រតនៈគីរី ៖ ល្បីមេឈ្មួញឈើដុះស្លែម្នាក់ប្រចាំខេត្តរតនៈគីរី ឈ្មោះ ចែរ៉ាន់ កំពុងមមាញឹកធ្វើសកម្មភាពដឹកជញ្ជូន បទល្មើស ឈើជារៀងរាល់ថ្ងៃ ដោយពុំមានសមត្ថកិច្ចពាក់ព័ន្ធណា ចេញមុខមកបង្ក្រាបនោះទេ រហូតដល់មានការបោះពាក្យ សម្តីពី ប្រជាពលរដ្ឋនៅតំបន់នោះថា មន្ត្រីនគរបាលប្រឆាំងបទល្មើសសេដ្ឋកិច្ចខេត្ត ត្រូវ ចែរ៉ាន់ គប់លុយដាក់មុខរហូត ដល់ងងឹតបើក ភ្នែកលែងរួច ។
តាមប្រជាពលរដ្ឋដែលឃើញហេតុការណ៍ជាក់ស្តែងបានឱ្យដឹងថា កាលពីវេលាម៉ោង ៥ និង១៥នាទីល្ងាច ថ្ងៃទី ១០ ខែមិថុនា ឆ្នាំ២០១៥ នៅចំណុចផ្លូវទៅកាន់សាលាឯកជនគ្រូយើង ស្ថិតក្នុងភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនៈគីរី គេឃើញមន្ត្រីប៉ូលិសប្រឆាំងបទល្មើសសេដ្ឋកិច្ចបានប្រទះឃើញឈើល្មើសច្បាប់នៅលើរថយន្ត និងនៅក្នុងផ្ទះ របស់ឈ្មួញ ចែរ៉ាន់ នោះ តែបែរជាគេចវេសមិនបង្ក្រាប និងចាត់វិធានការទៅតាមផ្លូវច្បាប់នោះទេ ប្រហែលជា បានទទួលសំណូកយ៉ាងពេញចិត្តពី សំណាក់ ចែរ៉ាន់ នេះជាប្រចាំហើយក៏អាច ។
បើយោងតាមសេចក្តីរាយការណ៍បានឱ្យដឹងថា ឈ្មួញចែរ៉ាន់ នេះល្បីខាងរកស៊ីដឹកឈើអនាធិបតេយ្យទៅលក់នៅ ប្រទេសយួនជាច្រើនឆ្នាំមកហើយ ដោយដឹកជញ្ជូនតាមបណ្តោយផ្លូវលេខ ៧៨ តាមរថយន្តចំនួន ២គ្រឿង ក្នុងនោះមួយ គ្រឿង ម៉ាកស៊ាំយ៉ុង ពណ៌ ស ពាក់ស្លាកលេខ ៧២២៥ និងមួយគ្រឿងទៀតគ្មានស្លាកលេខ ហើយធ្វើការដឹកជញ្ជូនឈើ ប្រណីតជារៀងរាល់ថ្ងៃ ហើយដោយសារតែ ចែរ៉ាន់ បង់លុយឱ្យសមត្ថកិច្ចគ្រប់ស្ថាប័ន ទើបគាត់អាចរកស៊ីបានយ៉ាងរលូន រហូតមកដល់សព្វថ្ងៃដោយគ្មានការបង្ក្រាបនោះ ។
មិនតែប៉ុណ្ណោះជាក់ស្តែងកាលពីថ្ងៃទី ១០ ខែមិថុនា ឆ្នាំ២០១៥ ក្រោយពីទទួលបានសេចក្តីរាយការណ៍ពីប្រជាពល រដ្ឋថា មានឈើស្តុកទុកក្នុងផ្ទះរបស់ ចែរ៉ាន់ និងនៅលើរថយន្តទៀតនោះ លោកវរៈសេនីយ៍ នូវ្វ ដារ៉ា ប្រធានការិយាល័យ កណ្តាលប្រឆាំងបទល្មើសសេដ្ឋកិច្ចខេត្ត បានបញ្ជាឱ្យលោក ឈៀង សុភ័ក្រ មន្ត្រីនគរបាលប្រឆាំងបទល្មើសសេដ្ឋកិច្ច ចុះមកបង្ក្រាប ប៉ុន្តែក្រោយពីបានឃើញវត្ថុតាងដូចការរាយការណ៍របស់ប្រជាពលរដ្ឋហើយ បែរជាដកខ្លួន មិន បង្ក្រាប និងចាត់វិធានការតាមនីតិវិធីឡើយ ជាហេតុដែលបណ្តាលឱ្យប្រជាពលរដ្ឋដែលខំរាយការណ៍មានការ ស្រងាកចិត្តយ៉ាងខ្លាំង និងបានខ្សឹបខ្សៀវគ្នាថា “ពួកហ្នឹងស៊ីលុយ និងបង់ខែឱ្យជាប្រចាំនោះង ទើបគ្មានការបង្ក្រាបនោះ” ។/ ដោយ ៖ រាជសីហ៍
Recent Comments