ភ្នំពេញ៖ ក្នុងខែសីហា កន្លងមកនេះ មានករណីបណ្ដឹងដ៍ធំមួយ ផ្អើលដល់ព្រះឥន្ទ ដែលលោកស្រី យូ ចន្ថា បានដាក់ពាក្យ ស្នើសុំអន្តរាគមន៍ គោរពចូលទៅ សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ។ ក្នុងកម្មវត្ថុ នៃពាក្យស្នើសុំ អន្តរាគមន៍នោះ បានសរសេរថា «សំណើសុំសម្ដេច មេត្តាជួយរក យុត្តិធម៌ដល់នាងខ្ញុំ ដែលត្រូវបានលោក ឧត្តមសេនីយ៍ទោ ប៉ុល រតនា រងនាយកដ្ឋានព្រហ្មទណ្ឌ ក្រសួងមហាផ្ទៃ បានឃុបឃិតគ្នា ជាមួយលោក សៀង សុខ ព្រះរាជអាជ្ញារង សាលាដំបូង រាជធានីភ្នំពេញ ចាប់ឃុំឃាំងនាងខ្ញុំចំនួន ៣យប់ ៤ថ្ងៃ ក្នុងបន្ទប់របស់លោក… ហើយបង្ខំនាងខ្ញុំ ឲ្យផ្ដិតមេដៃ ប្រគល់ដីចំនួន ១៨ហិកតា ៣០អា ទៅឲ្យឈ្មោះ សេង ស៊ីហេង និងឈ្មោះ ឡាំ ឆាយគីម ជាតំណាងសមាគម ចិនហុកគៀន ដែលមានទីតាំងស្ថិតនៅ ភូមិព្រៃដូនអុក សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ» ។
ពាក់ព័ន្ធនឹងពាក្យស្នើសុំ អន្តរាគមន៍ខាងលើនេះ ឯកឧត្តម ហូ សិទ្ធី នាយកខុទ្ទកាល័យ សម្ដេចអគ្គមហា សេនាបតីតេជោ ហ៊ុន សែន បានធ្វើដីកាបញ្ជូនចំនួន ០២ ក្នុងខែសីហាតែមួយ គឺដីកាបញ្ជូនទី១ លេខៈ ៩១០ ខន/០១៥ ចុះថ្ងៃទី ០៥ ខែសីហា ឆ្នាំ២០១៥ គោរពជូនទៅ ឯកឧត្តម ទេសរដ្ឋមន្ត្រី រដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ (អ៊ឹម ឈុនលឹម) និងដីកាបញ្ជូនទី២ លេខៈ ៩៧៤ ខន/០១៥ ចុះថ្ងៃទី ២៤ ខែសីហា ឆ្នាំ២០១៥ គោរពជូនទៅ ឯកឧត្តម រដ្ឋមន្ត្រី ក្រសួងយុត្តិធម៌ (អង្គ វង្សវឌ្ឈនា) ។
មជ្ឈដ្ឋានមួយចំនួន ដែលបានដឹង ព័ត៌មាននោះខ្លះៗ ក៍បានអំពាវនាវដែរថា បើចង់ដឹងថា តើនរណាខុស ឬនរណាត្រូវ? អ្នកណាល្អ ឬអ្នកណាអាក្រក់? អ្នកណារងគ្រោះ ដ៍អយុត្តិធម៌ និងអ្នកណា ជាអ្នកឃុបឃិតគ្នា ប្រព្រិត្តអំពើអយុត្តិធម៌ ដ៍ធ្ងន់ធ្ងរនោះ គឺសូមឲ្យឯកឧត្តម ឱម យ៉ិនទៀង ប្រធានអង្គភាព ប្រឆាំងអំពើពុករលួយ មេត្តាជួយចាត់ការ ស្រាវជ្រាវ ស៊ើបអង្កេត ករណីនេះជាបន្ទាន់ ដោយមិនលម្អៀង ប្រាកដជាអាច នឹងបានដឹងរឿងច្បាស់… (ដូចករណីឈានទៅចាប់ខ្លួន មន្ត្រីប៉ូលិសមួយចំនួន និងករណីចាប់ខ្លួនលោក អាំង មារតី យកទៅដាក់គុក) ជាមិនខានឡើយ… ។
សូមបញ្ជាក់ថា បន្ទាប់ពីទទួលបាន ឯកសារមួយកំភ្លូស ពាក់ព័ន្ធនឹងព័ត៌មាននេះ អង្គភាពគេហទំព័រយើង បានព្យាយាមទាក់ទង សុំការសម្ភាសន៍បំភ្លឺ ពីឧត្តមសេនីយ៍ទោ ប៉ុល រតនា និងពីលោក សៀង សុខ ព្រមទាំងឈ្មោះ សេង ស៊ីហេង, ឡាំ ឆាយគីម ជាតំណាងសមាគម ចិនហុកគៀនដែរ… តែមិនអាចទាក់ទង បាននៅឡើយទេ ។
សូមមើល៍ ! ពាក្យស្នើសុំអន្តរាគមន៍ គោរពចូលទៅ សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា និងដីកាបញ្ជូនទាំង ០២ របស់ឯកឧត្តម ហូ សិទ្ធី នាយកខុទ្ទកាល័យ សម្ដេចអគ្គមហា សេនាបតីតេជោហ៊ុន សែន ដូចខាងក្រោម៖
Recent Comments