ប្រភពពីមន្ត្រីនគរបាលនៃស្នងការដ្ឋាននគរបាលខេត្តកោះកុង បានឲ្យដឹងថា អ្នកស្រី ពែក រតនៈ ហៅចែណាក់ ភរិយាលោក យឹម ផេង បានរកស៊ីនាំទំនិញគេចពន្ធចូលតាមច្រកប៉ាក់ខ្លងយ៉ាងរលូនគ្មានសមត្ថកិច្ចណាបង្ក្រាបនោះទេ ព្រោះលោក យឹម ផេង តែងតែចេញមុខកាងប្រពន្ធខ្លួនជាប្រចាំ។ ប្រភពបានឲ្យដឹងទៀតថា សមត្ថកិច្ចពាក់ព័ន្ធដូចជា គយ និងនគរបាលបង្ក្រាបបទល្មើសសេដ្ឋកិច្ច ពីក្រសួងមហាផ្ទៃតែងតែទទួលផលប្រយោជន៍ពីចែណាក់ ទើបឈ្មួញរូបនេះអាចនាំចូលទំនិញគេចពន្ធតាមអំពើចិត្ត។ ទំនិញដែលចែណាក់នាំចូលមានដូចជា ប្រេងសាំង ទឹកក្រូច ស្រាបៀរ និងគ្រឿងចាប់ហួយ គ្រប់ប្រភេទដោយមានការឃុបឃិតបើកដៃពីសមត្ថកិច្ចពាក់ព័ន្ធគ្រប់ស្ថាប័ន។
ប្រជាពលរដ្ឋក្នុងខេត្តកោះកុងបានរិះគន់ថាលោក យឹម ផេង ស្នងការរងនគរបាលខេត្តទទួលបន្ទុកប្រឆាំងបទល្មើសសេដ្ឋកិច្ច បែរជាកាងប្រពន្ធរបស់ខ្លួនឲ្យនាំចូលទំនិញគេចពន្ធពីប្រទេសសៀមយ៉ាងពេញបន្ទុក ធ្វើឲ្យរដ្ឋខាតបង់ចំណូលពន្ធយ៉ាងច្រើនក្នុងមួយខែៗ។ លោក សំឃិត វៀន ស្នងការនគរបាលខេត្តកោះកុង ប្រហែលទទួលបានផលប្រយោជន៍ជាប្រចាំទើបបណ្ដោយឲ្យលោក យឹម ផេង យកតួនាទីជាស្នងការរងទទួលបន្ទុកប្រឆាំងបទល្មើសសេដ្ឋកិច្ច ទៅកាងប្រពន្ធរបស់ខ្លួនយ៉ាងក្រអឺតក្រទម។ ប្រជាពលរដ្ឋបានលើកឡើងថា ភរិយាលោក យឹម ផេង រកស៊ីនាំចូលទំនិញគេចពន្ធពីប្រទេសសៀមតាមច្រកប៉ាក់ខ្លង ជាយូរមកហើយមិនដែលឃើញសមត្ថកិច្ចពាក់ព័ន្ធណាចាត់វិធានការបង្ក្រាបនោះទេ ហើយសមត្ថកិច្ចបង្ក្រាបតែឈ្មួញតូចតាចដែលគ្មានខ្នងបង្អែកប៉ុណ្ណោះ។
សេចក្ដីរាយការណ៍ពីឈ្មួញតូចតាចមួយចំនួនបានឲ្យដឹងថា ប្រពន្ធលោក យឹម ផេង នាំទំនិញគេចពន្ធចូលតាមទូកហើយឡើងនៅផែព្រែកកោះប៉ោ ស្ថិតនៅក្នុងភូមិ២ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។ សមត្ថកិច្ចគយខេត្តកោះកុង និងគយចល័តតែងតែមើលរំលងការនាំចូលទំនិញគេចពន្ធរបស់ចែណាក់ បើទោះបីរថយន្តដឹកទំនិញចេញពីទូកបើកឆ្លងកាត់មុខស្នាក់ការគយខេត្តកោះកុងយ៉ាងណាក៏ដោយ។ បញ្ហានេះធ្វើឲ្យរដ្ឋខាតបង់ចំណូលពន្ធយ៉ាងច្រើនក្នុងមួយខែៗ ហើយផលប្រយោជន៍បានទៅលើប្រធានសាខាគយខេត្តកោះកុង ប្រធានការិយាល័យគយច្រកប៉ាក់ខ្លង និងសមត្ថកិច្ចពាក់ព័ន្ធជាអ្នក ឃុបឃិតគ្នាប្រព្រិត្តអំពើពុករលួយដោយសេរី ៕
Recent Comments