ភាពពុំប្រក្រតីលើគម្រោងសាងសង់ទំនប់ទាំង ៨ទីតាំង ដែលជាជំនួយរបស់ធនាគារអភិវឌ្ឍន៍អាស៊ី ADB ដែលសម្រេចដាក់ ឱ្យដេញថ្លៃ កាលពីនៅថ្ងៃទី ១៥ ខែមីនា ឆ្នាំ២០១៥ នៅក្រសួងធនធានទឹកកន្លងមក ហាក់បង្ហាញសញ្ញាអវិជ្ជមាន តាមរយៈនៃការបិទបាំងអំពើពុករលួយ ពីមន្ត្រីប្រធានគម្រោងនៃក្រសួងធនធានទឹក ដែលជាហេតុធ្វើឱ្យមានការរិះគន់យ៉ាង ចំៗថា ជាករណីដេញថ្លៃចងមុងដើម្បីកើបយកផលប្រយោជន៍ចែកគ្នា ។
ការបញ្ជាក់នោះ បើផ្អែកលើ គោលការណ៍ម្ចាស់គម្រោង ADB គឺតម្រូវឱ្យមានការផ្សព្វផ្សាយផ្តល់ដំណឹងឱ្យក្រុមហ៊ុនដែល បំណងចូលមកដេញថ្លៃយ៉ាងតិច ក៏រយៈពេលមួយខែជាមុនដោយតម្រូវឱ្យក្រុមហ៊ុនមានបទពិសោធន៍រយៈពេល ៥ឆ្នាំឡើង ទៅ ក្នុងការសាងសង់ទំនប់សំណងធារាសាស្ត្រ ហើយតម្រូវឱ្យមក ទិញពាក្យ Bida ដេញថ្លៃ ៥៥ដុល្លារ នោះ ។
ទោះបីជាមានការផ្សព្វផ្សាយស្តីពីការដេញថ្លៃនៅក្នុងកាសែត ក្នុងស្រុកមួយតាមការកំណត់ក្តី ប៉ុន្តែធាតុពិត គឺគ្រាន់តែប្រើបច្ចេកវិជ្ជាមកក្លែងបន្លំភ្នែកសាធារណៈធ្វើជា ភស្តុតាងឱ្យម្ចាស់ជំនួយគេអស់ចិត្តថា ពិតជាគោរពលក្ខណប៉ុណ្ណោះ តែធាតុពិតកាសែតដែលចេញផ្សាយនៅថ្ងៃនោះ គឺមិនមានចុះផ្សាយពីគម្រោងដាក់ឱ្យដេញថ្លៃនោះឡើយ គឺគ្រាន់តែសរសេរ (INVITATION FOR BIDS)គឺមិនលំអិតនោះទេ ព្រោះគេចងមុងទុកហើយ ។
ដោយមើលឃើញពីចេតនាបិទបាំងរបស់មន្ត្រីប្រធានគម្រោងក្នុងក្រសួង ធនធានទឹកប្រើអាវិធីដេញថ្លៃចងមុងដើម្បី ស្វែងរកលាភសក្ការៈជាទម្លាប់ពុករលួយដុះស្លែនេះហើយ ទើបរយៈកាលកន្លងមកមានទំនប់មួយចំនួនរងការបាក់ធ្លាយ ដោយសារករណីកឹបកេងលុយកេងបច្ចេកទេសដូចករណីទំនប់អាងកំពីងពួយ នៅខេត្តបាត់ដំបង ជាភស្តុតាងស្រាប់ ដែល សាងសង់ហើយពុំទាន់បានកន្លះឆ្នាំផង់ បែរជាត្រូវប្រេះដាច់ខូចអស់ដោយសារខ្វះគុណភាពពីសំណង់ ។
