បុគ្កលិកក័ដូចជាមន្រ្នីរាជ្យការជាច្រើននាក់បានអំពាវនាវឲ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បើកការស៊ើបអង្កេតលើរឿងអាស្រូវពុករលួយដល់ឆ្អឹងរបស់លោក ឡាយ ម៉ារីវ៉ូ ជាបន្ទាន់ ដើម្បីកុំឲ្យមន្ត្រីរូបនេះទម្លាក់កំហុសទៅលើមន្ត្រីក្រោមឱវាទតទៅទៀត។
ចាប់តាំងពីលោក ឡាយ ម៉ារីវ៉ូ ចូលកាន់តំណែងជាអគ្គនាយកទូរគមនាគមន៍កម្ពុជា រហូតមកគឺអំពើពុករលួយបក្ខពួកនិយម ធ្វើឲ្យបាត់បង់ថវិការដ្ឋយ៉ាងច្រើនសន្ធឹកសន្ធាប់។ ហេតុនេះហើយទើបកាលពីថ្ងៃទី០៧ ខែកញ្ញា ឆ្នាំ២០១៥ មន្ត្រីបុគ្គលិកអង្គភាពទូរគមនាគមន៍កម្ពុជា ជិត១០០នាក់បានប្រមូលផ្ដុំគ្នាតវ៉ាជំរុញឲ្យមានការស៊ើបអង្កេតករណីបាត់ថវិកា២៣ម៉ឺនដុល្លារ។
នៅពេលដែលមន្ត្រីបុគ្គលិកប្រមូលផ្ដុំគ្នាតវ៉ា ឲ្យមានការស៊ើបអង្កេតរឿងបាត់ថវិកា២៣ម៉ឺនដុល្លារនោះ បែរជាបុគ្គល ឡាយ ម៉ារីវ៉ូ ដែលមេខ្លោងប្រព្រឹត្តអំពើពុករលួយបានប្រាប់អ្នកយកព័ត៌មានថា ខ្លួនកំពុងរៀបចំឯកសារដាក់ជូនតុលាការ ដើម្បីចាត់វិធានការតាមផ្លូវច្បាប់ចំពោះលោក សែម សំអាង និង លោក ខឹម តេងអឿន។ ដើម្បីបិទបាំងអំពើពុករលួយដ៏អាក្រក់របស់ខ្លួន លោក ឡាយ ម៉ារីវ៉ូ បែរជាទម្លាក់កំហុសដាក់កូនចៅក្រោមឱវាទ ដែលបញ្ហានេះបង្ហាញយ៉ាងច្បាស់ថាលោក ឡាយ ម៉ារីវ៉ូ ជាមេដឹកនាំខ្វះការទទួលខុសត្រូវហ៊ានស៊ីតែមិនហ៊ានសង។ ការពិតលោក ឡាយ ម៉ារីវ៉ូ គឺជាមេខ្លោងប្រព្រឹត្តអំពើពុករលួយធំជាងគេក្នុងអង្គភាពទូរគមនាគមន៍កម្ពុជា ដោយហេតុថាបើគ្មានការបើកដៃពីលោក ឡាយ ម៉ារីវ៉ូ ទេនោះ មន្ត្រីក្រោមឱវាទដូចជា លោក សែម សំអាង និង លោក ខឹម តេងអឿន មិនហ៊ានធ្វើអ្វីៗស្រេចតែអំពើចិត្តឡើយ។
ទាក់ទងនឹងបញ្ហាខាងលើនេះដែរ លោក សែម សំអាង បានបញ្ជាក់ថា លុយទាំងនោះលោកបានប្រគល់ទៅឲ្យឈ្មោះ ណី សំកុល ប្រធាននាយកដ្ឋានហិរញ្ញកម្មទទួលបន្ទុកប្រមូលចំណូលនិងបំណុល ដូច្នេះលោកកំពុងស្វែងរកមេធាវីជួយការពារក្ដីក្នុងរឿងនេះ។ ចំណែកលោក ខឹម តេងអឿន ដែលរងការចោទប្រកាន់ដែរនោះ បានបដិសេធថា លោកមិនជាប់ពាក់ព័ន្ធលុយ២៣ម៉ឺនដុល្លារនោះទេ ហើយត្រៀមរកមេធាវីដើម្បីការពារខ្លួនផងដែរ។ ដូច្នេះមេខ្លោងពុករលួយធំជាងគេគ្មាននរណាក្រៅពីលោក ឡាយ ម៉ារីវ៉ូ នោះទេ ហើយថ្នាក់ដឹកនាំក្រសួងប្រៃសណីយ៍និងទូរគមនាគមន៍មួយចំនួន ក៏មានជាប់ពាក់ព័ន្ធរឿងអាស្រូវពុករលួយដ៏វែងអន្លាយនេះដែរ។ ដើម្បីរកឲឃើញការពិតមានតែអង្គភាពប្រឆាំងអំពើពុករលួយបើកការស៊ើបអង្កេតជាបន្ទាន់ ទើបអាចវែកមុខជនពុករលួយយកទៅផ្ដន្ទាទោសតាមផ្លូវច្បាប់៕
Recent Comments