ជីវិតអ្នកប្រកបរបរ រតតាក់ស៊ីដឹកភ្លៀវទេសចរណ៍មិនមែនជាអ្នកមានផ្ទះធំ ទ្រនុំខ្ពស់អីនោះទេ ជីវភាពបានព្រឹកខ្វះល្ងាច រកមួយរដូវ ដេកស៊ីមួយរដូវ មិនតែប៉ុណ្ណោះថែមទាំងមានការចំណាយផ្សេងៗដូចជាថ្លៃចតឡាន ចតរឺម៉ក រងចាំភ្ញៀវចេញពីប្រាសាទ ដែលជាបន្ទុកបន្ថែមទៅលើជីភាពក្រីក្ររបស់ពួកគេ។
បើតាមសេចក្តីរាយការណ៍ពីបងប្អូនអ្នកដឹកភ្លៀវទេសចរណ៍ ដោយរថយន្ត និងរឺម៉កកង់បី ប្រចាំខេត្តសៀមរាប បានអោយដឹងថា មានចំណតរថយន្ត២កន្លែងដែលយកលុយជារៀងរាល់ថ្ងៃនោះគឺ ចំណតមុខប្រាសាទបន្ទាយស្រី ក្នុងស្រុកបន្ទាយស្រី និងចំណតភ្នំក្បាលស្ពាន ក្នុងស្រុកបន្ទាយដូចគ្នា។ ពួកគាត់និយាយទាំងទឹកមុខក្រៀមក្រំថា ពួកគាត់មិនពេញចិត្តបង់លុយថ្លៃចតឡាននៅប្រាសាទទាំង២ខាងលើ នេះទេ។ ពួកគាត់បន្តថា ចំណតទាំង២កន្លែងខាងលើនេះអង្គុយចាំយកតែលុយជារៀងរាល់ថ្ងៃ តែកន្លែងចតឡានមិនមានដំបូលនោះទេ គឺចតឡានកណ្តាលថ្ងៃក្តៅហួតហែង ស្ទើឆេះឡានអស់ទៅហើយ។
ក្រុមអ្នកដឹកភ្លៀវទេសចរណ៍ខាងលើបានត្អូញត្អែថា ពួកគាត់មានជីវភាពលំបាកទើបនាំគ្នាមករតតាក់ស៊ី រតរឺម៉ក ដើម្បីរកប្រាក់ចិញ្ចឹមគ្រួសារ ហើយរដូវភ្លៀវច្រើនមានតែប្រហែល៤ខែប៉ុណ្ណោះគឺគិតចាប់ពីខែ វិច្ឆិកា ដល់ ខែគុម្ភៈ ឯរដូវអត់ភ្លៀវគឺដេកស៊ី ជួនកាលអត់អីស៊ីខ្ចីលុយអង្គការចាយសិនរងចាំរដូវភ្ញៀវច្រើន ឆ្នាំក្រោយមកដល់ចាំរកលុយសងគេវិញ តែថ្នាក់ដឹកនាំខេត្តមើលមិនឃើញពីទុក្ខលំបាកនេះទេ មិនត្រឹមតែមិនបានជួយ ថែមទាំងជាន់កអ្នកក្រ អោយកាន់តែក្រថែមទៀត។
ក្រុមអ្នកដឹកភ្លៀវទេសចរណ៍ខាងលើ សំនូមពរទៅលោក ឃឹម-ប៊ុនសុង អភិបាលខេត្តសៀមរាបថ្មី មេត្តាបញ្ឈប់ការយកលុយថ្លៃចំណតពីអ្នកអ្នកដឹកភ្ញៀវទេសចរណ៍នៅ ខេត្តសៀមរាបទៀតទៅ ព្រោះលុយទាំងនោះវាមិនអាចយកទៅអភិវឌ្ឈន៍ប្រទេសជាតិបានទេ តែបើមិនយកពីអ្នកដឹកភ្ញៀវទាំងអស់នេះ នោះវាអាចកាត់បន្ថយភាពក្រីក្ររបស់ពួកគាត់បានខ្លះដែរ ព្រោះលុយនេះសំរាប់អ្នកមានគឺវាតិចណាស់ តែសម្រាប់អ្នកក្រគឺច្រើនគួរសមដែរ។
អ្នកយកព័ត៌យើងមានបានធ្វើការសាកសួរទៅអ្នកអង្គុយចាំទាលុយ ថ្លៃចតឡាន រឺម៉កកង់បី នៅចំណតទាំង២ខាងលើ តែពួកគេហាក់ព្យាយាមលាក់បាំងមិនបញ្ចេញឈ្មោះអ្នកនៅពីក្រោយខ្នង ទេ ពួកគេឆ្លើយថា មិនស្គាល់ថៅកែ ឬមេដែលអោយយកថ្លៃចំណតនោះទេ គ្រាន់តែប្រមូលលុយបានមានអ្នកមកយកជារៀងរាល់ថ្ងៃពីពួកគេ។
ប្រភពព័ត៌មានពីមន្រ្តីរាជការម្នាក់នៅភ្នំប្រាសាទក្បាលស្ពាន សុំមិនបញ្ចេញឈ្មោះបានលួចខ្សឹបប្រាប់អ្នកយកព័ត៌មានយើងថា លុយថ្លៃចំណតទាំងនេះគឺយកទៅថ្វាយជូនលោកចៅហ្វាយស្រុកប្រាសាទ បន្ទាយស្រី ខេត្តសៀមរាប។ លោកបន្តថា រឿងលុយទាំងអស់នេះយកជូនសាលាខេត្ត ឬចូលជាថវិការរដ្ឋ ឬចូលហោប៉ៅបុគ្គល នោះលោកពុំបានដឹងច្បាស់ទេ។
បញ្ជាក់៖ តំលៃចតឡាន និងរឺម៉កគឺ ម៉ូតូ៥រយរៀល រឺម៉កកង់បី១ពាន់រៀល ឡានតូច២ពាន់រៀល ឡានធំ៤ពាន់រៀល។ ជំរកគ្មាន អាចមានដើមឈើ១ដើម ឬ២ដើម ដណ្តើមប្រជ្រៀតគ្នាចត។ គុណវិបត្តិគឺ ក្តៅឡាន ប្រេះថ្នាំ ចំណាយពេលយូក្នុងការបញ្ឆេះអោយត្រជាក់ ខាតលុយ ខាតពេលវេលា បន្ថែមភាពក្រីក្រដល់អ្នករតតាក់ស៊ី។
យើងពុំអាចសុំការបំភ្លឺពីលោក ឃឹម-ប៊ុនសុង អភិបាលខេត្តសៀមរាបបានទេនៅថ្ងៃនេះ ព្រោះទូរស័ព្ទមិនចូល៕ ដោយ៖ ផ្លុង-រ៉េត
Recent Comments