មន្ត្រីអង្គកា រក្រៅរដ្ឋាភិបាល និងអ្នកធ្លាប់ជាប់ ឃុំក្នុងពន្ធនាគារព្រៃស មួយចំនួនបាន អំពាវនាវឲ្យ លោក គុយ ប៊ុនសន អគ្គនាយក នៃអគ្គនាយកដ្ឋាន ពន្ធនាគារក្រសួង មហាផ្ទៃចាត់វិធាន ការទៅលើប្រធាន ពន្ធនាគារព្រៃស (ម១)លោក ស្រ៊ុន លាង ជាបន្ទាន់ដើម្បី កុំឲ្យអំពើពុករលួយ បន្តរាលដាល កាន់តែខ្លាំងថែមទៀត។ ភស្តុតាងជាក់ស្តែងគឺនៅក្នុងសន្និសីទសារព័ត៌មាន កាលពីព្រឹកថ្ងៃអាទិត្យទី១០ ខែឧសភា ឆ្នាំ២០១៥ ព្រះតេជគុណ សឺន ហាយ ដែលទើបរួចពីការឃុំខ្លួនក្នុងពន្ធនាគារព្រៃស បានមានសង្ឃដីកាថា អ្នកដែលត្រូវគេឃុំខ្លួនម្នាក់ ត្រូវបង់ប្រាក់ឲ្យមន្ត្រីពន្ធនាគារ៥៥០០០រៀល ក្នុងមួយខែដើម្បីបានទឹកភ្លើងប្រើប្រាស់នៅក្នុងបន្ទប់ឃុំឃាំង។ ព្រះតេជគុណ សឺន ហាយ បានជំរុញឲ្យគណបក្សជាប់ឆ្នោតទាំងពីរ ចុះអង្កេតករណីនេះផងដែរ ដើម្បីកុំឲ្យមន្ត្រីពន្ធនាគារធ្វើអ្វីៗតាមអំពើចិត្តទៀត។
លោក ហ៊ុន សែន ដាក់ចេញនូវយុទ្ធសាស្ត្រកែទម្រង់ស៊ីជម្រៅហើយផ្តោតសំខាន់ទៅលើការលុបបំបាត់អំពើពុករលួយយ៉ាងណាក៏ដោយក៏អំពើពុករលួយនៅតែបន្តរាលដាលយ៉ាងពេញបន្ទុកហើយសូម្បីតែនៅក្នុងពន្ធនាគារព្រៃស(ម១)ក៏មានអំពើពុករលួយកើតឡើងដែរ។ជាក់ស្តែងព្រះសង្ឃខ្មែរកម្ពុជាក្រោម ដែលទើបចេញពីពន្ធនាគារព្រៃស បានជំរុញឲ្យគណបក្សនយោបាយដែលមានអាសនៈនៅក្នុងរដ្ឋសភា ចាត់វិធានការប្រកបដោយប្រសិទ្ធភាព ទៅលើមន្ត្រីខិលខូចដែលជំរិតយកប្រាក់ពីអ្នកជាប់ឃុំក្នុងពន្ធនាគារ ដើម្បីធានាថាការអនុវត្តច្បាប់ ក្នុងមន្ទីរឃុំឃាំងមិនជាប់ពាក់ព័ន្ធអំពើពុករលួយ។
ទាក់ទងបញ្ហាខាងលើនេះលោក គុយ ប៊ុនសន អគ្គនាយកនៃអគ្គនាយកដ្ឋានពន្ធនាគារ ក្រសួងមហាផ្ទៃ ត្រូវចាត់វិធានការលើ លោក ស្រ៊ុន លាង ប្រធានពន្ធនាគារព្រៃស(ម១)ជាបន្ទាន់ ដើម្បីកុំឲ្យខូចឈ្មោះដល់ស្ថាប័នពន្ធនាគារទូទាំងប្រទេស។ ជាពិសេស លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ក៏ត្រូវចាត់វិធានការលុបបំបាត់អំពើពុករលួយ ក្នុងពន្ធនាគារផងដែរ ដើម្បីកុំឲ្យមន្ត្រីពន្ធនាគារ ធ្វើបាបអ្នកទោសតាមអំពើចិត្តទៀត៕
Recent Comments