ជុំវិញការបាត់លុយ២៣ម៉ឺនដុល្លារនោះ លោក សែម សំអាង និងលោក ខឹម តេងអឿន បានបញ្ជាក់ប្រាប់អ្នកសារព័ត៌មានរួចមកហើយថា លុយ២៣ម៉ឺនដុល្លារនោះពួកគេប្រគល់ឲ្យឈ្មោះ ណី សំកុល ប្រធាននាយកដ្ឋានហិរញ្ញកម្មទទួលបន្ទុកប្រមូលចំណូល និងបំណុល គ្រប់ចំនួនហើយគ្រាន់តែមិនបានធ្វើឯកសារប្រគល់ទទួលឲ្យបានត្រឹមត្រូវ។ ជាមួយគ្នានេះលោក សែម សំអាង និងលោក ខឹម តេងអឿន បានត្រៀមមេធាវីរួចជាស្រេច ដើម្បីការពារក្ដីទប់ទល់នឹងការចោទប្រកាន់របស់លោក ឡាយ ម៉ារីវ៉ូ។ ដូច្នេះគេរង់ចាំមើលលទ្ធផលចុងក្រោយថា តើលោក ឡាយ ម៉ារីវ៉ូ ត្រូវទទួលលទ្ធផលបែបណានៅពេលកូនចៅក្រោមឱវាទលាតត្រដាងការពិតនៅក្នុងតុលាការ។
រហូតមកដល់ពេលនេះ លោក ប្រាក់ សុខុន រដ្ឋមន្ត្រីក្រសួងប្រៃសណីយ៍និងទូរគមនាគមន៍ មិនទាន់ចាត់វិធានការលើលោក ឡាយ ម៉ារីវ៉ូ អគ្គនាយកទូរគមនាគមន៍កម្ពុជា ពាក់ព័ន្ធនឹងរឿងអាស្រូវបិទបាំងលុយ២៣ម៉ឺនដុល្លារនោះទេ។ ផ្ទុយទៅវិញលោក ប្រាក់ សុខុន ដែលជាបង្កើតក្រុមអធិការកិច្ចដើម្បីស៊ើបអង្កេតជុំវិញបញ្ហានេះ ហើយលោក ឡាយ ម៉ារីវ៉ូ កំពុងប្រឹងប្រែងរកវិធីទម្លាក់កំហុសទៅលើកូនចៅក្រោមឱវាទដោយខ្វះការទទួលខុសត្រូវ។ ទោះជាយ៉ាងណាអាថ៌កំបាំងទាំងឡាយមិនអាចបិទបាំងបានទេ នៅពេលដែលសំណុំរឿងត្រូវបានបញ្ជូនទៅដល់តុលាការ មានន័យថាទង្វើទាំងឡាយរបស់លោក ឡាយ ម៉ារីវ៉ូ នឹងត្រូវលាតត្រដាងទាំងអស់។
ប្រភពពីមន្ត្រីជាន់ខ្ពស់ក្រសួងប្រៃសណីយ៍និងទូរគមនាគមន៍បានបញ្ជាក់ថា បើផ្អែកទៅលើហេតុផលនិងរឿងរ៉ាវជាក់ស្ដែង គឺលោក ឡាយ ម៉ារីវ៉ូ អគ្គនាយកទូរគមនាគមន៍កម្ពុជា គឺជាអ្នកទទួលខុសត្រូវតែម្នាក់គត់ក្នុងរឿងបាត់លុយ២៣ម៉ឺនដុល្លារ។ មន្ត្រីក្រសួងប្រៃសណីយ៍បានឲ្យដឹងទៀតថា លោក ប្រាក់ សុខុន រដ្ឋមន្ត្រីក្រសួងប្រៃសណីយ៍ គឺជាអ្នកលើកបន្តុបលោក ឡាយ ម៉ារីវ៉ូ ឲ្យកាន់តំណែងជាអគ្គនាយកទូរគមនាគមន៍កម្ពុជា និងបណ្ដោយឲ្យមន្ត្រីរូបនេះធ្វើអ្វីៗស្រេចតែអំពើចិត្ត។ ដូច្នេះអង្គភាពប្រឆាំងអំពើពុករលួយ គួរស៊ើបអង្កេតរឿងអាស្រូវពុករលួយនៅអង្គភាពទូរគមនាគមន៍កម្ពុជាផងដែរ ព្រោះបើតាមការអះអាងរបស់លោក សែម សំអាង និងលោក ខឹម តេងអឿន បានបង្ហាញឲ្យឃើញថា លោក ឡាយ ម៉ារីវ៉ូ ជាអ្នកទទួលខុសត្រូវ រឿងបាត់ថវិកា២៣ម៉ឺនដុល្លារ ៕
Recent Comments