ប្រជាពលរដ្ឋ បានឲ្យដឹងថានៅពេល មេឃរាំងផ្លូវក្នុងភូមិរបស់ ពួកគាត់ហុយសំពោង ចូលភ្នែកចូលច្រមុះ អ្នកធ្វើដំណើរតាម ផ្លូវដកដង្ហើមមិនរួច ហើយពេលភ្លៀងផ្លូវមាន សភាពរអិលពិបាកជិះកង់ ម៉ូតូខ្លាំងណាស់។ ឥឡូវនេះពួកគាត់មិនហ៊ាន បណ្តោយឲ្យកូនចៅតូចៗ ជិះកង់ឬដើរទៅរៀនដោយ ខ្លួនឯងទៀតទេ ព្រោះខ្លាចរថយន្ត ដឹកខ្សាច់បង្កគ្រោះថ្នាក់ចរាចរណ៍ នៅតាមផ្លូវ។ រថយន្តដឹកខ្សាច់ធំៗ មិនត្រឹមតែមានសំឡេង រំខានដល់ប្រជាពលរដ្ឋ ទាំងយប់ទាំងថ្ងៃ ប៉ុណ្ណោះទេ គឺថែមទាំង បើកបរក្នុងល្បឿនលឿនៗ លើផ្លូវក្នុងភូមិរហូតដល់ ប្រជាពលរដ្ឋភាគច្រើនសុខចិត្តជូនកូនចៅទៅសាលារៀនទាំងព្រឹកទាំងល្ងាចដើម្បីកុំឲ្យមានគ្រោះថ្នាក់ដោយសារតែរថយន្តដឹកខ្សាច់យ៉ាងអនាធិបតេយ្យ។
ប្រជាពលរដ្ឋរស់នៅតាមបណ្តាភូមិនា ក្នុងឃុំរលាំងកែន ស្រុកកណ្តាលស្ទឹង ខេត្តកណ្តាល បានឲ្យដឹងថាអាជីវកម្មខ្សាច់របស់ឈ្មួញ២ក្រុមកំពុងតែបំផ្លាញផ្លូវថ្នល់ក្នុងមូលដ្ឋាន ហើយបង្កផលប៉ះពាល់ដល់ការរស់នៅរបស់ពួកគាត់យ៉ាអពេញបន្ទុក។ ប្រជាពលរដ្ឋបានឲ្យដឹងថា រណ្តៅកើបខ្សាច់ទាំង២កន្លែងនោះក្បែរសាលាបឋមសិក្សាពោធិ៍ព្រឹក ហើយកំពុងធ្វើសកម្មភាព បូមខ្សាច់កើបខ្សាច់ ដឹកជញ្ជូនតាមរថយន្តធំៗទាំងយប់ទាំងថ្ងៃ ស្ទើរខូចផ្លូវក្នុងភូមិអស់ទៅហើយ។ ប្រជាពលរដ្ឋបានអំពាវនាវឲ្យអាជ្ញាធរខេត្តកណ្តាលនិងក្រសួងពាក់ព័ន្ធជួយដោះស្រាយជាបន្ទាន់ព្រោះម្ចាស់ទីតាំងបូមខ្សាច់កើបខ្សាច់ គិតតែពីផលប្រយោជន៍ផ្ទាល់ខ្លួន ធ្វើឲ្យផ្លូវជាច្រើនខ្សែក្នុងឃុំរលាំងកែន ខូចខាតស្ទើរតែធ្វើដំណើរលែងកើត។
ម្ចាស់ការដ្ឋានបូមខ្សាច់ទាំង២កន្លែងដែលកំពុងធ្វើឲ្យប៉ះពាល់ដល់ការរស់នៅរបស់ប្រជាពលរដ្ឋក្នុងឃុំរលាំងកែន ស្រុកកណ្តាលស្ទឹងនោះ គឺទី១-ឈ្មោះ តាឡាយ ធ្វើសកម្មភាពបូមខ្សាច់ជាប់សាលាពោធិ៍ព្រឹក ដាក់ម៉ាស៊ីនបូមខ្សាច់នៅប៉ែកខាងលិចឆៀងខាងត្បូងធ្វើឲ្យសំឡេងម៉ាស៊ីនខ្ទ័រដល់ក្នុងសាលារៀន។ទី២-ឈ្មោះ តាប៊ុន ដាក់ម៉ាស៊ីនបូមខ្សាច់នៅប៉ែកខាងត្បូងសាលារៀន ធ្វើឲ្យមានសំឡេងរំខានដល់ការរៀនសូត្ររបស់សិស្សក្នុងសាលាពោធិ៍ព្រឹកយ៉ាងពេញបន្ទុកតែម្តង។ បញ្ហានេះអាជ្ញាធរស្រុកកណ្តាលស្ទឹង និងអាជ្ញាធរខេត្តកណ្តាល ត្រូវចាត់វិធានការលើឈ្មួញបូមខ្សាច់ឈ្មោះ តាឡាយ និងឈ្មោះ តាប៊ុន ជាបន្ទាន់ព្រោះពួកគេកំពុងបំផ្លាញផ្លូវក្នុងឃុំរលាំងកែន ឲ្យរលត់រលាយ និងធ្វើឲ្យប៉ះពាល់យ៉ាងខ្លាំងដល់ការរស់នៅរបស់ប្រជាពលរដ្ឋ ក៏ដូចជាការរៀនសូត្ររបស់សិស្សសាលាបឋមសិក្សាពោធិ៍ព្រឹកទាំងមូល៕
Recent Comments