សេចក្ដីរាយការណ៍ពីសមត្ថកិច្ចមួយចំនួនឈរជើងនៅច្រកចាំយាម បានឲ្យដឹងថា ចាប់តាំងចុងខែសីហានិងនៅដើមខែកញ្ញានេះ ឈ្មួញបានសម្រុកនាំចូលម៉ូតូទំនើបអត់ពន្ធតាមច្រកចាំយាម ក្នុងមួយថ្ងៃៗរាប់រយគ្រឿង។ ម៉ូតូម៉ាកហុងដាលេខអូតូស៊េរីថ្មីៗឆ្នាំ២០១៥ ជាច្រើនប្រភេទដូចជា ហុងដា PCX ,ហុងដា Cleck ,ហុងដា Scopy,ហុងដា Zoomer x និងប្រភេទមានចង្កឹះលេខម៉ាកMSX ត្រូវឈ្មួញសម្រុកនាំចូលរាប់រយគ្រឿងក្នុងមួយថ្ងៃៗ។ កន្លងមកក្រុមហ៊ុននាំចូលផ្ដាច់មុខម៉ូតូប្រភេទដូចខាងលើនេះ មានការរឹតបន្តឹងយ៉ាងខ្លាំងប៉ុន្តែនៅក្នុងខែសីហា កន្លងមកនិងនៅខែកញ្ញានេះ បែរជាសមត្ថកិច្ចគយច្រកចាំយាមបើកដៃឲ្យឈ្មួញនាំចូលម៉ូតូអត់ពន្ធប្រភេទដូចខាងលើយ៉ាងគំហុក។
ប្រភពពីសមត្ថកិច្ចពាក់ព័ន្ធនៅច្រកចាំយាម បានឲ្យដឹងថាលោក ថេង ម៉ុងហួន ប្រធានការិយាល័យគយប្រចាំច្រកចាំយាម និងបក្ខពួកប្រព្រឹត្តអំពើពុករលួយកាន់តែខ្លាំង តាមរយៈការបើកដៃឲ្យឈ្មួញនាំចូលម៉ូតូទំនើបៗអត់ពន្ធយ៉ាងពេញបន្ទុក។ បញ្ហានេះលោក គុណ ញឹម ដែលជាអគ្គនាយកនៃអគ្គនាយកដ្ឋានគយនិងរដ្ឋាករ ត្រូវចាត់វិធានការត្រួតពិនិត្យជាបន្ទាន់ព្រោះការនាំចូលម៉ូតូទំនើបៗអត់ពន្ធរាប់រយគ្រឿងក្នុងមួយថ្ងៃៗ នាំឲ្យបាត់បង់ចំណូលពន្ធរដ្ឋយ៉ាងច្រើនសន្ធឹកសន្ធាប់។ ជាមួយគ្នានេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ គួរពិនិត្យមើលរឿងអាស្រូវពុករលួយរបស់មេគយច្រកចាំយាម ជាបន្ទាន់ផងដែរដើម្បីកុំឲ្យមានការនាំចូលម៉ូតូអត់ពន្ធ និងទំនិញគេចពន្ធតាមច្រកនេះយ៉ាងអនាធិបតេយ្យតទៅទៀត។
តាមប្រភពពីសមត្ថកិច្ចពាក់ព័ន្ធបានឲ្យដឹងទៀតថា ការដែលឈ្មួញអាចនាំចូលម៉ូតូអត់ពន្ធតាមច្រកចាំយាម យ៉ាងគគ្រឹកគគ្រេងដូចសព្វថ្ងៃនេះ គឺមានការបើកដៃពីលោក ថេង ម៉ុងហួន តែម្ដងព្រោះបើគ្មានការបើកដៃពីលោក ថេង ម៉ុងហួន ទេឈ្មួញខិលខូចមិនហ៊ានធ្វើអ្វីៗស្រេចតែអំពើចិត្តឡើយ។ នៅពេលមកប្រជុំជាមួយមេៗថ្នាក់លើគឺបុគ្គល ថេង ម៉ុងហួន ពូកែខាងបិទបាំងអំពើពុករលួយរបស់ខ្លួន ហើយប្រហែលជាមានការបែងចែកផលប្រយោជន៍ដល់មេៗខាងលើជាប្រចាំផងដែរ ទើបលោក ថេង ម៉ុងហួន អាចធ្វើអ្វីៗតាមអំពើចិត្ត។ ជួនកាលទំនិញគេចពន្ធនិងទំនិញខុសច្បាប់ត្រូវឈ្មួញនាំចូលតាមច្រកចាំយាម យ៉ាងពេញបន្ទុកប៉ុន្តែបុគ្គល ថេង ម៉ុងហួន ហ៊ានដោះសារថានៅច្រកចាំយាម ពុំមានការនាំចូលទំនិញគេចពន្ធនិងទំនិញខុសច្បាប់នោះឡើយ ៕
Recent Comments