តាមសេចក្តីរាយការណ៍ពីប្រជាពលរដ្ឋ និងមន្ត្រីអង្គការក្រៅរដ្ឋាភិបាលបានឲ្យដឹងថា អ្នកមានអំណាចនិងអ្នកមានលុយបានកេណ្ឌប្រជាពលរដ្ឋឲ្យយកម៉ាស៊ីនត្រង់ស៊ីន័រចូលព្រៃឧទ្យានជាតិមណ្ឌលសីមា និងព្រៃសហគមន៍កាប់ឈើប្រណីតយកទៅលក់ឲ្យពួកគេ។ ក្រោយពីប្រមូលទិញពីប្រជាពលរដ្ឋហើយឈ្មោះហ៊ុន ជា និងលឹម ប៊ុណ្ណា បានដឹកជញ្ជូនតាមរថយន្តគ្រប់ធុនជាជំហរយកទៅលក់នៅស្រុកយួនគ្មានសមត្ថកិច្ចណាទប់ស្កាត់ទ្បើយ។ ឈ្មោះ ហ៊ុន ជា និងលឹម ប៊ុណ្ណា ជាឈ្មួញរកស៊ីឈើដ៏ធំនៅក្នុងខេត្តមណ្ឌលគិរី ហើយដោយមានមន្ត្រីជាន់ខ្ពស់មួយចំនួននៅពីក្រោយខ្នងទើបពួកគេអាចធ្វើអ្វីៗតាមអំពើចិត្ត។
បទល្មើសដឹកឈើប្រណីតទៅលក់នៅស្រុកយួនតាមច្រកដាក់ដាំ ខេត្តមណ្ឌលគិរីនៅតែបន្តកើតមានយ៉ាងពេញបន្ទុក បើទោះបីរដូវនេះជារដូវវស្សាមានភ្លៀងធ្លាក់ជោកជាំពិបាកធ្វើដំណើរយ៉ាងណាក៏ដោយ។ សម្រាប់ច្រកដាក់ដាំត្រូវបានគេដឹងថា ត្រូវបានអ្នកមានអំណាចនិងអ្នកមានលុយដូចជាឈ្មោះ ហ៊ុន ជា និងមេឈ្មួញ លឹម ប៊ុណ្ណា បានប៉ាវផ្តាច់សម្រាប់ការដឹកជញ្ជូនឈើទៅលក់នៅស្រុកយួនតាមរថយន្តគ្រប់ធុនក្នុងមួយយប់ៗមិនតិចជាង៦០គ្រឿងនោះទេ។ ប្រការនេះកំពុងធ្វើឲ្យឈើប្រណីតក្នុងព្រៃអភិរក្សដែនជម្រកសត្វ និងឧទ្យានជាតិក្នុងខេត្តមណ្ឌលគិរីប្រឈមនឹង វិនាសហិនហោចជាក់ជាមិនខានឡើយ ។
សេចក្តីរាយការណ៍មួយចំនួនបានឲ្យដឹងថា តាមរយៈបរិមាណនៃការដឹកជញ្ជូនឈើទៅលក់នៅស្រុកយួនរបស់ឈ្មោះ ហ៊ុន ជា និងលឹម ប៊ុណ្ណា គឺក្នុងមួយខែៗពួកគេចំណាយលុយយ៉ាងតិចពី២០ទៅ៣០ម៉ឺនដុល្លារ ដើម្បីជាការសម្រួលឲ្យសមត្ថកិច្ចបើកផ្លូវដោយរលូន។ ក្នុងនោះអភិបាលខេត្តមណ្ឌលគិរីឈ្មោះអេង ប៊ុនហៀងនិងមេរដ្ឋបាលព្រៃឈើខេត្តក៏អាចទទួលបានផលប្រយោជន៍យ៉ាងគាប់ចិត្តពីឈ្មួញឈើទាំងពីរនាក់ខាងលើនេះដែរ ទើបពួកគេបណ្តោយឲ្យបទល្មើសកើតទ្បើងតាមអំពើចិត្ត។ ហេតុនេះសូមលោក អ៊ុក រ៉ាប៊ុន រដ្ឋមន្ត្រីក្រសួងកសិកម្មនិងលោក ឆេង គឹមសុន មេរដ្ឋបាលព្រៃឈើពិនិត្យមើលរឿងនេះជាបន្ទាន់៕
Recent Comments