មន្ត្រីរាជការក្នុងមន្ទីររ៉ែនិងថាមពលខេត្តកំពង់ធំ បានឲ្យដឹងថា ម្ចាស់អាជីវកម្មបូមខ្សាច់ដែលមានអាជ្ញាប័ណ្ណចាស់ផុតកំណត់ បានស្នើសុំអាជ្ញាប័ណ្ណថ្មីទៅក្រសួង តែរហូតមកដល់ពេលនេះក្រសួងមិនទាន់ចេញអាជ្ញាប័ណ្ណថ្មីឲ្យនៅឡើយ ។ ប៉ុន្តែម្ចាស់អាជីវកម្មបូមខ្សាច់ទាំងនោះកំពុងធ្វើសកម្មភាពមូបខ្សាច់ខុសច្បាប់យ៉ាងអនាធិបតេយ្យ ដោយមានការឃុបឃិតជាមួយលោក ណឹម ចន្ថា ប្រធានមន្ទីររ៉ែនិងថាមពលខេត្តកំពង់ធំ។ ចំណែកលោក អ៊ុត សំអន អភិបាលខេត្តកំពង់ធំ ក៏អាចជាប់ពាក់ព័ន្ធនឹងផលប្រយោជន៍ផងដែរ ទើបរក្សាភាពស្ងៀមស្ងាត់ក្នុងខណៈដែលសកម្មភាពបូមខ្សាច់ក្នុងស្ទឹងសែននៃឃុំត្បូងក្រពើ ស្រុកសន្ទុក នៅតែមានសកម្មភាពយ៉ាងគគ្រឹកគគ្រេង។ប្រជាពលរដ្ឋនៅក្នុងឃុំត្បូងក្រពើ ស្រុកសន្ទុក ខេត្តកំពង់ធំ បានឲ្យដឹងថា បទល្មើសបូមខ្សាច់តាមដងស្ទឹងសែនក្នុងមូលដ្ឋានរបស់ពួកគាត់មានសភាពកាន់តែខ្លាំងក្លា អាចធ្វើឲ្យដីភូមិ ដីលំនៅដ្ឋានរបស់ពួកគាត់បាក់ចូលក្នុងស្ទឹងជាបន្តបន្ទាប់។ ប្រជាពលរដ្ឋបានឲ្យដឹងថា អាជ្ញាធរស្រុកសន្ទុក ដែលមានលោក ពេជ្រ សុធា ជាអភិបាលស្រុក បានដឹងពីបទល្មើសបូមខ្សាច់យ៉ាងច្បាស់ ប៉ុន្តែទំនងជាប់ពាក់ព័ន្ធនឹងផលប្រយោជន៍ទើបធ្វើមិនដឹងមិនឮអ្វីទាំងអស់។ ចំណែកលោក ណឹម ចន្ថា ប្រធានមន្ទីររ៉ែនិងថាមពលខេត្តកំពង់ធំ ត្រូវបានគេដឹងថាជាអ្នកនៅពីក្រោយសកម្មភាពបូមខ្សាច់របស់ក្រុមជនល្មើសយ៉ាងក្រអឺតក្រទម។
តាមសេចក្ដីរាយការណ៍ពីប្រជាពលរដ្ឋក្នុងភូមិមួយចំនួននៃឃុំត្បូងក្រពើ បានឲ្យដឹងថា ឥឡូវនេះក្រុមជនល្មើសបានដាក់គ្រឿងចក្របូមខ្សាច់ជាច្រើនកន្លែង បង្កឲ្យបាក់ដីច្រាំងស្ទឹងចូលទឹកជាបន្តបន្ទាប់ ហើយគ្មានមន្ត្រីអាជ្ញាធរឬមន្ត្រីជំនាញពាក់ព័ន្ធណាទប់ស្កាត់ឡើយ ។ តាមប្រភពពីមន្ត្រីរាជការនៃមន្ទីររ៉ែនិងថាមពលខេត្តកំពង់ធំ បានឲ្យដឹងទៀតថា ក្រុមហ៊ុនកំពុងធ្វើសកម្មភាពបូមខ្សាច់នោះមានឈ្មោះ ប៊ីវីប៊ី ហើយក្រុមហ៊ុននេះមិនទាន់ទទួលបាលអាជ្ញាប័ណ្ណថ្មីពីក្រសួងរ៉ែនិងថាមពលផង ក៏ធ្វើសកម្មភាពបូមខ្សាច់ក្នុងស្ទឹងសែនស្រេចតែអំពើចិត្ត។ មន្ត្រីរាជការនៃមន្ទីររ៉ែនិងថាមពលខេត្តកំពង់ធំ បានឲ្យដឹងទៀតថា បើគ្មានការបើកដៃពីលោក ណឹម ចន្ថា ទេនោះ គឺក្រុមជនល្មើសមិនហ៊ានធ្វើអ្វីៗតាមអំពើចិត្តឡើយ ដូច្នេះលោក ណឹម ចន្ថា ជាអ្នកទទួលខុសត្រូវធំជាងគេចំពោះសកម្មភាពបូមខ្សាច់ខុសច្បាប់ នៅក្នុងស្ទឹងសែន ៕
Recent Comments