ខេត្តត្បូងឃ្មុំ ៖ កន្លងមកលោក នូ ស៊ីថា គឺជាមន្ត្រីមួយរូប ដែលថ្នាក់លើចាត់តាំងឱ្យទៅធ្វើជាប្រធាន គយប្រចាំច្រកដូង ៧ដើម នៃស្រុកមេមត់អំឡុងពេលនោះ លោក នូ ស៊ីថា បានយកតួនាទីរបស់ខ្លួនទៅប្រើប្រាស់ ដើម្បីទាញយកផលប្រយោជន៍ប្រព្រឹត្តអំពើពុករលួយយ៉ាងពេញទំហឹង ហើយមុនបានមកកាន់មេច្រកដូង ៧ដើម លោក នូ ស៊ីថា ជាមន្ត្រីគយនៅទិសឧត្តរនៃប្រទេស ហើយដោយសម្លឹងពីផលប្រយោជន៍ផ្ទាល់ខ្លួន ធ្វើយ៉ាងណា ដើម្បីឆាប់ក្លាយជាអ្នកមានទ្រព្យសម្បត្តិស្តុកស្តម្ភ លោក នូ ស៊ីថា បានជ្រែរត់មករកប៉ុស្តិ៍ភាគខាងកើតប្រទេសវិញ ម្តង ហើយចុងក្រោយទីបំផុតបានផ្លោះឡើងធ្វើជាស្តេចត្រាញ់គយប្រចាំខេត្តត្បូងឃ្មុំ ដែលជាខេត្តសម្បូរណ៍ដោយជំនួញសេដ្ឋកិច្ច គ្រប់វិស័យ ។
តាមការសង្កេតពីបុគ្គលិកលក្ខណៈសម្បត្តិរបស់លោក នូ ស៊ីថា គឺមានសមត្ថភាពជំនាញក្នុងការប្រព្រឹត្តអំពើ ពុករលួយគ្រប់រូបភាពឃុបឃិតជាមួយឈ្មួញរកស៊ីប្រេងឥន្ធនៈការដឹកជញ្ជូនឈើ ទំនិញគ្រប់ប្រភេទត្រូវធ្លាក់ក្នុង កណ្តាប់ដៃលោក នូ ស៊ីថា ទាំងស្រុង ។
លោក នូ ស៊ីថា ឥឡូវនេះពិតជាបានសម្រេចដូចក្តីប៉ងប្រាថ្នារបស់គាត់មែន ។ បានសេចក្តីថា មហិច្ឆតាល្មោភបុណ្យស័ក្តិអំណាចរបស់ លោក នូ ស៊ីថា គឺពិតជាគ្មានព្រំដែន ហើយក្លាហានចំណាយលុយរាប់ម៉ឺនដុល្លារទិញតំណែង មេគយខេត្តត្បូងឃ្មុំ ធ្វើឱ្យផ្អើលល្បីល្បាញទូទាំងប្រទេសគ្មាននរណាមួយអាចមានសមត្ថភាពធ្វើបានដូចជារូបគាត់បានឡើយ ។
គ្រប់អាជីវករទាំងតូចទាំងធំ អ្នករកស៊ីទាំងស្របច្បាប់មិនស្របច្បាប់គ្មាននរណាមួយបានរួចខ្លួនថាមិនបានបង់លុយក្រៅផ្លូវការទៅឱ្យលោក នូ ស៊ីថា ឡើយ ។ ចំណែកឯកិច្ចខិតខំប្រឹងប្រែងរកចំណូលជូនរដ្ឋវិញ លោក នូ ស៊ីថា មិនដែលឈឺក្បាលវិលមុខគិតគូររកផលប្រយោជន៍ជូនជាតិឡើយ ធ្វើយ៉ាងណាឱ្យតែខ្លួនឆាប់បានក្លាយជាអ្នកមានទ្រព្យសម្បត្តិដ៏ហ៊ឺហារ ! ក្រោមគំនរទឹកភ្នែករបស់ប្រជាពលរដ្ឋក្រីក្រស្លូតត្រង់រកតែអាហារចំអែតក្រពះរស់ មួយថ្ងៃ សឹងតែមិនបានផង ។
បើក្រឡេកមើលពីជនហ៊ឺហារ ! ឈ្មោះ នូ ស៊ីថា ជំនាញគយពូកែខាងគោះវិញ ពេលមកបូរីនៅជិតស្ថានីយ៍ ទូរទស្សន៍អាស៊ីអាគ្នេយ៍ក្នុងក្រុងភ្នំពេញម្តងៗ គេសង្កេតឃើញជនហ៊ឺហាររូបនេះ យកលុយទាំងគីបៗក្នុងវ៉ាលីដើរស៊ី ចាយសប្បាយក្អាកក្អាយក្នុងភោជនីយ៍ដ្ឋានផ្សេងៗ ដោយមានស្រីស្រស់ក្មេងៗអង្គុយកំដរឆ្វេងស្តាំ ដោយមិនបានយក ឧត្តមគតិ ទៅជួយបំរើដល់ប្រជាពលរដ្ឋក្រីក្រតាមមូលដ្ឋានដែលរាជរដ្ឋាភិបាលកំពុងតែយកចិត្តទុកដាក់នោះឡើយ។
ពាក់ព័ន្ធព័ត៌មានខាងលើនេះ គួរតែក្រសួងសេដ្ឋកិច្ច និងហិរញ្ញវត្ថុ និងទីចាត់ការគយ និងរដ្ឋាករ មានវិធានការណ៍សើរើការប្រកាសតែងតាំងប្រធានសាខាគយខេត្តត្បូងឃ្មុំនេះឡើងវិញ ដោយពិនិត្យ ជ្រើសរើសមន្ត្រីដែលមានសមត្ថភាព លក្ខណៈសម្បត្តិត្រឹមត្រូវពិតប្រាកដ ឱ្យទៅកាន់កន្លែងកៅអី លោក នូ ស៊ីថា វិញម្តង ព្រោះមិនទាន់ហួសពេលទេ តំណែងនេះជាការប្រកាសតែងតាំងបណ្តោះអាសន្ន ៕
Recent Comments