានេះ គឺកើតចេញពីការទិញរថយន្តមិនបង់ពន្ធយកទៅប្រើនោះឯង ។
តាមប្រភពដដែលបានរាយការណ៍ថា រថយន្តដែលនាំចូលច្រើនជាងគេ គឺប្រភេទរថយន្តតូយ៉ូតា ដែលក្នុងមួយថ្ងៃៗមានរថយន្តរាប់រយគ្រឿងត្រូវបាននាំពីប្រទេសថៃ យកមកស្តុកនៅឃ្លាំងក្នុងតំបន់ប៉ោយប៉ែត រួចទើបបើកទៅរាជធានីភ្នំពេញ ។ គេរាយការណ៍ថា តាម៉ាន់ គឺជាអ្នកនាំរថយន្តចូលផ្តាច់មុខ ដោយបង់ពន្ធតិចតួច ពីព្រោះគាត់មានទំនាក់ទំនងស្អិតល្មូតជាមួយមន្ត្រីគ្រប់ស្ថាប័ននៅ ព្រំដែន ។ ប្រភពបានបន្ថែមថា ក្នុងចំណោមរថយន្ត១០០គ្រឿង មានបង់ពន្ធប្រហែល៧០គ្រឿងប៉ុណ្ណោះ ។ ៧០គ្រឿងនេះក៏បង់ពន្ធមិនគ្រប់ភាគរយដែរ ។
មិនតែប៉ុណ្ណោះករណីខាងលើនេះ បានកើតឡើងយ៉ាងគំហុកក្នុងរយៈពេលចុងក្រោយ ដោយសារតែតម្រូវការរថយន្ត នៅក្នុងផ្ទៃប្រទេសកើនឡើង ។ ការធូរលុងរបស់សមត្ថកិច្ចគយ លាយឡំដោយអំពើពុករលួយ ត្រូវគេអះអាងថា ជាមូលហេតុ ដែលបណ្តាលឱ្យតាម៉ាន់អាចគ្រប់គ្រងស្ថានការណ៍ក្នុងការនាំរថយន្ត ដោយមិនបាច់បង់ពន្ធចូលក្នុងផ្ទៃប្រទេសបានដោយងាយស្រួល ។
មានមន្ត្រីលើកឡើងថា តាម៉ាន់ មិនត្រឹមតែល្បីនៅតំបន់ព្រំដែនភាគខាងលិចនៃព្រះរាជាណាចក្រកម្ពុជា ប៉ុណ្ណោះទេ នៅឯកណ្តាលបេះដូងរាជធានីភ្នំពេញ ក៏ត្រូវអ្នករកស៊ីទិញ លក់រថយន្តស្គាល់ថា ជាជើងខ្លាំងនាំរថយន្តគេចមិនបង់ពន្ធចូល ទៅស្តុក លក់នៅឃ្លាំងមួយចំណួនដែលលេខក្រោយយើងនឹងចុះផ្សាយជាបន្ត ៕
ដោយ ៖ មហារសើប
Recent Comments