ប្រភពពីមន្ត្រីរាជការក្នុងក្រសួងប្រៃសណីយ៍ បានឲ្យដឹងថា ការដែលលោក ឡាយ ម៉ារីវ៉ូ ហ៊ានប្រព្រឹត្តអំពើពុករលួយនិងធ្វើអ្វីៗស្រេចតែអំពើចិត្ត គឺដោយសារអាងលោករដ្ឋមន្ត្រី ប្រាក់ សុខុន ជាខ្នងបង្អែកយ៉ាងរឹងមាំ។ ជាក់ស្ដែងនៅពេលចូលកាន់តំណែងជាអគ្គនាយកទូរគមនាគមន៍ មិនបានប៉ុន្មានផងលោក ឡាយ ម៉ារីវ៉ូ បានប្រព្រឹត្តអំពើពុករលួយ នាំឲ្យបាត់បង់ថវិកាច្រើនម៉ឺនដុល្លារ ហើយបុគ្គលិកស្ថាប័នទូរគមនាគមន៍កម្ពុជា ប្រមូលផ្ដុំគ្នាតវ៉ាជាច្រើនលើក។ អ្វីដែលគួរឲ្យកត់សម្គាល់នោះ គឺនៅពេលអំពើពុករលួយរបស់ ឡាយ ម៉ារីវ៉ូ ត្រូវបានលាត្រដាងជាសាធារណៈ បែរជាលោក ប្រាក់ សុខុន មិនដកហូតបុគ្គលនេះ ចេញពីតំណែងទេ ហើយបែរជាបង្កើតក្រុមអធិការកិច្ចចុះស៊ើបអង្កេត ដើម្បីបិទបាំងរឿងអាស្រូវនោះទៅវិញ។ ដូច្នេះហើយទើបគេគ្មានជំនឿសូម្បីតែប៉ុនសរសៃសក់ ព្រោះសមាភាពនៃក្រុមអធិការកិច្ចនោះ សុទ្ធតែជាមន្ត្រីក្រសួងប្រៃសណីយ៍ទាំងអស់ ដែលពួកគេអាចបិទបាំងអំពើពុករលួយ។
រឿងរ៉ាវលោក ឡាយ ម៉ារីវ៉ូ អគ្គនាយកទូរគមនាគមន៍កម្ពុជា ប្រព្រឹត្តអំពើពុករលួយធ្វើឲ្យបាត់ថវិកា២៣ម៉ឺនដុល្លារ កំពុងធ្វើឲ្យមជ្ឈដ្ឋាននានាតាមដានដោយយកចិត្តទុកដាក់ ហើយអំពាវនាវឲ្យលោក ប្រាក់ សុខុន រដ្ឋមន្ត្រីក្រសួងប្រៃសណីយ៍និងទូរគមនាគមន៍ ចាត់វិធានការលើមន្ត្រីពុករលួយរូបនេះជាបន្ទាន់។ ដោយហេតុថា ក្រោយពេលរឿងអាស្រូវពុករលួយរបស់ខ្លួន ត្រូវបានលាតត្រដាងជាសាធារណៈរួចមក បុគ្គល ឡាយ ម៉ារីវ៉ូ កំពុងប្រើល្បិចទម្លាក់កំហុសលើគេឯង ដោយគ្មានការទទួលខុសត្រូវ។ ប៉ុន្តែមជ្ឈដ្ឋាននានា បានវាយតម្លៃថា នៅពេលសំណុំរឿងទៅដល់តុលាការ គឺលោក ឡាយ ម៉ារីវ៉ូ មិនអាចបិទបាំងអំពើពុករលួយរបស់ខ្លួនតទៅទៀតឡើយ ព្រោះភស្តុតាងទាំងឡាយនឹងត្រូវលាតត្រដាងជាសាធារណៈ។
ឥឡូវនេះក្រសួងប្រៃសណីយ៍និងទូរគមនាគមន៍ បានបង្កើតក្រុមអធិការកិច្ចឲ្យចុះធ្វើការស៊ើបអង្កេតទៅលើភាពមិនប្រក្រតី នៃការគ្រប់គ្រងចំណូលនិងចំណាយរបស់ស្ថាប័នទូរគមនាគមន៍កម្ពុជា។ ការបង្កើតក្រុមអធិការកិច្ចនេះ បន្ទាប់ពីមន្ត្រីបុគ្គលិកស្ថាប័នទូរគមនាគមន៍ជិត១០០នាក់ធ្វើការតវ៉ា ឲ្យស៊ើបអង្កេតជុំវិញរឿងបាត់ថវិកា២៣ម៉ឺនដុល្លារ ដោយមិនដឹងមូលហេតុ។ ទោះជាយ៉ាងណាក្រុមមន្ត្រីអង្គការក្រៅរដ្ឋាភិបាលដែលឃ្លាំមើលអំពើពុករលួយក្នុងប្រទេសកម្ពុជា ពុំមានជំនឿថា ក្រុមអធិការកិច្ចក្រសួងប្រៃសណីយ៍និងទូរគមនាគមន៍ អាចស៊ើបអង្កេតប្រកបដោយតម្លាភាពនោះទេ។ ដោយហេតុថា ក្រសួងប្រៃសណីយ៍បង្កើតក្រុមអធិការកិច្ចនេះ ដោយពុំមានអន្តរក្រសួង ជាពិសេសមន្ត្រីអង្គភាពប្រឆាំងអំពើពុករលួយចូលរួម ។
Recent Comments