ឈ្មួញមួយចំនួនបានសម្រេចចិត្តផ្អាកសកម្មភាពរកស៊ីដឹកជញ្ជូន ឈើខុសច្បាប់មួយរយះ ដោយសារតែកុងត្រូលជជុះតាមដងផ្លូវកើតឡើងច្រើនពេក ហើយឈ្មួញតូចតាចត្រូវបង្ខំចិត្តយកឈើមកលក់ឲ្យមេឈ្មួញ សាយ ម៉េងឡាយ ដែលមានទីតាំងស្តុកប្រមូលទិញឈើធំបំផុតនៅភូមិត្រើង ឃុំអូរស្វាយ ស្រុកកំពង់សៀម ក្នុងតម្លៃថោកជាងទីផ្សារ ធ្វើឲ្យពួកគេរកស៊ីខាតឡុងចុងគ្មានប្រាក់ចំណេញ ។ ជាទម្លាប់គ្មានឈ្មួញណាម្នាក់អាចដឹកជញ្ជូនឈើឆ្លងកាត់ទឹកដី ខេត្តកំពង់ចាម ចេញទៅស្រុកយួនដោយផ្ទាល់បានទេ ប្រសិនបើមិនពឹងអាស្រ័យឲ្យមេឈ្មួញ សាយ ម៉េងឡាយ និងឈ្មោះ ពៅ សក់បះ ជួយរត់ការសម្របសម្រួលបាវផ្លូវ ហើយឈ្មួញខ្លះមិនចង់មានបញ្ហាវែងឆ្ងាយបានសម្រេចចិត្តលក់ឈើឲ្យ ឈ្មោះ សាយ ម៉េងឡាយ ក្នុងតម្លៃថោក ហើយហាងឆេងស្ថិតនៅលើតែបបូរមាត់របស់ពួកគេជាអ្នកនិយាយ។
មេឈ្មួញ សាយ ម៉េងឡាយ នៅតែឈរលំដាប់លេខ១ក្នុងការប្រមូលទិញនិង ដឹកជញ្ជូនឈើខុសច្បាប់ចេញទៅលក់នៅស្រុកយួន លើទឹកដីខេត្តកំពង់ចាមនិងខេត្តត្បូងឃ្មុំយ៉ាងរលូនល្អ គ្មាននរណាហ៊ានប៉ះពាល់ទេ ព្រោះសមត្ថកិច្ច មន្ត្រីជំនាញទាំងពីរខេត្តនេះ សុទ្ធសឹងតែជាបក្ខពួកនិងខ្សែស្រឡាយរបស់ឈ្មោះ សាយ ម៉េងឡាយ មិនដែលមាននរណាហ៊ានបង្ក្រាបពី ព្រោះ មន្ត្រីជំនាញ និងសមត្ថកិច្ចពាក់ព័ន្ធបានទទួលផលប្រយោជន៍ដែលមេឈ្មួញធំ សាយ ម៉េងឡាយ ជាប្រចាំ ទើបអ្វីៗអាចដំណើរការបាន។
សមត្ថកិច្ចនិងមន្ត្រីជំនាញជាច្រើនបានក្លាយជាកូនជឹងរបស់មេ ឈ្មួញ សាយ ម៉េងឡាយ ក្នុងការចេញប្រតិបត្តិការបង្ក្រាបឈ្មួញតូចតាចដែលរកស៊ីដឹកជញ្ជូនឈើ តាមរបៀបលោតឆ័ត្រមិនយកទៅលក់ឲ្យឈ្មោះ សាយ ម៉េងឡាយ ព្រោះនៅលើទឹកដីខេត្តកំពង់ចាមឈ្មោះ សាយ ម៉េងឡាយ ទទួលបានសិទ្ធិផ្តាច់មុខក្នុងការប្រមូលទិញនិងដឹកជញ្ជូនឈើយកទៅលក់នៅ ស្រុកយួន។ ហើយការកាត់ខេត្តកំពង់ចាម ផ្នែកខាងកើតទន្លេ បង្កើតទៅជាខេត្តត្បូងឃ្មុំ ក៏សមត្ថកិច្ចនិងមន្ត្រីជំនាញក្នុងខេត្តថ្មីនេះសុទ្ធសឹងជាបក្ខពួក របស់មេឈ្មួញ សាយ ម៉េងឡាយ ដដែលជាដដែល