ខេត្តកំពង់ឆ្នាំង៖ មន្ត្រីខេត្ត និប្រជាពលរដ្ឋ បានរាយការណ៍មកថា រយៈពេលប៉ុន្មាន ឆ្នាំមកនេះ លោកប្រធាន មន្ទីរ សេដ្ឋកិច្ចនិងហិរញ្ញវត្ថុខេត្ត ឈ្មោះ អ៊ូ ជួបកុសល កំពុងតែទទួលបាន នៅភាពល្បីល្បាយ នៅក្នុងចំណោម មន្ត្រីរាជ ការទូទាំងខេត្ត ក្នុងការប្រព្រឹត្តអំពើពុករលួយ កឹបកេងថវិការបស់ មន្ទីរខ្លួននិងការឃុបឃិត ជាមួយអ្នកសាង សង់សំណង់ជូន មន្ទីរអង្គភាពជាច្រើន នៅក្នុងខេត្ត ហើយទទួលបានផលប្រយោជន៍ផ្ទាល់ខ្លួនក្នុងមួយឆ្នាំៗរហូតដល់ខ្ទង់១០០០លានរៀល។
ប្រភពបានឲ្យដឹងថា លោកប្រធានមន្ទីរ អ៊ូ ជួបកុសល គាត់មិនមែនត្រឹមតែល្បីពីខាងចេះកេះគៀវបណ្តាមន្ទីរ រដ្ឋបាលក្រុងស្រុក ឃុំសង្កាត់ យកផលប្រយោជន៍ជាប្រាក់ទឹកតែនោះទេ ដោយសូម្បីតែការចំណាយជាច្រើននៅក្នុងមន្ទីរសេដ្ឋកិច្ចនិងហិរញ្ញវត្ថុ ដែលរូបគាត់ជាប្រធានមន្ទីរនោះក៏គាត់បានកឹបកេងអស់យ៉ាងច្រើនក្នុងមួយឆ្នាំៗ ធ្វើអោយមន្ត្រីដែលធ្វើការជាមួយគាត់កើតការក្តៅក្រហាយមិនតិចទេ។
ប្រភពបានបន្តឲ្យដឹងថាសម្រាប់ប្រាក់រេច្ចទ័យឆ្នាំ២០១៤ ចំនួន៨ជុំដែលដកមកចាយម្តងៗ គឺត្រូវលោកប្រធានមន្ទីរ អ៊ូ ជួបកុសល ស៊ីស្ទើរអស់ ដោយថវិកាទាំងនោះលោកប្រធានមន្ទីរមិនសូវបានយកមកចំណាយទេ។ រូបគាត់រួមនិងមន្ត្រីជំនិតបានធ្វើឯកសារខ្យល់ជាច្រើនដើម្បីស៊ីដាច់ថវិកាដែលគាត់យកមកចាយនោះ។
ក្រៅពីការកិបកេងប្រាក់រេច្ចទ័យលោកប្រធានមន្ទីររូបនេះក៏បានស៊ីប្រាក់សម្រាប់ការថែទាំនិងជួសជុលក្នុងមួយឆ្នាំៗអស់មិនតិចជាង៧០លានរៀលនោះទេ។
លោកប្រធានមន្ទីរ អ៊ូ ជួបកុសល ជាអនុប្រធានគណកម្មាធិការលទ្ធកម្មខេត្ត រូបគាត់បានធ្វើអោយប្រធានមន្ទីរជាច្រើន កើតការក្តៅក្រហាយចំពោះករណីដែលរូបគាត់បានយកក្រុមអ្នកម៉ៅការក្នុងការសាងសង់ឬជួសជុលដោយមានតម្លៃខ្ពស់កប់ពពកនិងការបង្ខំឲ្យប្រធានមន្ទីរទាំងនោះទទួលយកសមិទ្ឋិផលដែលមានតម្លៃថ្លៃលើសតម្លៃធម្មតាមួយគុណនឹងបីដងនៃតម្លៃទីផ្សារ។ ទោះជាយ៉ាងណាសម្រាប់មន្ទីរជាច្រើននៅក្នុងខេត្តកំពង់ឆ្នាំង នៅតែមិនហ៊ានប្រឆាំងតបតទៅនិងសកម្មភាពដ៏ស្មោគគ្រោករបស់លោកប្រធានមន្ទីរ អ៊ូ ជួបកុសល នោះឡើយ។
បញ្ហានេះដោយសារតែប្រធានមន្ទីរជាច្រើនគឺចេះតែស៊ូទ្រាំ បើមិនព្រមធ្វើតាមលោកប្រធានមន្ទីរ អ៊ូ ជួបកុសល នោះមន្ទីររបស់ពួកគាត់នៅពេលរត់ឯកសារសម្រាប់ដកសាច់ប្រាក់ចំណាយផ្សេងៗនិងជួបបញ្ហាច្រើនដូច្នេះពួកគាត់ត្រូវតែទទួលយកទាំងបង្ខំ ទោះបីពួកគាត់ដឹងថាមិនត្រឹមត្រូវក៏ត្រូវយកដែរបើមិនយកគឺអត់ ហើយនិងមានបញ្ហាមួយចំនួនទៀត។
ទាក់ទងព័ត៌មាននេះដែរ អ្នកយកព័ត៌មានពុំអាចទំនាក់ទំនងសុំការបំភ្លឺពីលោកប្រធានមន្ទីរ អ៊ូ ជួបកុសល បានទេដោយទូរស័ព្ទចូលនៅពេលលើកទូរស័ព្ទឮថាអ្នកកាសែតសម្ភាសន៍ រូបគាត់អះអាងថាស្តាប់មិនបានចុចទូរស័ព្ទបិទ នៅពេលទូរស័ព្ទទៅទៀតគឺគាត់លែងលើកទូរស័ព្ទតែម្តង៕
Recent Comments