ប្រជាពលរដ្ឋស្រុកគិរីវង់ ខេត្តាកែវ ដែលរស់នៅក្បែរច្រកទ្វារព្រំដែនអន្តរជាតិភ្នំដិន ខេត្តតាកែវ បានបង្ហើបថា ទំនិញនាំចូលពីប្រទេសយួន មាន អង្ករ គ្រឿងឧបភោគ-បរិភោគ បន្លែ ដែក និងទំនិញមួយចំនួនទៀត។ ចំណែកទំនិញដែលនាំពីប្រទេសកម្ពុជាចូលទៅប្រទេសយួនគឺមានតិចតួចហើយការប្រមូលពន្ធនាំចេញនេះក៏បានតិចតួចដែរ។ ប្រភពដដែល បានបញ្ជាក់ថា ទំនិញដែលនាំពីប្រទេសយួនចូលប្រទេសកម្ពុជា ភាគច្រើនមានការបង់ពន្ធត្រឹមត្រូវ តែក៏មានការឃុបឃិតនាំចូលទំនិញគេចពន្ធផងដែរ ដូច្នេះប្រសិនបើមន្ត្រីជំនាញ ពិសេសមន្ត្រីបម្រើការងារនៅការិយាល័យ គយ និងរដ្ឋាករច្រកទ្វារព្រំដែនអន្តរជាតិភ្នំដិនប្រមូលពន្ធរដ្ឋឲ្យបានត្រឹមត្រូវ នោះចំណូលពន្ធរដ្ឋអាចមានចំនួនច្រើនជាង១លាន៧សែនដុល្លារក្នុងអំឡុងពេល៧ខែដើមឆ្នាំនេះ។
គួរបញ្ជាក់ថា នគរបាលអន្តោប្រវេសន៍ នៅច្រកទ្វារព្រំដែនភ្នំដិន ត្រូវបានប្រជាពលរដ្ឋមូលដ្ឋានរិះគន់ថា បានដើរយកលុយតាំងពីទូក និងឡានដឹកស្រូវ មិនថា របស់ប្រជាពលរដ្ឋខ្មែរ ឬប្រជាពលរដ្ឋយួនឡើយ បូករួមទាំងបណ្ដោយឲ្យក្រុមឈ្មួញ នាំចូលទំនិញគេចពន្ធពីប្រទេសយួនមកកម្ពុជា ដោយគ្មានការត្រួតពិនិត្យត្រឹមត្រូវនោះទេ។ ប្រភពដដែលបានបញ្ជាក់ថា ឲ្យតែក្រុមឈ្មួញទាំងនោះ បង់លុយឲ្យគ្រប់ មន្ត្រីដែលឈរជើងនៅច្រកភ្នំដិន មិនខ្វល់ពីគុណភាពទំនិញឡើយ។
ជុំវិញបញ្ហានេះ ប្រជាពលរដ្ឋស្រុកគិរីវង់ បានសំណូមពរដល់អាជ្ញាធរខេត្តាកែវ ពិសេសលោក ឡាយ វណ្ណៈ មិនគួររក្សាភាពស្ងប់ស្ងាត់បន្តទៀតនោះទេ គឺមេត្តាត្រួតពិនិត្យភាពមិនប្រក្រតីទាំងនេះឡើងវិញ ៕
Recent Comments