ប្រភពពីមន្ត្រីនគរបាលអន្តោប្រវេសន៍ច្រកអន្តរជាតិចាំយាម ដែលស្អប់ខ្ពើមអំពើពុករលួយរបស់លោក កៅ សារ៉ាណា បានឲ្យដឹងថាលោក កៅ សារ៉ាណា កំពុងប្រើប្រាស់អំណាចនិងតួនាទីដើម្បីប្រមូលលុយធ្វើមានធ្វើបានស៊ីចាយហ៊ឺហា មិនខ្វល់ពីទុក្ខលំបាករបស់កូនចៅក្រោមឱវាទឡើយ។ លោក កៅ សារ៉ាណា ដែលទទួលបានតំណែងជាមេប៉ុស្តិ៍ច្រកចាំយាម ដោយសារអំណាចឪពុករបស់ខ្លួននោះ គ្មានសមត្ថភាពអ្វីដើម្បីធ្វើការងារទេ គឺចេះត្រឹមតែប្រើអំណាចគំរាមកំហែងកូនចៅក្រោមឱវាទឲ្យប្រមូលផលប្រយោជន៍សម្រាប់ខ្លួន។ បញ្ហានេះលោក នេត សាវឿន អគ្គស្នងការនគរបាលជាតិ មិនត្រូវមើលរំលងតទៅទៀតទេ ព្រោះពីមួយថ្ងៃទៅមួយថ្ងៃលោក កៅ សារ៉ាណា ប្រព្រឹត្តអំពើពុករលួយកាន់តែខ្លាំងឡើងៗ ហើយកំណត់ឲ្យកូនចៅរកចំណូលឲ្យខ្លួនក្នុងមួយខែជាង១ម៉ឺនដុល្លារ? ។
មន្ត្រីនគរបាលអន្តោប្រវេសន៍ច្រកចាំយាម បានបើកកកាយរឿងអាស្រូវពុករលួយរបស់លោក កៅ សារ៉ាណា ដែលជាចៅហ្វាយនាយរបស់ខ្លួនជាបន្តបន្ទាប់ ដើម្បីឲ្យថ្នាក់ដឹកនាំក្រសួងមហាផ្ទៃនិងអគ្គស្នងការនគរបាលជាតដឹងឮជាសាធារណៈ។ ក៏ប៉ុន្តែរហូតមកដល់ពេលនេះមិនទាន់ឃើញមន្ត្រីជាន់ខ្ពស់ក្រសួងមហាផ្ទៃនិងថ្នាក់ដឹកនាំនៃអគ្គស្នងការដ្ឋាននគរបាលជាតិ ចាត់វិធានការទៅលើមន្ត្រីខិលខូចពុករលួយដូចជាលោក កៅ សារ៉ាណា ។ ប្រការនេះហើយដែលលោក កៅ សារ៉ាណា អាងមានឪពុកខ្លួនជាខ្នងបង្អែក បន្តប្រព្រឹត្តអំពើពុករលួយកាន់តែខ្លាំង ហើយស៊ីដាច់លុយកូនចៅក្រោមឱវាទដោយគ្មានញញើតអ្វីទាំងអស់។
ប្រភពបានឲ្យដឹងថា សូម្បីតែលុយប្រថាប់ត្រាក៏លោក កៅ សារ៉ាណា កំណត់ឲ្យកូនចៅរកឲ្យបាន៤៣ម៉ឺនរៀលក្នុងមួយថ្ងៃសម្រាប់ខ្លួនយកទៅស៊ីចាយសប្បាយហ៊ឺហាក្នុងហាងខារ៉ាអូខេយ៉ាងសម្បាយម៉ាអស់ដៃ ។ ក្រៅពីលុយជាង១ម៉ឺនដុល្លារដែលលោក កៅ សារ៉ាណា តម្រូវឲ្យកូនចៅបង់ជូនខ្លួននោះ គឺបុគ្គលនេះទទួលបានផលប្រយោជន៍យ៉ាងច្រើនពីក្រុមឈ្មួញនាំចូលទំនិញគេចពន្ធ និងទំនិញខុសច្បាប់ផងដែរ។ អំពើពុករលួយរបស់លោក កៅ សារ៉ាណា កំពុងធ្វើឲ្យប៉ះពាល់ដល់ស្ថាប័ននគរបាលជាតិទាំងមូល ដូច្នេះថ្នាក់ដឹកនាំក្រសួងមហាផ្ទៃនិងលោក នេត សាវឿន អគ្គស្នងការនគរបាលជាតិត្រូវចាត់វិធានការព្រមានជាបន្ទាន់បំផុត៕
Recent Comments