ប្រភពដដែលបាន បញ្ជាក់ថា ក្នុងអំឡុង ពេលពី២ទៅ៣ថ្ងៃក៏មានត្រាក់ទ័រ និងគោយន្តកែច្នៃមានរ៉ឺម៉ក មិនតិចជាង២០ទៅ ៣០គ្រឿងទេ ដែលបានចូលមកទឹកដី កម្ពុជា ត្រង់ចំណុចភ្នំ សុងមែវ ក្បែរប៉ុស្តិ៍៣ និងនៅចំណុច អូរប៉ុល និងអូរអន្ត្រែង ក្បែរប៉ុស្តិ៍៤ និង៥ ដើម្បីកាប់ និងដឹកជញ្ជូនឈើប្រណីត ប្រភេទ សុក្រំ ផ្ចឹក យ៉ាង អនាធិបតេយ្យសកម្មជនព្រៃឈើ និងប្រជាពលរដ្ឋខេត្ត មណ្ឌលគិរី បានរាយការណ៍ ឲ្យដឹងថា នគរបាល វរការពារព្រំដែនគោក ៣០៣នៅខេត្តមណ្ឌលគិរី នៅតែបន្តបើកដៃឱ្យ ជនជាតិយួន ចូលកាប់ឈើក្នុងទឹកដីខ្មែរ ដដែលបើទោះជាមានការរិះគន់ យ៉ាងណាក៏ដោយ។
ពាក់ព័ន្ធបញ្ហានេះ កម្លាំងល្បាតរបស់យោធាកងអនុសេនាធំទី៣ វរការពារព្រំដែនគោកលេខ១០៣ នៃតំបន់ប្រតិបត្តិការសឹកមណ្ឌលគិរី កាលពីសប្តាហ៍មុនបានចាប់ជនជាតិយួនចំនួន៤នាក់ គោយន្តកែច្នៃ១គ្រឿង ម៉ូតូ២គ្រឿងម៉ាស៊ីនកាត់ឈើ ២គ្រឿង នៅចំណុចភ្នំសុងមែវនោះ ហើយបានប្រគល់ឱ្យទៅនគរបាលការពារព្រំដែន ប៉ុស្តិ៍ម្រើច ឬប៉ុស្តិ៍លេ៣ ដើម្បីរក្សាទុក និងចាត់ការតាមនីតិវិធីច្បាប់។ តែក្រោយមកលេចធ្លាយព័ត៌មានថាមន្ត្រីនគរបាលប៉ុស្តិ៍ម្រើច ឬប៉ុស្តិ៍លេខ៣ បែរជាដោះលែងជនជាតិយួនទាំងនោះយ៉ាងស្ងៀមស្ងាត់ទៅវិញ។
ជុំវិញបញ្ហានេះ ជនជាតិយួនត្រូវគេដកស្រង់សំដីដោយអះអាងថា ត្រូវចំណាយ ប្រាក់ក្នុងគោយន្ត១គ្រឿង ពី៨លានដុងទៅ១០លានដុង តាមតូច តាមធំទើបទទួលបានការអនុញ្ញាតឱ្យ ចូលកាប់ឈើនិងដឹកជញ្ជូនចេញពីទឹកដីកម្ពុជាបាន ។ ចំពោះមុខបញ្ហានេះ ប្រភពពីមន្ត្រីនគរបាលនៅក្នុងស្នងការដ្ឋានខេត្តមណ្ឌលគិរី បានបង្ហើបប្រាប់អ្នកសារព័ត៌មានថា លោក ស៊ាន ស៊ីវន មេបញ្ជាការនគរបាល វរការពារព្រំដែនគោកលេខ ៣០៣ កំពុងដើរប្រមូលលុយពីកូនចៅនៅតាម បណ្តាប៉ុស្តិ៍ព្រំដែនយកមកទប់ តំណែងព្រោះព្រួយបារម្ភបន្ទាប់ពីករណីមានការផ្លាស់ប្តូរស្នងការនគរបាល ខេត្តថ្មីដែលធ្វើឲ្យប៉ះពាល់ដល់ការឃុបឃិតកាប់ឈើខុសច្បាប់។
គួររំលឹកថា លោក ស៊ាន ស៊ីវន មេបញ្ជាការនគរបាល វរការពារព្រំដែនគោកលេខ ៣០៣ និងបក្ខពួកបានរងការចោទប្រកាន់ថា បានបើកដៃឱ្យកូនចៅនៅតាមបណ្តាប៉ុស្តិ៍ព្រំដែន រកប្រយោជន៍ ដោយអនុញ្ញាតឱ្យក្រុមឈ្មួញជនជាតិយួនចូលមកទឹកដីកម្ពុជាកាប់ និងដឹកជញ្ជូនឈើប្រណីត យ៉ាងអនាធិបតេយ្យច្រើនដងមកហើយ តែរហូតមកដល់ពេលនេះលោក ស៊ាន ស៊ីវន នៅតែអាចឈរជើងនៅក្នុងមុខតំណែងសព្វថ្ងៃនេះបានដដែល៕
Recent Comments