មជ្ឈដ្ឋានទូទៅបានរិះគន់ថា លោក តិប ញ៉ាតា មេរដ្ឋបាលព្រៃឈើខេត្តកំពង់ធំ ជាអ្នកបើកដៃឲ្យមានបទល្មើសកើតទ្បើងឥតឈប់ឈរដើម្បីផលប្រយោជន៍ ផ្ទាល់ខ្លួនយ៉ាងក្រអឺតក្រទម។ ទាក់ទងនឹងបញ្ហានេះគួរតែលោក ឆេង គឹមស៊ុន មេរដ្ឋបាលព្រៃឈើនិងលោក អ៊ុក រ៉ាប៊ុន រដ្ឋមន្ត្រីក្រសួងកសិកម្មចាត់វិធានការលើមេរដ្ឋបាលព្រៃឈើខេត្តកំពង់ធំ ជាបន្ទាន់បំផុត ព្រោះមកដល់ពេលនេះបទល្មើសបំផ្លាញព្រៃឈើក្នុងតំបន់ព្រៃទ្បង់ នៅតែបន្តកើតមានដដែល។
បទល្មើសកាប់ឈើធ្វើអាជីវកម្មខុសច្បាប់នៅតំបន់ព្រៃ ទ្បង់ខេត្តកំពង់ធំនៅតែបន្តកើតមានយ៉ាងពេញបន្ទុក ហើយមន្ត្រីរដ្ឋបាល ព្រៃឈើនិងសមត្ថកិច្ចពាក់ព័ន្ធមិនដែលចាត់វិធានការទប់ស្កាត់ប្រកបដោយ ប្រសិទ្ធភាពទ្បើយ ។
ពីថ្ងៃទី០៨ ដល់ថ្ងៃទី១១ ខែមិថុនា ឆ្នាំ២០១៤ សមាជិកបណ្តាញសហគមន៍ការពារព្រៃទ្បង់ជាង៥០នាក់បាននាំគ្នាចុះល្បាត ទប់ស្កាត់បទល្មើសបំផ្លាញព្រៃឈើដើម្បីដាក់របាយការណ៍ទៅរដ្ឋាភិបាល។ នៅក្នុងប្រតិបត្តិការនោះ សមាជិកបណ្តាញសហគមន៍ការពារព្រៃទ្បង់បានរកឃើញឈើដែលជនល្មើសកាប់គរ ទុករាប់រយម៉ែត្រគូប និងវត្ថុតាងជាច្រើនទៀតនៅក្នុងព្រៃទ្បង់នៃស្រុកសណ្តាន់ ខេត្តកំពង់ធំ។ បណ្តាញសហគមន៍ការពារព្រៃទ្បង់បានបែងចែកជាពីរក្រុមគឺមួយក្រុម ដើរល្បាតចំណុចជុំវិញភ្នំជី ឃុំទំរីង ស្រុកសណ្តាន់ ខេត្តកំពង់ធំ ហើយបានរកឃើញឈើអារច្រៀករួច និងឈើមូលគរទុកជាច្រើនគំនរ ដែលមានប្រមាណរាប់រយម៉ែត្រគូប។ រីឯក្រុមទី២ បានដើរល្បាតនៅចំណុចវាលបឹង ឃុំដងកាំបិត ស្រុកសណ្តាន់ ជាប់ព្រំប្រទល់ខេត្តកំពង់ធំនិងខេត្តព្រះវិហារប្រមូលបានភស្តុតាង ជាច្រើនដូចជាឈើប្រណីតជាច្រើនប្រភេទដែលជនល្មើសអារច្រៀករួច និងឈើមូលប្រហែលជា៥០ម៉ែត្រគូបផងដែរ។
ប្រជាសហគមន៍ដែលល្បាតនៅតំបន់វាលបឹង ឃុំដងកាំបិតបានរកឃើញត្រាក់ទ័រមួយគ្រឿងម៉ាស៊ីនត្រង់ស៊ីន័រ មួយគ្រឿង និងគោយន្តច្នៃចំណុះ៦តោនមួយគ្រឿងដែលប្រជាសហគមន៍ដឹងថាជារបស់ អនុប្រធានប៉ុស្តិ៍នគរបាលរដ្ឋបាលឃុំសណ្តាន់ឈ្មោះចាន់ មានជ័យ។
ប្រជាសហគមន៍ការពារព្រៃទ្បង់ក្នុងខេត្តកំពង់ធំ បានលើកទ្បើងថា កន្លងមកពួកគាត់តែងតែរាយការណ៍ទៅមន្ត្រីអាជ្ញាធរនិងសមត្ថកិច្ច ស្ថាប័នពាក់ព័ន្ធដើម្បីឲ្យចាត់វិធានការបង្ក្រាបបទល្មើសដែលកើត ទ្បើងយ៉ាងពេញបន្ទុក ព្រោះបានធ្វើឲ្យព្រៃទ្បង់ស្ទើរតែវិនាសសាបសូន្យទៅហើយ។ ក៏ប៉ុន្តែមន្ត្រីរដ្ឋបាលព្រៃឈើក្រោមការគ្រប់គ្រងរបស់លោក តិប ញ៉ាតា មិនដែលយកចិត្តទុកដាក់បង្ក្រាបបទល្មើសប្រកបដោយប្រសិទ្ធភាពទ្បើយ ជាមួយគ្នានេះប្រភពព័ត៌មានខ្លះបានបង្ហើបថា មេរដ្ឋបាលព្រៃឈើគឺជាអ្នកបើកដៃឲ្យមានបទល្មើសយ៉ាងពេញបន្ទុក។
ពាក់ព័ន្ធនឹងបញ្ហាខាងលើនេះលោក អ៊ុត សំអន អភិបាលខេត្តកំពង់ធំបានបញ្ជាក់ថា លោកទទួលបានព័ត៌មានអំពីការចុះល្បាតរបស់បណ្តាញសហគមន៍ការពារព្រៃទ្ប ង់ ប៉ុន្តែមិនដឹងច្បាស់ទេថា គោយន្តច្នៃដែលសហគមន៍ចាប់បាននោះជារបស់អនុប្រធានប៉ុស្តិ៍រដ្ឋបាល ឃុំសណ្តាន់។
មន្ត្រីអង្គការក្រៅរដ្ឋាភិបាលដែលឃ្លាំមើលបទល្មើសបំផ្លាញព្រៃឈើ បានរិះគន់ថា អាជ្ញាធរគ្រប់លំដាប់ថ្នាក់ចាប់ពីឃុំ ស្រុក ដល់ខេត្តនិងនគរបាលឃុំ ស្រុក រហូតដល់ខេត្តសុទ្ធតែទទួលបានផលប្រយោជន៍ពីបទល្មើសបំផ្លាញព្រៃឈើ ហេតុនេះហើយទើបពួកគេមិនចាត់វិធានការទប់ស្កាត់ទាល់តែសោះ។ ក្នុងនោះលោក តិប ញ៉ាតា មេរដ្ឋបាលព្រៃឈើខេត្តកំពង់ធំត្រូវបានគេដឹងថា ជាមេខ្លោងធំបំផុតក្នុងការបើកដៃឲ្យក្រុមជនល្មើសកាប់ឈើធ្វើ អាជីវកម្មខុសច្បាប់ស្រេចតែអំពើចិត្ត ហើយអភិបាលខេត្តកំពង់ធំឈ្មោះអ៊ុត សំអន គឺជាអ្នកជួយបិទបាំង? ៕
Recent Comments