ដោយសារតែអាងឥទ្ធិពលជាមេការឈ្មួញ ទ្រី ភាព កាប់បំផ្លាញព្រៃឈើនោះ ទើប ស្រេង ម៉េង កំពុងតែឃុបឃិត ជាមួយ និងនាយខណ្ឌរដ្ឋបាលព្រៃឈើខេត្តស្ទឹងត្រែង ដោយដាក់កម្លាំងរាតត្បាតចេញកាប់ឈើយ៉ាងមហន្តរាយ ពេញខេត្តស្ទឹងត្រែង ទាំងមូលដោយមិនខ្វល់ពីកំណែទម្រង់ព្រៃឈើដែលរដ្ឋាភិបាលដាក់ចុះឡើយ ។
ពីខេត្តស្ទឹងត្រែង ៖ ប្រភពមន្ត្រីបានបង្ហើបឱ្យដឹងថា លោក ស្រេង ម៉េង គឺជាមេការប្រមូលទិញឈើឱ្យក្រុមហ៊ុនលោក ទ្រី ភាព ត្រូវបានធ្វើការផ្លាស់ប្តូរកាលពីពេលថ្មីៗនេះអោយទៅប្រមូលទិញឈើប្រណីត ដូចជា ធ្នង់ បេង នាងនួន ពេញខេត្តស្ទឹងត្រែង ក្រោយពីកាប់បំផ្លាញព្រៃឈើក្លាយជាវាលរហោស្ថានក្នុងខេត្តព្រះវិហារមានការកាក់កប និងជិត រលាយព្រៃឈើហើយនោះ។
តាមប្រភពបង្ហើបឱ្យដឹងថា លោកស្រេង ម៉េង មានឃ្លាំងស្តុកឈើដ៏ធំមួយកន្លែង នៅចំណុចក្បែរក្រុម ហ៊ុនវាយថ្ម របស់ចិន ស្ថិតក្នុងភូមិតាឃែង ឃុំព្រែកមាស ស្រុកសៀមប៉ាង ខេត្តស្ទឹងត្រែង ។
យោងសេចក្តីរាយការណ៍ពីប្រជាពលរដ្ឋ នៅស្រុកសៀមប៉ាង បានឱ្យដឹងថា ជារៀងរាល់ថ្ងៃពួកគាត់តែងតែសង្កេត ឃើញមានរថយន្ត ប៉ាកុង (រថយន្តកែច្នៃ) និងគោយន្តកន្ត្រៃ រាប់សិបគ្រឿង បានធ្វើសកម្មភាពដឹកជញ្ជូនឈើប្រណីត ចេញពីព្រៃយ៉ាងគគ្រឹកគគ្រេង និង អនាធិបតេយ្យបំផុត ដូចជាដឹកចេញពីតំបន់សួនឧទ្យានជាតិវីរៈជ័យជាប់ព្រំ ប្រទល់នៃខេត្ត រតនគិរី និងតំបន់ព្រៃសហគមន៍ ដែលការពារដោយអនុក្រឹត្យដើម្បីយកទៅលក់អោយមេការក្រុម ហ៊ុន លោកឧកញ៉ា ទ្រី ភាព គឺលោក ស្រេង ម៉េង ដោយគ្មានសមត្ថកិច្ច ឬមន្ត្រីជំនាញណាធ្វើការទប់ស្កាត់ និងបង្រាបទាល់តែសោះ ។
