ប្រជាពលរដ្ឋរស់នៅ ឃុំគោកមៀត ស្រុកថ្មពួក ខេត្តបន្ទាយមានជ័យ បានអះអាងថា ក្រៅពីកសិផលដែលនាំចេញទៅលក់នៅប្រទេសសៀម សូម្បីតែទំនិញបន្តិចបន្តួចដែលប្រជាពលរដ្ឋ ទៅទិញពីប្រទេសសៀមយកមកលក់នៅតាមផ្ទះ ក៏ត្រូវតែបង់លុយដែរ បើមិនព្រមបង់លុយដូចការកំណត់ខាងលើ នោះមន្ត្រីខិលខូចនឹងឃាត់រថយន្តមិនឲ្យទៅណាឡើយ ។ ប្រជាពលរដ្ឋបានបញ្ជាក់ថា បើរថយន្តកាមរីដឹកទំនិញគេចពន្ធដូចជា ហ្គាស សាំង ទំនិញចាប់ហួយ និងទំនិញគេចពន្ធ ជាច្រើនទៀតដែលបានបង់លុយជូនមន្ត្រីគយរួចរាល់ គឺអាចឆ្លងដែនបានយ៉ាងស្រួលហើយមានអ្នកចាំបើកបារ៉ាសឲទៀតផង ។
ឈ្មួញខ្មែរនាំស្រូវចេញទៅលក់ឲ្យឈ្មួញសៀម តាមច្រករបៀងជាច្រើនរូបបានរិះគន់ដូចៗគ្នាថា មេគយច្រកតំបន់បឹងត្រកួន បានប្រើមនុស្សមិនមែនជាមន្ត្រីគយចាំស្ទាក់យកលុយពីរថយន្តដែលដឹកទំនិញកសិផលដូចជា ស្រូវ ដំឡូង តាមរយៈការដាក់កុងត្រូលជជុះមួយកន្លែងដែលនៅឆ្ងាយពីមាត់ច្រកទ្វារតំបន់បឹងត្រកួន ក្នុងឃុំគោកមៀត ស្រុកថ្មពួក ខេត្តបន្ទាយមានជ័យ។ ប្រភពបាន ឲដឹងថាសម្រាប់ករណីដែលបានរៀបរាប់នេះ ក្នុងមួយរថយន្តយីឌុប ត្រូវបង់លុយជូនមន្ត្រីគយតាមរយៈចៃគយដែលប្រចាំការនៅទីនោះ ៥០០បាត ឬ៥ម៉ឺនរៀល ចំណែករថយន្តកង់៦ គឺបង់៣ម៉ឺនរៀល ហើយបើឈ្មួញមិនបង់ មន្ត្រីគយនឹងបង្កបញ្ហាមិនឲ្យរថយន្តចេញរួចនោះឡើយ។
ជុំវិញបញ្ហានេះ ប្រធានការរិយាល័យគយច្រកទ្វារតំបន់បឹងត្រកួន លោក ឡាំ ប៊ុនថន ត្រូវបានប្រជាពលរដ្ឋបញ្ជាក់ថា គឺអ្នកនៅពីក្រោយការដាក់ប៉ុស្តិ៍ជជុះ តាមផ្លូវដែលមិនមែននៅមាត់ច្រកយកលុយពីឈ្មួញដឹកកសិផលនាំចេញទៅលក់នៅប្រទេសសៀម តាមច្រករបៀង ក្នុងភូមិសាស្ត្រស្រុកថ្មពួក ខេត្តបន្ទាយមានជ័យ ។ ប្រភពដដែលបានបញ្ជាក់ថា ទីតាំងដែលគយច្រកទ្វារតំបន់បឹងត្រកួនដាក់ប៉ុស្តិ៍ចាំយកលុយពីឈ្មួញនាំចេញនាំចូលទំនិញគេចពន្ធ ឬក៏កសិផលឆ្លងដែនរវាងប្រទេសកម្ពុជា និងប្រទេសសៀម គឺស្ថិតនៅតាមផ្លូវទៅកាន់ច្រកបឹងត្រកួនក្នុង ឃុំគោករមៀត ស្រុកថ្មពួក ខេត្តបន្ទាយមានជ័យ មានចម្ងាយពីច្រកបឹងត្រកួនប្រមាណជា៦គីឡូម៉ែត្រ៕
Recent Comments