តាមក្រុមប្រជាពលរដ្ឋអ្នកខេត្តសៀមរាប បាននិយាយថា បច្ចុប្បន្នមានក្រុមមេឈ្មួញយួនឈ្មោះ កាយ និងឈ្មោះ តាំ គឺជាមេក្លោងធំបំផ្លាញបទល្មើសនេសាទយ៉ាង ទ្រង់ទ្រាយធំបំផុតក្នុងតំបន់ទន្លេសាប ក្នុងភូមិសាស្ត្រខេត្តសៀមរាប ។
ប្រភពព័ត៌មានពីប្រជាពលរដ្ឋរស់នៅតំបន់បឹងទន្លេសាប ក្នុងខេត្ត សៀមរាបបានឱ្យដឹងថា បទល្មើសនេសាទបានប្រើឧបករណ៍ខុសច្បាប់ កំពុងកើតឡើងមាន យ៉ាងពេញបន្ទុក។ សមត្ថកិច្ចពាក់ព័ន្ធទំនងដូចជា ត្រូវថ្នាំបានជាមិនយកចិត្តទុកដាក់បង្ក្រាបទៅលើ បទល្មើសនេសាទរបស់ឈ្មួញនេសាទទាំងនេះសូម្បីបន្តិច។
ជាក់ស្តែងឧបករណ៍នេសាទខុសច្បាប់ដែលក្រុមជនល្មើសប្រើប្រាស់បំផ្លាញធនធានមច្ឆជាតិយ៉ាងមហន្តរាយ នោះរួមមានឆ្នុក មងល្ពៅ និង ម៉ាញ់អូសដោយកាណូតមានកម្លាំងម៉ាស៊ីនធំៗនៅក្នុងបឹងទន្លេសាបតែម្តងហើយ។ ដែលមន្ត្រីរដ្ឋបាលជលផលនិងសមត្ថកិច្ចពាក់ព័ន្ធដូចជាកងរាជអាវុធហត្ថ និងនគរបាលមិនបានចាត់វិធានការ ទប់ស្កាត់បទល្មើសដែលកើតឡើងយ៉ាងអនាធិបតេយ្យនោះទេ គឺពួកគេគិតតែរឿងផលប្រយោជន៍ផ្ទាល់ខ្លួន ។ តាមប្រជាពលរដ្ឋបានរាយការណ៍ថាបច្ចុប្បន្នមានជនជាតិយួនខ្លះនិងជានជាតិខ្មែរខ្លះបានប្រើប្រាស់ឧបករណ៍ខុសច្បាប់ចាប់ត្រីយកទៅលក់ដូរក្នុងទ្រង់ទ្រាយធំ មិនដែល ឃើញសមត្ថកិច្ចពាក់ព័ន្ធចាត់វិធានការទប់ស្កាត់ទេ ។
ផ្ទុយទៅវិញ ចំណែកប្រជាពលរដ្ឋគ្រាន់តែប្រើប្រាស់ឧបករណ៍នេសាទខុសច្បាប់បន្តិចបន្តួចជាលក្ខណៈគ្រួសារសោះបែរជាមន្ត្រីជលផលនិងសមត្ថកិច្ចពាក់ព័ន្ធ ចាត់វិធានការបង្ក្រាបយ៉ាងសកម្មមិនដែលលើកលែងម្តងណាឡើយ ។ ដូចជា បើតាមការបកអាក្រាតរបស់មន្ត្រីមូលដ្ឋាននិយាយថា បច្ចុប្បន្នជនជាតិយួនដែលប្រើ
ឧបករណ៍ខុសច្បាប់បំផ្លាញធនធាន មច្ឆជាតិយ៉ាងមហន្តរាយនោះមានដូចជា ឈ្មោះ កាយ ឈ្មោះ តាំ និងបក្ខពួកមួយចំនួនទៀត ដោយយកលុយបិទមាត់មន្ត្រីជាប្រចាំ ថែមទាំងមានការបើកដៃពីមន្ត្រីអាជ្ញាធរ និងសមត្ថកិច្ចពុករលួយទៀតផង ។
បើតាមក្រុមប្រជាពលរដ្ឋបានរិះគន់ថាពួកគាត់បានប្តឹងទៅមន្ត្រីអាជ្ញាធរនិងមន្ត្រីរដ្ឋបាលជលផលជាញឹកញាប់ឱ្យធ្វើការបង្ក្រាបជនជាតិយួនដែលប្រើឧបករណ៍ខុសច្បាប់ បំផ្លាញធនធានមច្ឆជាតិទ្រង់ទ្រាយធំនៅបឹងទន្លេសាបមួយរយៈពេលកន្លងទៅនេះ ។ ប៉ុន្តែមន្ត្រីរដ្ឋបាលជលផល និងសមត្ថកិច្ចពាក់ព័ន្ធធ្វើព្រងើយមិនចាត់វិធានការ ទប់ស្កាត់ទេព្រោះតែមន្ត្រីជំនាញ អស់នោះទទួលលុយបង់ខែរបស់ឈ្មួញយួនតាកាយ តាតាំ និងបក្ខពួកនោះ ។