ជាងនេះទៅទៀត ស្រេង ម៉េង ក៏ត្រូវបានប្រភពបង្ហើបឱ្យដឹងថា គាត់គឺជាមន្ត្រីយោធាពាក់ស័ក្តិ២ ប្រចាំនៅខេត្ត ព្រះវិហារ និងជាមេការប្រមូលទិញឈើប្រណីតឱ្យក្រុមហ៊ុនឧកញ៉ាទ្រី ភាព ជាច្រើនឆ្នាំមកហើយ និងដោយសារតែ គាត់ចេះចែក រំលែកផលប្រយោជន៍ ថែមទាំងមានទំនាក់ទំនងល្អជាមួយ សមត្ថកិច្ចពាក់ព័ន្ធ ជាមួយមន្ត្រីជំនាញរដ្ឋ បាលព្រៃឈើអស់នោះ ទើបគេមិនដែលឃើញមានការ ចុះបង្ក្រាបមុខជំនួញរកស៊ី ឈើនិងការប្រមូលទិញឈើខុស ច្បាប់ទាំងនោះឡើយ។ ដូច្នេះហើយបានជាធ្វើឱ្យគាត់មានការកាក់កបយ៉ាងខ្លាំងរហូតក្លាយជា ឧកញ៉ានោះ ។
ដូចជា បច្ចុប្បន្នគេសង្កេតឃើញព្រៃឈើជាច្រើនកន្លែង នៅក្នុងតំបន់មួយចំនួនក្នុងខេត្តស្ទឹងត្រែង កំពុងរងនូវការកាប់ទន្ទ្រានបំផ្លាញដោយខុសច្បាប់យ៉ាងរង្គាល ។ ហើយប្រជាពលរដ្ឋមួយចំនួនក៏បាននាំគ្នាចាប់ របរជាអ្នករកស៊ីកាប់ឈើប្រណីត ដើម្បីយកមកលក់ឱ្យឈ្មួញធំៗ ឬក្រុមហ៊ុនតាមរយៈការបំផុសបំផុលពីសំណាក់ ក្រុមមេការដូចជា ស្រេង ម៉េង នោះជាដើម ។ ហើយមេការដូច ស្រេង ម៉េង គឺអួតអាងពីការគ្មាននរណាហ៊ាន ប៉ះពាល់ខ្លួន និងអួតពីមានអ្នកកាសែតកាន់លុយខ្លួនទាំងបាច់ដើរបិទ មាត់អ្នកកាសែត និងទូរទស្សន៍ ព្រមទាំងមន្ត្រី ជំនាញមួយចំនួនទៀតឱ្យធ្វើជាអ្នកយាមផ្លូវឱ្យខ្លួនកាប់បំផ្លាញព្រៃឈើ យ៉ាងទ្រង់ទ្រាយធំបំផុត ហើយដែលថ្នាក់លើ មានចំណែកនៅពីក្រោយខ្នយនោះ មិនគួរមើលរំលងសកម្មភាពឈ្មួញ ក្លាយជាឧកញ៉ា ស្រេង ម៉េង នោះទេ ។
បើតាមមន្ត្រីជំនាញផ្នែករដ្ឋបាលព្រៃឈើ ប្រចាំស្រុកសៀមប៉ាងមួយរូប បានថ្លែងឱ្យដឹងក្នុងន័យលាក់លៀមថា ការទិញឈើប្រណីត និងប្រមូលយកទៅស្តុកទុកក្នុង ឃ្លាំងនៃទីតាំងខាងលើ របស់ក្រុមហ៊ុនឈ្មួញឧកញ៉ាទ្រី ភាព ដែលមានមេការ ស្រេង ម៉េង គឺខាងក្រុមហ៊ុនមានអាជ្ញាប័ណ្ណត្រឹមត្រូវពីរាជរដ្ឋាភិបាល ប៉ុន្តែ ចំពោះអ្នកដែលកាប់ ឈើយកមកលក់ឱ្យក្រុមហ៊ុនពុំមានច្បាប់ទេ ។ ហើយ ស្រេង ម៉េង ក៏កំពុងតែអនុវត្តធ្វើជាចោរលួចកាប់ឈើនៅពី ក្រោយខ្នងប្រជាពលរដ្ឋ និងជាអ្នកជម្រុញឱ្យប្រជាពលរដ្ឋក្រីក្រចូលទៅកាប់ឈើខុសច្បាប់យកមកលក់ និងដឹកចូល ក្រុមហ៊ុនរបស់ខ្លួនក្លាយជាស្របច្បាប់យ៉ាងព្រហើនបំផុត ។
Recent Comments