គ្មានអ្វីជាឧបសគ្គសម្រាប់ការរកស៊ីខុសច្បាប់របស់មេឈ្មួញសាយ ម៉េងឡាយ នោះទេ។ព្រោះតែមុខជំនួញរកស៊ីឈើខុសច្បាប់បានធ្វើឲ្យមេឈ្មួញ សាយ ម៉េងឡាយ ក្លាយទៅជាមហាសេដ្ឋី នៅលើទឹកដីខេត្តកំពង់ចាម ប្រកបដោយឥទ្ធិពលអំណាចគ្មាននរណាហ៊ានបង្រ្កាប ទេ ពោលគឺបច្ចុប្បន្ននេះឈ្មោះ សាយ ម៉េងឡាយ មានផ្ទះវីឡាដ៏ស្កឹមស្កៃ នៅភូមិត្រើង និងទើបតែទិញផ្ទះល្វែងទាំងជុងៗ នៅកណ្តាលក្រុងកំពង់ចាម តម្លៃរាប់សិបម៉ឺនដុល្លារ និងមានរថយន្តស៊េរីទំនើបៗ ៣ទៅ៤គ្រឿង មានដីឡូត៍ សឹងរាប់ភ្លេច ហើយគេដឹងថាភាពមានបានរបស់មេឈ្មួញ សាយ ម៉េងឡាយ ផ្តើមឡើងពីមុខជំនួញរកស៊ីដឹកជញ្ជូនឈើខុសច្បាប់នោះឯង ព្រោះគ្រួសាររបស់គាត់មិនមានមុខរបរផ្សេង ដែលអាចរកស៊ីមានបានយ៉ាងឆាប់រហ័សទេ។
អ្នករកស៊ីតូចតាចមួយចំនួនបានលើកឡើងថាមេឈ្មួញ សាយ ម៉េងឡាយ មានខ្សែបណ្តាញចាំប្រមូលទិញឈើពីប្រជាពលរដ្ឋដែលឆ្លងដែនចូលទៅកាប់ ឈើប្រណីតនៅតាមបណ្តោយព្រំដែនសៀម ដឹកតាមរថយន្តយីឌុប ចេញទៅខេត្តឧត្តរមានជ័យ ខេត្តសៀមរាប និងខេត្តព្រះវិហារយកមកស្តុកទុកក្នុងឃ្លាំង និងជាផ្ទះវីឡាដ៏ធំស្កឹមស្កៃរបស់គាត់នៅភូមិត្រើង។
មេឈ្មួញ សាយ ម៉េងឡាយ មានរថយន្តយីឌុបផ្ទាល់ខ្លួនចំនួន២គ្រឿង សម្រាប់បម្រើឲ្យការដឹកជញ្ជូនឈើចេញពីឃុំអូរស្វាយ យកទៅលក់នៅស្រុកយួនតាមច្រកដូង៧ដើម ឬច្រកច័ន្ទមូល ដែលនៅទីនោះមានសមត្ថកិច្ចនិងមន្ត្រីជំនាញជាច្រើនស្ថាប័នជួយ សម្របសម្រួលរត់ការប៉ាវផ្លូវធានាឲ្យការដឹកជញ្ជូនឈើខុសច្បាប់របស់ មេឈ្មួញ សាយ ម៉េងឡាយ ដំណើរការដោយរលូនល្អនិងមានសុវត្ថិភាព។អ្វីដែលគួរឲ្យចាប់អារម្មណ៍ នោះ គឺមេឈ្មួញ សាយ ម៉េងឡាយ មានខ្នងបង្អែកធំៗដែលជាមន្ត្រីជាន់ទឹកដីខេត្តកំពង់ចាមសឹងផ្អៀង ទៅហើយ ទើបគ្មាននរណាហ៊ានហើយគេសង្ស័យថា មន្ត្រីជំនាញគ្រប់ជាន់ថ្នាក់ ក្នុងខេត្តត្បូងឃ្មុំ និងខេត្តកំពង់ចាម សុទ្ធតែទទួលបានរបបប្រចាំខែ ពីសំណាក់មេឈ្មួញ សាយ ម៉េងឡាយ ទើបមិនហ៊ានប៉ះពាល់ការដឹកជញ្ជូនឈើខុសច្បាប់ទាំងនោះ៕
Recent Comments