តាមប្រភព ពីមន្ត្រីយោធាជើងទឹក មួយចំនួនបានឲ្យដឹងថា ក្រៅពីយកនាវាចម្បាំង ទៅស៊ីឈ្នួលដឹកសម្ភារៈ សំណង់និង កម្មករទៅធ្វើការងារ នៅលើកោះក្របី គឺលោក ទៀ វិញ ថែមទាំង លក់នាវាចម្បាំងអស់ ជាច្រើនគ្រឿង ថែមទៀត ហើយ មិនដឹងថា យកលុយ ទៅណានោះឡើយ ។ ប្រភពបានឲ្យដឹងទៀតថា នាវាចម្បាំងទាំង នោះអាចយកទៅជួសជុល ប្រើប្រាស់ដើម្បីការពារ ដែនកោះ ដែនសមុទ្ររបស់ខ្មែរ ប៉ុន្តែលោក ទៀ វិញ បានយកទៅលក់ជាបន្តបន្ទាប់។ នាយទាហានជើងទឹកមួយចំនួនបានអំពាវនាវឲ្យនាយករដ្ឋមន្ត្រី ហ៊ុន សែន ចាត់វិធានការលើលោក ទៀ វិញ ជាបន្ទាន់បើមិនដូច្នេះទេ នាវាចម្បាំងដែលមានតម្លៃរាប់លានដុល្លារនឹងត្រូវលោក ទៀ វិញ យកទៅប្រើប្រាស់និងលក់ដើម្បីផលប្រយោជន៍ផ្ទាល់ខ្លួន ។
រឿងអាស្រូវរបស់លោក ទៀ វិញ មេបញ្ជាការកងទ័ពជើងទឹកដែលជាប្អូនបង្កើតរបស់លោក ទៀ បាញ់ រដ្ឋមន្ត្រីក្រសួងការពារជាតិត្រូវបានគេទម្លាយជាបន្តបន្ទាប់ដើម្បីឲ្យលោកនាយករដ្ឋមន្ត្រី ហ៊ុន សែន បានដឹងឮនូវរឿងទាំងអស់នោះ។ ជាក់ស្តែង ករណីកងទ័ពជើងទឹកមូលដ្ឋានបឹងទន្លេសាបយកនាវាទៅជួលឲ្យគេបើកលេងល្បែងមិនទាន់ត្រូវបានដោះស្រាយនៅឡើយ ស្រាប់តែលេចចេញករណីលោក ទៀ វិញ មេបញ្ជាការកងទ័ពជើងទឹកយកនាវាចម្បាំងដែលមានតម្លៃរាប់លានដុល្លារទៅស៊ីឈ្នួលដឹកសម្ភារៈសំណង់និងកម្មករទៅធ្វើការនៅលើកោះក្របីទៅវិញ។ បញ្ហានេះលោក ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ និងលោក ទៀ បាញ់ រដ្ឋមន្ត្រីក្រសួងការពារជាតិមិនត្រូវបណ្តែតបណ្តោយតទៅទៀតទេ គឺត្រូវតែមានវិធានការទប់ស្កាត់ឲ្យបានទាន់ពេលវេលា។
នាយទាហានជើងទឹកមួយចំនួនបានអះអាងថា ពួកគេមានការរន្ធត់ចិត្តយ៉ាងខ្លាំងនៅពេលដែលឃើញលោក ទៀ វិញ យកនាវាចម្បាំងទៅស៊ីឈ្នួលដឹកសម្ភារៈសំណង់និងកម្មករទៅធ្វើការនៅលើកោះក្របីដើម្បីផលប្រយោជន៍ផ្ទាល់ខ្លួន។ ជាងនេះទៅទៀត មានមនុស្សជិតស្និទ្ធនឹងលោក ទៀ វិញ មួយចំនួនហ៊ានយកនាវារបស់យោធាជើងទឹកទៅធ្វើជាកន្លែងលេងល្បែងស៊ីសងខុសច្បាប់ដោយគ្មានញញើតអ្វីទាំងអស់។ ដូច្នេះលោក ទៀ បាញ់ ដែលជារដ្ឋមន្ត្រីក្រសួងការពារជាតិនិងលោក ហ៊ុន សែន ជានាយករដ្ឋមន្ត្រីគួរតែមានវិធានការក្តៅព្រមានលោក ទៀ វិញ កុំឲ្យធ្វើអ្វីៗស្រេចតែអំពើចិត្តតទៅទៀត។ ជាងនេះទៅទៀត លោកនាយករដ្ឋមន្ត្រី ហ៊ុន សែន ក៏ត្រូវពិនិត្យមើលការដឹកនាំមិនប្រក្រតី បក្ខពួកនិយម គ្រួសារនិយមរបស់លោក ទៀ វិញ ផង ៕
Recent Comments