ទាក់ទងបញ្ហាខាងលើនេះនាយខណ្ឌរដ្ឋបាលជលផលខេត្តសៀមរាប នៃអធិការដ្ឋានរដ្ឋបាលជលផលខាងជើង បឹងទន្លេសាប លោក ព្រិន សាវិន បានដោះសាបិទបាំងការពិតថា មិនមានការប្រើប្រាស់ឧបករណ៍នេសាទខុសច្បាប់ ដូចប្រជាពលរដ្ឋបានលើកឡើងនោះទេ។
ថ្លែង តបនឹងការដោះសាបែបនេះតំណាងសហគមន៍នេសាទខេត្តសៀមរាប លោក ឱម ឈឹម បានបញ្ជាក់ថាតាមការផ្តល់ព័ត៌មានពីប្រជានេសាទគឺបទល្មើសប្រើឧបករណ៍ខុសច្បាប់កំពុងកើតឡើងជាច្រើនយ៉ាង ពេញបន្ទុកស្ទើរគ្រប់កន្លែងដូចជានៅតំបន់ចុងឃ្នៀស តំបន់កំពង់ឃ្លាំង ក្នុងស្រុកសូទ្រនិគមជាដើម៘
ជាមួយគ្នានេះប្រជាពលរដ្ឋក៏បានរិះគន់ថាមន្ត្រីរដ្ឋបាលជលផលក្រោមឱវាទលោក ព្រិន សាវិន គិតគូរតែពីរឿងប្រយោជន៍ផ្ទាល់ខ្លួនប៉ុណ្ណោះ ហើយបែរជាពួកគេមានភាពតឹងតែងតែ ជាមួយប្រជាពលរដ្ឋខ្មែរទន់ ខ្សោយ ប៉ុន្តែបែរជាទៅបើកដៃឱ្យជនជាតិយួននិងឈ្មួញធំៗមួយចំនួនប្រើឧបករណ៍នេសាទខុសច្បាប់ យ៉ាងអនាធិបតេយ្យបំផុត មិនគួរបើគេមើលរំលងពួកសមត្ថកិច្ចអស់នោះទេ ។
ជាក់ស្តែងកាលពីដើមខែតុលា កន្លងទៅប្រជានេសាទ នៅស្រុកសូទ្រនិគម និងស្រុកជីក្រែង ខេត្តសៀមរាប ធ្លាប់បានចោទប្រកាន់មន្ត្រីរដ្ឋបាលជលផលពុករលួយនិងសមត្ថកិច្ចពាក់ព័ន្ធ ដែលដើរទារលុយសំណូកចំនួន១,៧លាន រៀលពីជនល្មើសប្រើប្រាស់ឧប ករណ៍នេសាទខុសច្បាប់ជំនួសការបង្ក្រាប ហើយករណីដែលមន្ត្រីរដ្ឋបាលជលផល និងសមត្ថកិច្ចពាក់ព័ន្ធទៅជំរិតយកលុយពីអ្នកប្រើប្រាស់ឧបករណ៍នេសាទខុសច្បាប់ធំៗទាំងជនជាតិយួន និងជនជាតិខ្មែរ គឺជាការបើកដៃឱ្យជនល្មើសកាន់តែបានចិត្តក្នុងការបំផ្លាញធនធានមច្ឆជាតយ៉ាងចេញមុខបំផុត ដែលគួរតែមេរដ្ឋបាលជលផល ណៅ ធួក ពិនិត្យជាបន្ទាន់ផង។
ប្រជានេសាទនៅក្នុងខេត្តសៀមរាបក៏បានអំពាវនាវផងដែរ ឱ្យលោក ណៅ ធួក មេរដ្ឋបាលជលផលគួរតែចាត់វិធានការបង្ក្រាបបទល្មើសនៅក្នុងបឹងទន្លេសាប នៃខេត្តសៀមរាប ជាបន្ទាន់ផងពី ព្រោះលោកព្រិន សាវិន ដែលជាមេរដ្ឋបាលជលផលខេត្តនេះ ទំនងកំពុងកាក់កបសុខស្រួលជាមួយលុយសំណូកប្រចាំ ខែយ៉ាងកាក់កបបំផុត ៕
Recent Comments