ខេត្តរតនៈគីរី ៖ តាមមន្ត្រីរាជការនៅក្នុងមន្ទីរវប្បធម៌និងវិចិត្រសិល្បៈ ខេត្តរតនគិរី ជាច្រើននាក់បានឱ្យដឹងថាថ្មីៗនេះលោក ឆាយ សាវុធ បានក្លែងឯកសារក្នុងការប្តូរប្រវត្តិរូបអតីតមន្ត្រីជាប់កិច្ចសន្យា ម្នាក់ឈ្មោះ ថុល យុពង្ស ដែលមានអាយុ៥០ឆ្នាំគឺថ្ងៃខែឆ្នាំកំណើត ០១ មករា ១៩៦៥ ឱ្យមកនៅត្រឹមអាយុ២៧ឆ្នាំ ដោយប្តូរថ្ងៃខែឆ្នាំកំណើតមកនៅ ថ្ងៃទី០១ ខែវិច្ឆិកា ឆ្នាំ១៩៨៧។
បើតាមប្រភពបានឱ្យដឹងថា ឈ្មោះ ថុល យុពង្ស បម្រើការងារជាមន្ត្រីជាប់កិច្ចសន្យារបស់មន្ទីរវប្បធម៌និង វិចិត្រសិល្បៈខេត្តរតនគិរី១០ឆ្នាំហើយ តាំងពីគាត់អាយុជាង៤០ឆ្នាំម្ល៉េះ។ ហើយបញ្ហានេះ មន្ត្រីរាជការនៃមន្ទីរវប្បធម៌ និងវិចិត្រសិល្បៈក៏បានរិះគន់ថា លោក ឆាយ សាវុធ កំពុងធ្វើអ្វីៗដើម្បីប្រយោជន៍ផ្ទាល់ខ្លួន។
បញ្ហានេះដែរ មន្ត្រីរាជការក្នុងមន្ទីរវប្បធម៌និងវិចិត្រសិល្បៈខេត្តរតនគិរី ក៏បានអំពាវនាវឱ្យលោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈត្រូវតែចាត់វិធានការលើលោក ឆាយ សាវុធ តាមច្បាប់ជាបន្ទាន់។
ប្រភពបានឱ្យដឹងថា លោក ឆាយ សាវុធ ប្រធានមន្ទីរវប្បធម៌និងវិចិត្រសិល្បៈខេត្តរតនគិរី បានប្រព្រឹត្តអំពើពុករលួយ ដឹកនាំគ្រប់គ្រងការងារតាមរបៀបផ្តាច់ការនិងបន្លំឯកសារសាធារណៈផង ដែរ ។ ដោយសារបញ្ហាដូច្នេះហើយ គឺលោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈគួរតែមានវិធានការ និងដាក់ការស៊ើបអង្កេតជាបន្ទាន់ មិនត្រូវបណ្តោយឱ្យលោក ឆាយ សាវុធ ព្រមទាំងបក្ខពួកមួយក្តាប់តូចធ្វើអ្វីៗតាមតែអំពើចិត្តនោះទេ ។
ជាងនេះទៅទៀតតាមប្រភពពីមន្ត្រីរាជការមន្ទីរវប្បធម៌និង វិចិត្រសិល្បៈ ភាគច្រើនបានឱ្យដឹងថា លោក ឆាយ សាវុធ បាន ឃុបឃិតចាយវាយថវិការបស់មន្ទីរចាយខុសខ្ទង់ ដោយគ្មានតម្លាភាពទាល់តែសោះ ហើយនិងឃុបឃិតបក្ខពួកនិយម តែងតាំងមន្ត្រីជាបក្ខពួករបស់ខ្លួនឱ្យកាន់កន្លែងខ្លាញ់ និងដកមន្ត្រីជំនាញឱ្យអង្គុយអានកាសែត ។
មិនតែប៉ុណ្ណោះក្នុងនាមជាប្រធានមន្ទីរវប្បធម៌និងវិចិត្រសិល្បៈ ខេត្តរតនគិរី លោក ឆាយ សាវុធ បានធ្វើការតែងតាំង ក្មួយស្រីម្នាក់ឱ្យមកកាន់ការងារគណនេយ្យក្នុង មន្ទីរយ៉ាងក្រអឺតក្រទមទៀតផង នេះមិនទាន់គិតដល់អំពើពុករលួយ ជាច្រើនរូបភាពដែលនឹងត្រូវលាតត្រដាងជា បន្តបន្ទាប់នៅពេលក្រោយនោះទេ។
ផ្ទុយទៅវិញ បញ្ហានេះ គួរតែលោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ គួរពិនិត្យមើលភាព អសកម្មនិងអំពើពុករលួយរបស់លោក ឆាយ សាវុធ ជាបន្ទាន់ផង ជាពិសេសដែលគួរតែ អង្គភាពប្រឆាំងអំពើពុករលួយ ដែល មានលោកទេសរដ្ឋមន្ត្រី ឱម យ៉ិនទៀង ជាប្រធាន គួរតែបើកការស៊ើបអង្កេតជុំវិញ រឿងអាស្រូវពុករលួយរបស់លោក ឆាយ សាវុធ ប្រធានមន្ទីរវប្បធម៌និងវិចិត្រសិល្បៈខេត្តរតនគិរី ជាបន្ទាន់ផង៕
ដោយ ៖ រតនៈ
Recent Comments