ប្រភពពីសមត្ថកិច្ចពាក់ព័ន្ធមួយចំនួនបានឲ្យដឹងថា ឈើប្រណីតក្នុងឧទ្យានជាតិវីរៈជ័យ តំបន់អភិរក្សជីវៈចម្រុះ ព្រៃការពារ និងព្រៃដែនជម្រកសត្វ ក្នុងខេត្តទាំង៤ខាងលើចៀសមិនផុតពីរលាយសាបសូន្យ ដោយសារស្នាដៃមេឈ្មួញ សឹង សំអុល នោះទេ។ ជាក់ស្ដែងរថយន្តដែលក្រឡាបនៅចំណុចភ្នំព្រេច ហើយសារព័ត៌មាននានា យកមកចុះផ្សាយនៅថ្ងៃទី២២ ខែកក្កដា ឆ្នាំ២០១៥ នេះគឺមានដឹកឈើប្រណីតរាប់រយម៉ែត្រគូបទៅលក់នៅស្រុកយួន។ ដូច្នេះក្រសួង និងស្ថាប័នពាក់ព័ន្ធត្រូវចាត់វិធានការទប់ស្កាត់បទល្មើសរបស់មេឈ្មួញ សឹង សំអុល ជាបន្ទាន់ព្រោះមេឈ្មួញរូបនេះកំពុងបង្កមហន្តរាយព្រៃឈើនៅក្នុងខេត្តក្រចេះ ស្ទឹងត្រែង រតនគិរី និងមណ្ឌលគិរី យ៉ាងគឃ្លើន។
ប្រភពពីឈ្មញមួយចំនួនបានឲ្យដឹងថា មេឈ្មួញ សឹង សំអុល មានជាប់ពាក់ព័ន្ធយ៉ាងជ្រៅក្នុងការបំផ្លាញព្រៃឈើនៅឧទ្យានជាតិវីរៈជ័យ ហើយដឹកជញ្ជូនឆ្លងកាត់ទឹកដីខេត្តរតនគិរី និងខេត្តក្រចេះ យកទៅលក់នៅស្រុកយួន យ៉ាងរលូន។ សមត្ថកិច្ចតាមដងផ្លូវមិនដែលហ៊ានបង្ក្រាបរថយន្តដឹកឈើរបស់មេឈ្មួញ សឹង សំអុល ម្ដងណាឡើយព្រោះមេឈ្មួញរូបនេះចេះបែងចែកផលប្រយោជន៍ ដល់សមត្ថកិច្ចតាមដងផ្លូវដើម្បីឲ្យមុខជំនួញរបស់ខ្លួនប្រព្រឹត្តទៅយ៉ាងរលូន។ ប្រការនេះធ្វើឲ្យឈើប្រណីត និងឈើប្រភេទលេខ១ ក្នុងឧទ្យានជាតិវីរៈជ័យ ក៏ដូចជាព្រៃការពារក្នុងខេត្តមណ្ឌលគិរី ត្រូវប្រឈមនឹងការកាប់បំផ្លាញយ៉ាងពេញបន្ទុក ដោយមានការបើកដៃពីសមត្ថកិច្ចពាក់ព័ន្ធ។
ថ្មីៗនេះរថយន្តយីឌុបចំណុះជាង១០០តោនដែលដឹកឈើខុសច្បាប់របស់មេឈ្មួញ សឹង សំអុល បានក្រឡាប់ធ្លាក់ឈើចេញរាប់រយម៉ែត្រគូបនៅចំណុចភ្នំព្រេច ឃុំឃ្សឹម ស្រុកស្នួល ខេត្តក្រចេះ តាមផ្លូវជាតិលេខ៨ ហើយគ្មានសមត្ថកិច្ចណាហ៊ាននិយាយអ្វីទាំងអស់។ រថយន្តដែលក្រឡាប់នោះ គឺជារថយន្តមួយក្នុងចំណោមរថយន្តជាច្រើនគ្រឿងទៀតដែលមេឈ្មួញ សឹង សំអុល ដឹកឈើទៅលក់នៅស្រុកយួន យ៉ាងពេញបន្ទុក។ ឈើដែលមេឈ្មួញ សឹង សំអុល ដឹកជញ្ជូនទៅស្រុកយួននោះត្រូវបានគេកាប់នៅក្នុងឧទ្យានជាតិ តំបន់អភិរក្សជីវៈចម្រុះ និងតំបន់ដែនជម្រកសត្វនៃខេត្តរតនគិរី មណ្ឌលគិរី ក្រចេះ និងស្ទឹងត្រែង ៕
Recent Comments