តាមអំណាចជាប្រធានសាខាគយខេត្តតាកែវ លោក អេន សំអុលបានបង្កើតឱ្យមានភាពអសកម្មយ៉ាងពេញបន្ទុក ហើយយក កំណែទម្រង់ស៊ីជម្រៅលើការប្រមូលពន្ធឱ្យបាន ១០០ភាគរយ ទៅធ្វើជាល្បែងលេងសើច ដើម្បីប្រមូលលុយជ្រកក្រោមការ ប្រមូលពន្ធយកទៅច្រកហោប៉ៅធ្វើមានធ្វើបានផ្ទាល់ខ្លួនយ៉ាងត្រេកត្រអាលបំផុត ដែលគួរតែអង្គភាពប្រឆាំងអំពើពុករលួយ មានវិធានការស៊ើបអង្កេតលើ ភាពមិនប្រក្រតី និងការឃុបឃិតឱ្យក្រុមឈ្មួញធំៗនាំចូលទំនិញបង់ពន្ធមិនគ្រប់ នាំឱ្យខាតបង់ចំណូលថវិការជាតិយ៉ាងច្រើនសន្ធឹកសន្ធាប់នោះ បើតាមមន្ត្រីផ្ទៃក្នុងគយបកអាក្រាត។
ជាក់ស្តែងករណីរឿងដែលត្រូវកែទម្រង់មុនគេនោះ គួរតែលោកមេគយធំ គុណ ញឹម លុបបំពាត់បញ្ហាដែលលោក អេន សំអុល រក្សាទុកមន្ត្រីគយដែលដល់អាយុចូលនិវត្តន៍ឱ្យកាន់ការងារលុយកាក់ ដែលងាយកើតមានអំពើពុករលួយផ្ទុយពីកំណែ ទម្រង់ស៊ីជម្រៅរបស់រដ្ឋាភិបាលផងទៅ ! ។
មិនតែប៉ុណ្ណោះ មានបញ្ហាធំៗចំនួន២ដែល លោក ហ៊ុន សែន បានចេញបទបញ្ជាឱ្យសមត្ថកិច្ចនិងមន្ត្រីជំនាញ ពាក់ព័ន្ធទាំង អស់ត្រូវតែយកចិត្តទុកដាក់លុបបំបាត់ឱ្យមានប្រសិទ្ធភាពនោះគឺ បញ្ហាកុងត្រូលជជុះ និងការឃុបឃិតឱ្យមានអំពើរត់ពន្ធទំនិញ ខុសច្បាប់ និងករណីគៃបំបាត់ពន្ធរដ្ឋ ហើយដែលគេដឹងតើមន្ត្រីគយតូចធំណាមួយដែលថា មិនចេះកេងប្រវ័ញ្ចលុយរដ្ឋនោះ ។ ប៉ុន្តែលោក អេន សំអុល មិនដែលឈឺក្បាលវិលមុខពីបញ្ហានេះទេ ចង់ក្រុមឈ្មួញធ្វើអ្វីក៏ធ្វើទៅឱ្យតែបង់លុយជូន គាត់ទៅតាមការទាមទារ។
បើតាមក្រុមឈ្មួញតូចតាចបានទម្លាយទៀតថា បច្ចុប្បន្នក្រុមឈ្មួញធំៗបានឃុបឃិតរកស៊ីនាំចូលទំនិញ ប្រភេទគ្រឿងសំណង់ គ្រឿងបន្លាស់រថយន្តម៉ូតូ ដោយមានការដឹកបង្កប់នៅ ក្រោមទំនិញចាប់ហួយចម្រុះ នាំចូលតាមច្រកបាក់ដៃ ដឹកជញ្ជូនតាមផ្លូវ ជាតិលេខ ២ និងលេខ៣ សឹងខូងផ្លូវទៅហើយ គេមិនដែលឃើញមានការបង្ក្រាបពីជំនាញគយរបស់លោក អេន សំអុល នោះទេ។
មិនតែប៉ុណ្ណោះ តាមក្រុមឈ្មួញដែលរកស៊ីដឹកជញ្ជូនទំនិញមកពីស្រុកយួន តាមច្រកភ្នំដិន ខេត្តតាកែវក៏បានក្តៅក្រហាយ និងត្អូញត្អែររងនូវការកោសរូសបង្ខំឱ្យបង់លុយក្រៅផ្លូវការ ចង់ខ្លាំងជាងការបង់ពន្ធ១០០ភាគរយចូលរដ្ឋទៅទៀត។ ហើយថ្មីៗមានការបង្ហើបយ៉ាង ជាក់ស្តែងថា លោក អែម ស៊ីថា ជាប្រធានការិយាល័យគយប្រចាំច្រកអន្តរជាតិភ្នំដិន បានកោសរូសធ្វើព្យុះភ្លៀងឱ្យឈ្មួញតូចតាចដែលរកស៊ីដឹកជញ្ជូន ទំនិញបន្តិចបន្តួច តាមម៉ូតូ ឬតាមរ៉ឺម៉ក បង់លុយច្រើនដំណាក់កាលមិនដឹងជាបង់លើអ្វីខ្លះទេធ្វើឱ្យការចំណាយលុយក្រៅផ្លូវ ការនោះកើនដល់ទៅ ៣ដង។
