ប្រភពបានឲ្យដឹងទៀតថា នៅវេលាចាប់ពីម៉ោង១១យប់ទៅម៉ោង១ឬម៉ោង២រំលងអធ្រាត្រ រថយន្តដឹកទំនិញធំៗជាច្រើនគ្រឿង បានធ្វើឲ្យមានឮសំឡេងខ្លាំងៗប៉ះពាល់ដល់ការសម្រាកនៅពេលយប់របស់ពួកគាត់។ រថយន្តទាំងនោះដឹកទំនិញជាប្រភេទសម្លៀកបំពាក់ទៅស្តុកទុកក្នុងឃ្លាំងមួយនៅក្បែរច្រកគីឡូ៩ ហើយព្រឹកឡើងទើបគេដឹកទៅប្រទេសសៀមតាមច្រកនេះ។ ម្ចាស់ទំនិញត្រូវបានគេដឹងថាឈ្មោះ យក្ស ដែលមានទំនាក់ទំនងជាមួយសមត្ថកិច្ចនគរបាលវរការពារព្រំដែនលេខ៨១៧ និងយោធាស្រុកសំពៅលូន ទើបអាចដឹកទំនិញចូលប្រទេសសៀម និងដឹកទំនិញពីប្រទេសសៀមចូលទឹកដីខ្មែរស្រេចតែអំពើចិត្ត។
ប្រភពពីប្រជាពលរដ្ឋភូមិល្វា បានឲ្យដឹងថាសកម្មភាពនាំចូលទំនិញគេចពន្ធនិងទំនិញខុសច្បាប់តាមច្រកនេះ កើតឡើងជាច្រើនឆ្នាំមកហើយមិនឃើញសមត្ថកិច្ចស្ថាប័នពាក់ព័ន្ធណា ចាត់វិធានការទប់ស្កាត់នោះទេ។ បញ្ហានេះលោក ច័ន្ទ សុផល អភិបាលខេត្តបាត់ដំបង និងលោក ស ថេត ស្នងការនគរបាលខេត្តបាត់ដំបង ត្រូវពិនិត្យមើលនិងចាត់វិធានការទប់ស្កាត់ជាបន្ទាន់។
ថ្មីៗនេះប្រជាពលរដ្ឋរស់នៅក្បែរច្រករបៀងគីឡូ៩ ហៅច្រកដើមអម្ពិលក្នុងភូមិល្វា ឃុំជ្រៃសីមា បានឲ្យដឹងថារថយន្តដឹកទំនិញធំៗបានបង្កកផលប៉ះពាល់ដល់ការរស់នៅរបស់ពួកគាត់គួរឲ្យព្រួយបារម្ភ ជាពិសេសប៉ះពាល់ដំណេកនៅពេលយប់។ សមត្ថកិច្ចច្រករបៀងគីឡូ៩ត្រូវបានគេដឹងថា ឃុបឃិតបើកដៃឲ្យឈ្មួញនាំទំនិញផ្សេងៗចូលប្រទេសសៀមតាមច្រកនេះ ជាថ្នូរនឹងផលប្រយោជន៍ហើយក៏មានការឃុបឃិតឲ្យឈ្មួញនាំទំនិញគេចពន្ធ និងទំនិញខុសច្បាប់ពីទឹកដីសៀមចូលតាមច្រកនេះយ៉ាងពេញបន្ទុកដែរ។ សេចក្ដីរាយការណ៍ពីប្រជាពលរដ្ឋនៅតំបន់ច្រករបៀងដើមអម្ពិលបានឲ្យដឹងទៀតថា ឈ្មួញខិលខូចមិនត្រឹមតែអាចនាំសម្លៀកបំពាក់ចូលទឹកដីសៀមប៉ុណ្ណោះទេ គឺថែមទាំងដឹកជញ្ជូនឈើប្រណីតចេញទៅស្រុកសៀមយ៉ាងរលូនផងដែរ។ មេប៉ុស្តិ៍ច្រករបៀងឈ្មោះ អួន ខុន ត្រូវបានគេដឹងថាទទួលបានផលប្រយោជន៍យ៉ាងច្រើនពីបទល្មើសនៃច្រកនេះ ហើយសមត្ថកិច្ចពាក់ព័ន្ធដទៃទៀតក៏ទទួលបានផលប្រយោជន៍ជាប្រចាំដែរ៕
Recent Comments