តាមក្រុមហ៊ុនលើកឡើងថា បើផ្អែកលើការកំណត់តាមការដេញថ្លៃ ពិតណាស់ថា ក្រុមហ៊ុនសាងសង់ពិតជាមានលទ្ធភាពធានា លើគុណភាពទំនប់សំណង់ប្រកបដោយការទទួលខុសត្រូវបាន ។ ប៉ុន្តែបើការដេញថ្លៃត្រូវយកទៅបែងចែកតាមការបិទបាំង ពុករលួយទៅឱ្យជំនាញ និងថ្នាក់លើចែកគ្នាស៊ីតាមដានថ្នាក់ក្រុមឱ្យអ្នកធ្វើផ្លាស់ ត្រូវតែកឹបកេងគ្រឿងសំណង់បច្ចេកទេស ដើម្បីចំណាញខ្លះៗដូច្នេះហើយជាហេតុសំអាងគ្មានគុណភាព ។
ផ្ទុយទៅវិញករណីដែលមន្ត្រីប្រធានគម្រោងក្រសួងធនធានទឹកកំពុង អនុវត្តតាមរបៀបបិទបាំងព័ត៌មាននាពេលនេះ គឺពិតជា មិនអាចធានាបានលើគុណភាពសំណង់នោះឡើយ ។ ម្យ៉ាងវិញទៀត ម្ចាស់គម្រោងដែលផ្តល់ដោយធនាគារអភិវឌ្ឍន៍អាស៊ី ADB គឺពិតជាមានការខកចិត្ត ដែលតម្រូវឱ្យមានការស៊ើបអង្កេតយ៉ាងដិតដល់បំផុតពីស្ថាប័នអង្គភាព ប្រឆាំងអំពើពុករលួយ និងក្រុមប្រទេសផ្តល់ជំនួយផងនោះ គួរណាស់ដាក់ការស៊ើបអង្កេតជាបន្ទាន់ ។
ព័ត៌មានផ្អែកតាមប្រភពដែលគួរឱ្យជឿទុកចិត្តបាន លើភាពមិនប្រក្រតីចំពោះករណីដេញថ្លៃរបស់មន្ត្រីប្រធានគម្រោងនៃ ក្រសួងធនធានទឹក គឺពិតជាមិនពីបាកស្វែងរកការពិតមកបញ្ជាក់នោះឡើយ ។ ព្រោះមានចំណុចជាច្រើន ដែលអាចលើក យកមកធ្វើការផ្ទៀងផ្ទាត់ជាមួយឯកសារក្រុមហ៊ុន និង Bida និងអំពើពុករលួយចងមុងទុកដដែលរបស់មន្ត្រីគម្រោង ហ៊ាន ធានាថា ការប្រើព័ត៌មានក្លែងបន្លំដើម្បីបិទបាំងការពិតនឹងត្រូវលាតត្រដាងជា បន្តបន្ទាប់ហើយដែលបិទបាំងនៃអំពើពុករលួយ របស់ក្រសួងធនធានទឹកនោះ មិនមែនទើបតែបែកធ្លាយឯណា គឺកើតឡើងជាបន្តបន្ទាប់សម្រាប់ក្រសួងនេះ ។
មិនតែប៉ុណ្ណោះក៏មានមន្ត្រីស្អប់ខ្ពើម និងក្រុមហ៊ុនទម្លាយជាបន្តបន្ទាប់ទៀតថា គឺមេគម្រោងក្រសួងនេះ គឺអង្គុយចាំតែបំប៉ោង ចាយលុយគម្រោងតាមតែអំពើចិត្ត មិនគួរបើរដ្ឋាភិបាល និងអង្គភាពប្រឆាំងអំពើពុករលួយក្រោមការដឹកនាំរបស់លោកទេស រដ្ឋមន្ត្រី ឱម យ៉ិនទៀង ភ្លេចពីមនសិការជាតិ ទៅធ្វើការ lobby បុគ្គលពុករលួយ ហើយបណ្តោយឱ្យក្រុមមន្ត្រីកាន់គម្រោង និងបក្ខពួកក្នុងក្រសួងធនធានទឹកប្រព្រឹត្តអំពើពុករលួយយ៉ាងពេញបន្ទុក លើឈាមជ័ររបស់ប្រជាពលរដ្ឋខ្មែរ និងរដ្ឋាភិបាល ហ៊ុន សែន ជាបន្តនោះទេ ។
