ប្រភពដដែលបានបញ្ជាក់ថា ឧកញ៉ា ថៃ និងគូកន ឈ្មោះ ត្រេង ធី ដែលកន្លងមកជាឈ្មួញរកស៊ីឈើដ៏មានឥទ្ធិពលនៅខេត្តមណ្ឌលគិរីនោះ កំពុងតែបង្ហាញពីភាពខ្លាំងរបស់ខ្លួនកាន់តែរឹងមាំឡើង ព្រោះក្រុមឈ្មួញមានឥទ្ធិពលខាងលើបានចេញមុខកាងឲ្យឈ្មួញ និងរថយន្តដឹកឈើខុសច្បាប់ជាច្រើនករណី ហើយក៏គ្មានសមត្ថកិច្ចណាហ៊ានបង្ក្រាបបទល្មើសឲ្យស្របតាមនីតិវីធី ច្បាប់ដែរសកម្មជនព្រៃឈើនៅខេត្តមណ្ឌលគិរីបានបង្ហើបឲ្យដឹងថា ឧកញ៉ាថៃ សព្វថ្ងៃបាននិងកំពុងចេញមុខដោយចំហក្នុងការប្រព្រឹត្តបទល្មើសរកស៊ីឈើ តាមរូបភាពកាងឈើឲ្យឈ្មួញដទៃទៀតដឹកតាមរថយន្តយីឌុប ប្រភេទជាឈើប្រណីតជាដើម។
ប្រភពព័ត៌មានពីសកម្មជនព្រៃឈើនៅខេត្តមណ្ឌលគិរី បានរៀបរាប់ឲ្យដឹងថា ជាទម្លាប់ឈ្មួញឈើមានងារជាឧកញ៉ា ថៃ បានប្រមូលទិញឈើក្នុងទឹកដីខេត្តមណ្ឌលគិរី ដឹកតាមរថយន្តយីឌុប ចូលមកតាមផ្លូវរលួស ស្រែជៀស ស្ថិតក្នុងស្រុកសំបូរ ខេត្តក្រចេះ បុកមកផ្លូវជាតិលេខ៧ ឆ្ពោះទៅស្រុកមេមត់ ខេត្តត្បូងឃ្មុំ ចែកចាយស្តុកទុកផង ដឹកទៅលក់នៅប្រទេសយួនផង។ ប្រភពដដែលបានបញ្ជាក់ថា ឈ្មួញមានឥទ្ធិពលខាងលើនេះមានទំនាក់ទំនងយ៉ាងស្អិតរមួតជាមួយមន្ត្រី ជំនាញមកពីច្រើនអង្គភាពដាក់ប៉ុស្តិ៍ឈរជើងតាមដងផ្លូវដែលរថយន្ត ដឹកឈើឆ្លងកាត់។
ប្រភពមួយដែលអាចយកជាការបានបន្តទៀតថា សព្វថ្ងៃនេះមេឈ្មួញរកស៊ីឈើខុសច្បាប់ឧកញ៉ា ថៃ ដែលមានការជ្រមជ្រែងដោយលោកឧកញ្ញ៉ាម្នាក់ ដែលជាប្រធានក្រុមហ៊ុនប្រាយវ៉េគ្រុប ដែលជាខ្នងបង្អែកដ៏រឹងមាំសព្វថ្ងៃនេះ។
ជុំវិញបទល្មើសព្រៃឈើដែលប្រព្រឹត្តដោយឧកញ៉ា ថៃ និងបក្ខពួកនេះ គូកនម្នាក់ទៀតឈ្មោះ ត្រេង ធី ដែលជាសមត្ថកិច្ចផងនោះ ត្រូវគេដឹងថា មានតួនាទីជាមេការដឹកជញ្ជូនឈើពីក្នុងព្រៃទៅកាន់គោលដៅនានា និងព្រំដែនយួនជាដើម។ ប្រភពដដែលបានបញ្ជាក់ថាឈ្មោះ ត្រេង ធី នេះហើយដែលជាអ្នកចេញមុខរត់ការជាមួយសមត្ថកិច្ចពាក់ព័ន្ធឲ្យឧកញ៉ាថៃ ប្រព្រឹត្តបទល្មើសដឹកឈើប្រណីតយ៉ាងរលូន។ ពាក់ព័ន្ធបញ្ហានេះ ប្រជាពលរដ្ឋ ខេត្តមណ្ឌលគិរី បានត្អូញត្អែរថា ព្រៃឈើនៅខេត្តមណ្ឌលគិរី កាន់តែរងការវិនាសហិនហោចពីមួយថ្ងៃទៅមួយថ្ងៃ តែផលប្រយោជន៍ពីព្រៃឈើទាំងនោះ ភាគច្រើនធ្លាក់ទៅលើមន្ត្រីមានអំណាច និងឈ្មួញខិលខូច ខណៈប្រជាពលរដ្ឋមូលដ្ឋានមានជីវភាពក្រីក្រទទួលបានផលប្រយោជន៍ បន្តិចបន្តួចប៉ុណ្ណោះ៕
Recent Comments