ដោយសាប្រព័ន្ធច្បាប់ធូរលុងនៅកម្ពុជា បណ្តាលអោយមនុស្សមួយចំនួនតែងតែប្រព្រឹត្តិអំពើរពុករលួយ អ្នកខ្លះអាងខ្នង អាងអំណាច ប្រើឈ្មោះជាអ្នកធំយកទៅរកស៊ីខុសច្បាប់ ដូចជាកាប់ឈើ ដឹកឈើអត់ច្បាប់ ឈូសឆាយដីព្រៃ ជីកកកាយយករ៉ែ យកថ្ម គ្មានច្បាប់ទំលាប់ ឬបំពានលើសពីច្បាប់កំណត់ ដែលទង្វើទាំងនេះត្រូវបានមហាជនរិះគន់ថា វាជាទំលាប់របស់អ្នកធំនៅកម្ពុជា។
យោងតាមប្រភពព័ត៌មានតាមបណ្តាញសង្គមប៉ុន្មានថ្ងៃកន្លងទៅនេះ បានអោយដឹងថា កងកម្លាំងវិស្វកម្ម ដែលដឹកនាំដោយលោកឧត្តមសេនីយ៍ផ្កាយ៣ ប៉ុល-សុគន្ធ នៅតែបន្តគាស់កកាយយកថ្មពីភ្នំជីសូរ ដែលជារមណីយដ្ឋានប្រវត្ដិសាស្ដ្រ ដែលមានប្រាសាទបុរាណជាយូរលង់ ណាស់មកហើយ ដោយមិនខ្វល់ពីការបំផ្លាញប្រាសាទបុរាណ ជាសម្បត្តិបេតិកភណ្ឌជាតិនោះទេ។
គួរំលឹកឡើងវិញថា កាលពីឆ្នាំ២០១២ ក្រុមហ៊ុន ប៉ុល សុគន្ធ បានប្រើគ្រឿងចក្រ ជីកកកាយយកដីថ្ម ទៅធ្វើផ្លូវកៅស៊ូមួយខ្សែ មានចំងាយ ២៤គីឡូម៉ែត្រ ពីស្រុកព្រៃកប្បាស ដល់ប្រាសាទភ្នំដា ស្រុកអង្គរបុរី ។
ចំណែកខាងអាជ្ញាធរមូលដ្ឋាន បានចេញមុខមកហាមឃាតរ់ពេលប្រជាពលរដ្ឋប្រត្តិកម្មខ្លាំង កាលពីថ្ងៃទី១៩ ឧសភា ហើយបានបញ្ជាក់ថា ក្រុមហ៊ុន ប៉ុល សុគន្ធ នេះពុំមានច្បាប់ឬលិខិត បញ្ជាក់ពី ការធ្វើអាជីវកម្ម កាយភ្នំជីសូរនោះឡើយ ហើយមូលហេតុ ដែលក្រុមហ៊ុន ប៉ុល សុគន្ធ ជីកកកាយដីបាន ដោយសារអាជ្ញាធរស្រុក ជាប់រវល់ការងារច្រើន។
យ៉ាងណាក៏ដោយ ក្រោយពេលចុះទៅ ឃាត់គ្រឿងចក្រ ខាងក្រុមហ៊ុន បាននាំមន្ដ្រីពាក់ព័ន្ធ ទៅទទួលទានអាហារ ហើយគ្រឿងចក្រក៏បានបន្ដសកម្មភាព ជីកកាយដីនិងថ្ម ជាធម្មតាឡើងវិញ ដោយគ្រាន់តែបញ្ជាក់ថា មិនឈូសឆាយជីកកកាយ នៅតំបន់ដែលហាមឃាត់ទៀតទេ។
ពាក់ពន្ធករណីខាងលើនេះ ប្រជាពលរដ្ឋបានរិះគន់ធ្ងន់ៗទៅលើមន្រ្តីអាជ្ញាធរថា ប្រព្រឹត្តិអំពើពុករលួយ បំផ្លាញជាតិ ឃុបឃិតជាមួយអ្នករកស៊ីខុសច្បាប់។
ពលរដ្ឋក៏បានសំណូមពរទៅថ្នាក់ដឹកនាំខេត្ត និងក្រសួងរ៉ែ និងថាមពល មេត្តាចាត់វិធានការជាបន្ទាន់ ចំពោះក្រុមហ៊ុន ប៉ុល សុគន្ធ រួមទាំងមន្រ្តីចូលដៃទាំងនេះអោយទាន់ពេលវេលា ព្រោះបើមិនធ្វើដូច្នោះទេ ពលរដ្ឋបារម្ភណ៍ថា លោកផ្កាយ៣ ដែលជាម្ចាស់ក្រុមហ៊ុននេះមិនយូរមិនឆាប់នឹងអាចមកជីករំលើងយក ថ្មទៀតរហូតប្រាសាទបុរាណភ្នំជីសូរសម្បត្តិបេតិកភណ្ឌជាតិនេះរំលំ ឬរាបដល់ដីមិនខាន។
អ្នកយកព័ត៌មានយើងពុំទាន់អាចសុំការបំភ្លឺ ពីលោកផ្កាយ៣ ប៉ុល-សុគន្ធ បានទេពាក់ព័ន្ទនិងការចោទប្រកាន់ខាងលើនេះ ព្រោះពុំមានលេខទូរស័ព្ទសំរាប់ធ្វើការទំនាក់ទំនង៕
Recent Comments