ក្រុមឈ្មួញថ្មីៗនេះកំពុងឃុបឃិតពីមន្ត្រីកាប់បំផ្លាញព្រៃឈើយ៉ាងខ្លាំងនៅតាមតំបន់មួយចំនួនក្នុងខេត្តរតនគិរី ដូចជានៅតំបន់ ដែនជម្រកសត្វព្រៃលំផាត់ ក្នុងឧទ្យានជាតិវីរៈជ័យ និងតំបន់ព្រៃសហគមន៍មួយចំនួនទៀត ដោយឈ្មួញភាគច្រើនជ្រក ក្រោមស្លាកព្រៃសម្បុទានសេដ្ឋកិច្ច និងខ្លះទៀតអាងខ្សែអំណាចធំៗដែលជាមនុស្សមានឥទ្ធិពលក្នុងជួររដ្ឋាភិបាល ព្រមទាំង ឃុបឃិតលើការនាំចេញដោយមន្ត្រីគយចល័តជាដើម ។
ជាងនេះទៅទៀត បើទោះបីជាមានការបង្កើតក្រុមសមត្ថកិច្ចតាមដងផ្លូវយ៉ាងច្រើនស្អេកស្កះ យ៉ាងណាក៏ដោយ ក៏បទល្មើសព្រៃឈើហាក់ពុំមានការថមថយនោះទេ គឺដោយសារតែសមត្ថកិច្ចដែលប្រចាំការនៅតាមដងផ្លូវទាំងនោះ គឺឈរចាំរាប់ក្បាលឡានដឹកឈើយកលុយប៉ុណ្ណោះមិនមែនឈរចាំបង្ក្រាបបទល្មើសនោះទេ។ ជាក់ស្តែងដូចជា ក្រុមប៉ូលិស សេដ្ឋកិច្ច និងមេគយចល័តខេត្តរតនគីរីជាដើម ។
យោងករណីជាក់ស្តែងកាលពីយប់ថ្ងៃទី២០ ខែមិថុនា ឆ្នាំ២០១៥នោះដែលគេឃើញក្រុមគយចល័តមួយក្រុម ដែលប្រចាំការ នៅស្រុកអូរយ៉ាដាវ និងក្រុមប៉ូលិសសេដ្ឋកិច្ច បានធ្វើការបង្ក្រាបរថយន្តដឹកឈើមួយគ្រឿង នៅកំណាត់ផ្លូវជាតិលេខ៧៨ ដែលបើកបរក្នុងទិសដៅពីលិចទៅកើត ដែលបម្រុងលោតឆ័ត្រទៅប្រទេសយួន។
តាមប្រភពបានឱ្យដឹងថា រថយន្តដែលត្រូវបង្ក្រាបនោះមានម៉ាក ឡិចស៊ីស RX300 មានផ្ទុកឈើប្រណីតពេញ ក្នុងបំណងដឹកយកទៅលក់នៅប្រទេសយួន ប៉ុន្តែត្រូវបានសមត្ថកិច្ចបង្ក្រាបបានមុន។ ប៉ុន្តែអ្វីដែលធ្វើឱ្យមជ្ឈដ្ឋានទូទៅ មានការងឿងឆ្ងល់នោះ គឺក្រុមសមត្ថកិច្ចគយចល័តដែលបង្ក្រាបរថយន្តដឹកឈើខុសច្បាប់នោះ ហាក់មានបំណងលាក់បាំងព័ត៌មានមិនឱ្យខ្ចរខ្ចាយទៅខាងក្រៅ ហើយវត្ថុតាងដែលបង្ក្រាបបាន ក៏មិនបានធ្វើរបាយការណ៍បញ្ជូនមកថ្នាក់លើ ឬសមត្ថកិច្ចពាក់ព័ន្ធនោះដែរ ដែលបញ្ហានេះ ធ្វើឱ្យគេសង្ស័យថា ប្រហែលជាក្រុមសមត្ថកិច្ចគយ និងប៉ូលិសសេដ្ឋកិច្ចនោះតាមបង្ក្រាបគោះចំពោះរថយន្តបទល្មើសដែលពុំព្រមចូលបង់លុយ ដើម្បីដាក់ខែ ។
គួរបញ្ជាក់ផងដែរថា ជារឿយគេបានឃើញក្បួនរថយន្តដឹកឈើខុសច្បាប់ទាំងតូចទាំងធំតែងតែចូលបង់លុយជើង និងលុយខែ ជាមុនពេលបម្រុងយកទៅលក់នៅប្រទេសយួនខាងលើនេះ គឺបើកបរនៅតាមផ្លូវជាតិយ៉ាងរលូន ដោយពុំមានសមត្ថកិច្ចណា ហ៊ានប៉ះពាល់នោះទេ ។
ផ្ទុយទៅវិញ ក្រុមគយចល័ត គឺជាចេតនា និងប៉ូលិសសេដ្ឋកិច្ចក្រសួងដែលបង្ក្រាបឈើលើកនេះបញ្ចោញសាច់ដុំ គោះចេញមុខ បង្ក្រាបឱ្យឈ្មួញមានអំណាចខ្លបខ្លាច និងចូលបង់លុយ ប៉ុន្តែករណីបង្ក្រាបឈើខាងលើនេះ ហាក់ស្ថិតនៅក្នុងភាពអាថ៍កំបាំង នៅឡើយ ដោយគេមិនដឹងថា បច្ចុប្បន្ននេះទាំងរថយន្ត និងឈើ ត្រូវសមត្ថកិច្ចគយយកទៅរក្សាទុកនៅទីណានោះទេ ឬក៏វត្ថុតាងទាំងនោះត្រូវបានគេដោះលែងឱ្យបន្តដំណើរទៅមុខបាត់ទៅហើយ? ក៏អាចថាបាន ។ ហើយដែលបញ្ហានេះ ក៏មានការលើកឡើងពីក្រុមអាជ្ញាធរឱ្យលោកអគ្គស្នងការនគរបាលជាតិ និងអគ្គនាយកគយ និងរដ្ឋាករ គួរតែពិនិត្យ និងតាមដានក្រុមជំនាញមន្ត្រីតាមគោលដៅមួយចំនួនដែលឃុបឃិតខូចផង ។ ព្រោះថាសមត្ថកិច្ចទាំងពីរនេះ គឺត្រូវដងត្រូវផ្លែ គ្នាគៃបំបាត់ពន្ធរដ្ឋយ៉ាងរលូនបំផុត មិនគួរថ្នាក់លើមើលរំលងនោះទេ ។/ ដោយៈ ស្ទាំងស
Recent Comments