ជាក់ស្តែងករណីអសមត្ថភាពរបស់មេដឹកនាំរបស់ក្រសួងនេះ គ្រាន់តែចុះសិក្សា និងវាយតម្លៃសំណង់ជារួមលើទីតាំងស្ទឹងជីនិត ខេត្តកំពង់ធំ ឆ្នាំ២០០៤-២០០៥ ទ្រួសៗប៉ុណ្ណោះ គឺបានចំណាយថវិកាអស់ជាង ៧លានដុល្លារ ក្រោយមកដើម្បីចុះពិនិត្យបន្ត ក៏បានស្នើសុំដកលុយទៅក្រសួងអភិវឌ្ឍន៍ជនបទមកចាយវាយបន្ថែម អស់ជាងច្រើនលានដុល្លារទៀត ប៉ុន្តែមកទល់ពេលនេះ ត្រូវបានគេអះអាងថា គឺគម្រោងនោះគឺនៅមេមាយពុំស្រេចបាច់នៅឡើយទេ ! ហើយដោយសារការចំណាយលុយដ៏ច្រើន សន្ធឹកសន្ធាប់យ៉ាងគ្មានតម្លាភាពនេះក៏បានបែកធ្លាយ ឮទៅដល់ត្រចៀកនាយករដ្ឋមន្ត្រី ហ៊ុន សែន ម្តងជាពីរដងមកហើយ និង ADB ក៏ឆាប់ប្រតិកម្មផងដែរ ។ ហើយក៏ដូចជា បញ្ជាឱ្យមានការស៊ើបអង្កេតរឿងនេះជាទ្រង់ទ្រាយធំផងនោះ បើតាមការ អះអាងរបស់មន្ត្រីជំនាញដូចករណីបែកធ្លាយអំពើពុករលួយក្នុងទំនប់អាង កំពីងពួយ និងទំនប់អាងថ្មក្នុងខេត្តបន្ទាយមានជ័យ និងគម្រោងអាគ្នេយ៍ជំហានទី១ ០៧កិច្ចសន្យា ទឹកលុយជាង ៤លានដុល្លារ ខេត្តស្វាយរៀង និងព្រៃវែង និងជំហានទី ២ ០៦កិច្ចសន្យា ស្មើនឹងថវិកាជាង ៣លានដុល្លារ មណ្ឌលគីរី, ក្រចេះ និងរតនគីរី ហើយដែលក្នុងនោះក៏មានការឃុបឃិតរួមដៃ ប្រព្រឹត្តអំពើពុករលួយពីប្រធាន និងអនុប្រធានការិយាល័យធនាគារពិភពលោកនៃអគ្គនាយកដ្ឋានវិនិយោគ និងសហប្រតិបត្តិ ការក្រសួងហិរញ្ញវត្ថុផងនោះ ។
ដួច្នេះពាក់ព័ន្ធនឹងអំពើពុករលួយយ៉ាងដុះស្លែចាយលុយរដ្ឋគ្មាន តម្លាភាពនេះ ក៏មានសំណូមពរចំពោះអង្គភាពប្រឆាំងអំពើពុក រលួយបច្ចុប្បន្នដែលជាសេនាធិការរបស់រដ្ឋាភិបាលនោះ គួរតែហ៊ានអារកាត់ និងស៊ើបអង្កេតរឿងពុករលួយរហូតក្លាយជា ទម្លាប់គ្រួសារនិយម យ៉ាងពេញបន្ទុកក្នុងក្រសួងធនធានទឹកនេះ ដើម្បីលើកមុខ និងតម្លាភាពក្រោមការដឹកនាំរបស់ប្រមុខ រាជរដ្ឋាភិបាល ហ៊ុន សែន បច្ចុប្បន្នផង ។/
Recent Comments