ប្រភពពីប្រជាពលរដ្ឋដែលជាកម្មករអូសរទេះដឹកជញ្ជូនទំនិញឆ្លងកាត់ ច្រកអន្តរជាតិចាំយាម ខេត្តកោះកុងបានឲ្យដឹងថាពួកគាត់បានបង់លុយឲ្យសមត្ថកិច្ចច្រក នេះដើម្បីអាចអូសទំនិញខូចគុណភាពពីទឹកដីសៀមចូលស្រុកខ្មែរ។ ក្រុមកម្មករអូសរទេះបានឲ្យដឹងថា ឈ្មួញធំៗបាននាំចូលទំនិញខូចគុណភាពនិងមានផ្ទុកសារធាតុគីមីក៏ដូចជា របស់របរប្រើប្រាស់ផ្សេងៗចូលស្រុកខ្មែរហើយពួកគាត់គ្រាន់តែស៊ីឈ្នួល អូសរទេះប៉ុណ្ណោះ។កម្មករអូសរទេះបានឲ្យដឹងថា ទំនិញជាច្រើនប្រភេទជាពិសេស សាច់មាន់ជង្គង់មាន់ ស្លាបមាន់ និងឆ្អឹងមាន់ ព្រមទាំងប្រហិតមានលាយសារធាតុគីមីត្រូវមន្ត្រីកាំកុងត្រូលច្រកចាំ យាមអនុញ្ញាតឲ្យនាំចូលដោយគ្រាន់តែឈ្មួញបង់លុយតាមការកំណត់។
មួយរយៈពេលចុងក្រោយប្រភពពីប្រជាពលរដ្ឋរស់នៅក្បែរច្រកអន្តរជាតិ ចាំយាម ខេត្តកោះកុង បានឲ្យដឹងថាសមត្ថកិច្ចច្រកព្រំដែនជាពិសេសមន្ត្រីគយនិងកាំកុងត្រូល បានបើកដៃឲ្យឈ្មួញនាំចូលទំនិញគេចពន្ធ ព្រមទាំងគ្រឿងឧបភោគបរិភោគខូចគុណភាពមានផ្ទុកសារធាតុគីមីចូលស្រុក ខ្មែរយ៉ាងពេញបន្ទុក។សមត្ថកិច្ចពាក់ព័ន្ធមួយចំនួនបានឲ្យ ដឹងថាសមត្ថកិច្ចគយនិងកាំកុងត្រូលគិតតែរឿងប្រមូលលុយធ្វើមានធ្វើបាន យ៉ាងសុខស្រួល ហើយមិនដែលគិតគូរផលប៉ះពាល់ដល់សុខភាពប្រជាពលរដ្ឋឡើយ។ប្រការនេះលោក ម៉ក់ ពេជ្ជរិទ្ធ អគ្គនាយកនៃអគ្គនាយកដ្ឋានកាំកុងត្រូលគួរចាត់វិធានការលើមន្ត្រី កាំកុងត្រូលច្រកចាំយាមជាបន្ទាន់ ដើម្បីកុំឲ្យពួកគេធ្វើអ្វីៗតាមអំពើចិត្តទៀត។
ប្រភពពីកម្មករអូសរទេះបានឲ្យដឹងថាពួកគាត់បង់លុយក្នុងមួយជើងពី ១០០០០ទៅ៥០០០០រៀលតាមរទេះតូចឬធំទៅឲ្យមន្ត្រីកាំកុងត្រូលនិង នគរបាលជាថ្នូរអាចនាំចូលជង្គង់មាន់ស្លាបមាន់ ប្រហិត គ្រឿងសមុទ្រនិងគ្រឿងឧបភោគបរិភោគដទៃទៀតចូលក្នុងទឹកដីខ្មែរ។អាជីវករ ខ្លះបានឲ្យដឹងថាពួកគាត់ដឹកទំនិញចូលតាមរថយន្តដោយបង់ឲ្យសមត្ថកិច្ច ក្នុងមួយជើងសរុប៣៥០ដុល្លារ ក្នុងនោះកាំកុងត្រូល១០០ដុល្លារ គយ២០០ដុល្លារនិងនគរបាល៥០ដុល្លារ។ ប្រភពបានឲ្យដឹងទៀតថា លោក សំ ចិត្រាមន្ត្រីកាំកុងត្រូលប្រចាំច្រកចាំយាមគឺជាអ្នកទទួលខុសត្រូវរឿង អនុញ្ញាតឲ្យឈ្មួញនាំចូលទំនិញខូចគុណភាពពីប្រទេសសៀមបើមិនដូច្នេះទេ ឈ្មួញមិនអាចនាំទំនិញទាំងនោះចូលស្រុកខ្មែរតាមអំពើចិត្ត៕
Recent Comments