ជាពិសេសប្រជាពលរដ្ឋដែលនាចូលសម្បកការុង អស់រយៈពេលជាង១០ឆ្នាំមកហើយនោះត្រូវបានជំនាញគយរបស់លោក អែម ស៊ីថា កោសរូសបង្ខំឱ្យបង់លុយតាមតែអំពើចិត្ត ។ ផ្ទុយសម្រាប់ក្រុមឈ្មួញធំៗ និងឈ្មួញមានអំណាចវិញ បែរជាលោក អែម ស៊ីថា ដាក់ខែទទួលស្រោមសំបុត្រសុំរស់យ៉ាងគឃ្លើនបំផុតប្តូរ និងក្រុមឈ្មួញធំៗនាំចូលទំនិញគ្រប់ប្រភេទឃុបឃិតឱ្យ បង់ពន្ធក្នុងតម្លៃបន្ធូរបន្ថយ និងមានការក្លែងភេទទំនិញ ឬការលួចបន្លំបរិមាណទំនិញទៅតាមជំនាញបច្ចេកទេសរបស់គយ មិនខ្វល់ពីការខាតបង់ចំណូលថវិកាជាតិនោះទេ។
ប្រភពប្រជាពលរដ្ឋឱ្យដឹងថា បើតាមការពិនិត្យជាក់ស្តែងបច្ចុប្បន្ន ការដឹកជញ្ជូនទំនិញមកពីស្រុកយួនចូលតាមច្រកភ្នំដិន តាមផ្លូវគោក និងតាមច្រកបាក់ដៃ តាមផ្លូវទឹកមានភាពគគ្រឹកគគ្រេងបំផុត ប៉ុន្តែចំណូលពន្ធដែលប្រមូលបានពីការហូរចូល ទំនិញពីស្រុកយួន ហាក់ដូចជាមិនមានតុល្យភាពទៅនឹងប្រាក់ចំណូលពន្ធនោះទេ ទោះជាមានការអនុវត្តកំណែទម្រង់ស៊ីជម្រៅ លើការប្រមូលពន្ធក៏ដោយ។ ព្រោះតែមន្ត្រីលើកឡើងថា គឺពន្ធនោះនូវលើបបេ មាត់មន្ត្រី និងគៃកេងយកលុយរដ្ឋតាម តែទំនើងចិត្តនោះឯង ។
មានការបង្ហើបឱ្យដឹងទៀតថា ភាពធូររលុងរបស់ជំនាញគយប្រចាំច្រកព្រំដែនភ្នំដិន និងច្រកបាក់ដៃនោះ មិនមែនទើបតែ កើតឡើងនោះទេ ! គឺជាការអត្តនោម័តបើកភ្លើងខៀវពីសំណាក់លោក អេន សំអុល ដែលជាប្រធាន សាខាគយខេត្តតាកែវតែម្តង ។
មន្ត្រីដដែលបន្តថា គឺ អេន សំអុល ល្បីរឿងប្រព្រឹត្តអំពើពុករលួយបំបាត់ចំណូល ពន្ធរដ្ឋ ហើយក៏ធ្លាប់មានពាក្យបណ្តឹងជាច្រើន ដាក់ជូនខុទ្ទកាល័យនាយករដ្ឋមន្ត្រីទៅក្រសួងហិរញ្ញវត្ថុ ក៏ដូចជាអគ្គនាយកដ្ឋានគយនិងរដ្ឋាករ ប៉ុន្តែមកទល់ពេលនេះ នូវតែមិនអាចធ្វើអ្វីលោក អេន សំអុល បាន ព្រោះគាត់មានលុយកាក់សម្រាប់ទប់តំណែងនិងអាចអភិវឌ្ឍន៍មុខតំណែងជា បន្តបន្ទាប់រឿងពុករលួយនោះ ។
បច្ចុប្បន្នយោងករណីជាក់ស្តែងប៉ុស្តិ៍ជជុះនៅមុខសាខាគយខេត្តតាកែវល្បី កោសរូសឱ្យក្រុមអ្នករកស៊ីដឹកជញ្ជូនទំនិញ ចូលបង់លុយដោយមិនរើសមុខ បើសម្រាប់ ការដឹកទំនិញធម្មតាតាមរថយន្តទួរីសត្រូវចូលបង់លុយថ្លៃបាយចាប់ពី ៣ម៉ឺនទៅ៧ម៉ឺនរៀល តែបើមានការដឹកជញ្ជូនទំនិញមិន ប្រក្រតី នឹងត្រូវឱ្យជំនាញគយកោសរូសឱ្យបង់លុយច្រើនជាងនេះ ដល់ទៅ៣ដងទៅទៀត ។ ហើយដែលរឿងនេះគួរតែអង្គភាពប្រឆាំងអំពើពុករលួយដាក់ការស្រាវជ្រាវជាបន្ទាន់ផង ។
ដោយ ៖ នាយសម្បត្តិ
Recent Comments