ប្រជាពលរដ្ឋ និងមន្ត្រីរាជការខេត្តតាកែវបានលើកឡើងថាការកែទម្រង់ស៊ីជម្រៅរបស់រដ្ឋាភិបាលគ្មានប្រសិទ្ធភាពនោះទេ ព្រោះតាំងពីរដ្ឋាភិបាលលោក ហ៊ុន សែន បន្តដឹកនាំប្រទេសកម្ពុជានៅក្នុងអាណត្តិទី៥នេះ នៅខេត្តតាកែវគ្មានអ្វីរីកចម្រើនគួរឲ្យកត់សម្គាល់នោះទេ ផ្ទុយទៅវិញបទល្មើសសេដ្ឋកិច្ច និងបញ្ហាអសកម្មផ្សេងៗនៅក្នុងស្ថាប័នរដ្ឋនៅតែកើតមានដដែល។ ប្រភពដដែលបានបញ្ជាក់ថាល្មមដល់ពេលលោក អូន ព័ន្ធមុនីរដ្ឋ រដ្ឋមន្ត្រីក្រសួងសេដ្ឋកិច្ច និងលោក គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករគួរត្រួតពិនិត្យលើមន្ត្រីពុករលួយឡើងវិញ ដើម្បីបង្ហាញពីប្រសិទ្ធភាពកែទម្រង់របស់រដ្ឋាភិបាលអាណត្តិទី៥នេះ។
ប្រភពព័ត៌មានពីខេត្តតាកែវបានឲ្យដឹងថាប្រធានសាខាគយខេត្តកែវឈ្មោះ កែវ វណ្ណី គ្មានសមត្ថភាពទប់ស្កាត់បទល្មើសេដ្ឋកិច្ច និងភាពមិនប្រក្រតីជាច្រើនដែលបានកើតឡើងនៅខេត្តតាកែវនោះទេ។ ប្រភពដដែលបានបញ្ជាក់ថាទំនិញគេចពន្ធនៅតែហូរចូលខេត្តតាកែវតាមច្រករបៀង និងច្រកទ្វារអន្តរជាតិនានានៅក្នុងភូមិសាស្ត្រខេត្តតាកែវបានដដែល ហើយក្នុងនោះគេសង្ស័យថាបទល្មើសសេដ្ឋកិច្ចអាចជាប់ពាក់ព័ន្ធជាមួយមន្ត្រីគយខិលខូចទៀតផង។
ការរិះគន់ប្រធានសាខាគយខេត្តតាកែវ លោក កែវ វណ្ណី ថាគ្មានសមត្ថភាពទប់ស្កាត់បទល្មើសសេដ្ឋកិច្ចនោះ ព្រោះនៅខេត្តតាកែវគេសង្កេតឃើញថាមានឈ្មួញកាន់តែច្រើនឡើងៗបានដឹកជញ្ជូនទំនិញគេចពន្ធពីប្រទេសយួនចូលប្រទេសកម្ពុជាតាមច្រកទ្វារព្រំដែននានាដោយធ្វើដំណើរលើផ្លូវជាតិលេខ២ និងផ្លូវជាតិលេខ៣ឆ្ពោះមកកាន់រាជធានីភ្នំពេញ និងតាមបណ្តាខេត្តជិតខាងមួយចំនួន។ ប្រភពដដែលបានបញ្ជាក់ថាទំនិញភាគច្រើនមានដូចគ្រឿងបន្លាស់រថយន្ត គ្រឿងសំណង់ គ្រឿងបន្លាស់ម៉ូតូ និងសម្ភារៈមានតម្លៃមួយចំនួនទៀត ដោយឈ្មួញទាំងនោះបានប្រើល្បិចឃុបឃិតជាមួយមន្ត្រីជំនាញខិលខូចបង្កប់ទំនិញនៅក្រោមបន្លែផ្លែឈើជាដើម។
មិនត្រឹមតែមានរឿងអាស្រូវពាក់ព័ន្ធនឹងការបើកដៃឲ្យឈ្មួញនាំចូលទំនិញពីប្រទេសយួនចូលប្រទេសកម្ពុជាដោយមិនមានការបង់ពន្ធជូនរដ្ឋឲ្យបានត្រឹមត្រូវនោះទេ តែប្រធានសាខាគយខេត្តតាកែវលោក កែវ វណ្ណី ក៏ត្រូវគេដឹងថាអ្នកចេញមុខកាងឲ្យមន្ត្រីគយចាស់ៗមួយចំនួនដែលត្រូវដល់អាយុចូលនិវត្តន៍ផងដែរ ដែលបញ្ហានេះត្រូវគេដឹងថាប្រធានសាខាគយខេត្តតាកែវ លោក កែវ វណ្ណី ចង់រក្សាទុកមន្ត្រីចាស់ៗដែលងាយស្រួលធ្វើការងារសម្ងាត់ៗជាមួយគ្មា៕
Recent Comments