មួយរយៈចុងក្រោយនេះលោក ឯក វិរដេដ្ឋបានប្រើមនុស្សជំនិតរបស់ខ្លួនឲ្យដើរស្រាវជ្រាវវែកមុខ មន្ត្រីរូបណាដែលហ៊ានបើកកកាយរឿងអាស្រូវរបស់ខ្លួនជាសាធារណៈ។ មន្ត្រីជំនិតរបស់លោក ឯក វិរដេដ្ឋមានឈ្មោះ ឈឹម សំណាង និងឈ្មោះ ទូច ស្រេង ដែលបុគ្គលទាំងពីរនាក់នេះកំពុងធ្វើព្យុះធ្វើភ្លៀងតាមអំពើចិត្ត តាមរយៈការចុះត្រួតពិនិត្យលើការិយាល័យផ្សេងៗនៅក្នុងក្រសួង ហិរញ្ញវត្ថុទាំងមូល។សូម្បីតែនៅតាមបណ្ដាខេត្តនានា ក៏បុគ្គល ឈឹម សំណាង និង ទូច ស្រេងចុះត្រួតពិនិត្យជាញឹកញាប់ដែរដើម្បីស្វែងរកផលប្រយោជន៍ ផ្ទាល់ខ្លួន ។អំពើពុករលួយក្នុងក្រសួងសេដ្ឋកិច្ច និងហិរញ្ញវត្ថុដែលមានលោក អូនព័ន្ធមុនីរ័ត្ន ជារដ្ឋមន្ត្រីកំពុងកើតឡើងយ៉ាងពេញបន្ទុកហើយអំពើពុករលួយបក្ខពួកនិយម ក៏កំពុងតែបង្កឲ្យមានភាពអនាធិបតេយ្យយ៉ាងខ្លាំងក្លាផងដែរ។ជាក់ស្ដែង មន្ត្រីរាជការបម្រើការងារនៅក្នុងអគ្គាធិការដ្ឋាននៃក្រសួង សេដ្ឋកិច្ច និងហិរញ្ញវត្ថុបានលាតត្រដាងពីអំពើពុករលួយរបស់បុគ្គល ឯកវិរដេដ្ឋដែលជាអគ្គាធិការនៃស្ថាប័ននេះជាសាធារណៈ។តាមការទម្លាយ ពីមន្ត្រីរាជការនៃអគ្គាធិការដ្ឋានក្រសួងសេដ្ឋកិច្ចនិងហិរញ្ញវត្ថុបាន ឲ្យដឹងថា អំពើពុករលួយរបស់បុគ្គល ឯក វិរដេដ្ឋមានដូចជាការតែងតាំងមន្ត្រីរាជការក្រោមឱវាទរបស់ខ្លួនដោយ ប្រកាន់បក្ខពួក និងមានការប្រមាថមើលងាយស្ត្រីភេទថែមទៀត។
តាមប្រភពពីមន្ត្រីរាជការក្នុងអគ្គាធិការដ្ឋានក្រសួងសេដ្ឋកិច្ចបាន ឲ្យដឹងទៀតថា លោក ឯក វិរដេដ្ឋកំពុងតែគំរាមគេឯងហើយបាននិយាយថានឹងចាប់ដាក់គុកប្រសិនបើនរណា ហ៊ានប្ដឹងគាត់ពីរឿងនេះ។ លើសនេះទៅទៀតបុគ្គល ឯកវិរដេដ្ឋព្រមានផ្ទេរអ្នកដែលហ៊ានប្ដឹងគាត់ទៅកន្លែងដែលអត់មាន ប្រាក់ចំណូលបើនៅតែហ៊ានលាតត្រដាងអំពើអាក្រក់របស់គាត់ និងបក្ខពួកឈ្មោះ ឈឹមសំណាង និង ឈ្មោះ ទូច ស្រេងបន្តទៅទៀត។មន្ត្រីរាជការមួយចំនួនបានឲ្យដឹងថាពួកគាត់មិនខ្លាច ការព្រមានរបស់លោក ឯក វិរដេដ្ឋ នោះទេព្រោះពួកគាត់ទ្រាំទទួលរងនូវភាពអយុត្តិធម៌លែងបានហើយដូច្នេះ ពួកគាត់ត្រូវតែលាតត្រដាងការពិត ដើម្បីឲ្យលោករដ្ឋមន្ត្រី អូនព័ន្ធមុនីរ័ត្ន បានដឹង។
មន្ត្រីរាជការក្នុងអគ្គាធិការដ្ឋានក្រសួងហិរញ្ញវត្ថុក៏បានអំពាវនាវ ឲ្យលោក ឱម យ៊នទៀងប្រធានអង្គភាពប្រឆាំងអំពើពុករលួយចាត់វិធានការលើបុគ្គលឯក វិរដេដ្ឋនិងបក្ខពួកជាបន្ទាន់បំផុតព្រោះអំពើពុករលួយក្នុង អគ្គាធិការដ្ឋាននៃក្រសួងហិរញ្ញវត្ថុកំពុងកើតឡើងយ៉ាងពេញបន្ទុក និងមានសភាពកាន់តែធ្ងន់ធ្ងរថែមទៀត។ជាមួយគ្នានេះអង្គភាពប្រឆាំង អំពើពុករលួយមិនត្រូវចាត់ការតែលើមន្ត្រីតូចតាចនោះទេ គឺត្រូវចាត់ការលើមន្ត្រីពុករលួយធំៗ ដូចជាបុគ្គល ឯកវិរដេដ្ឋ និងបក្ខពួកដោយមិនត្រូវយោគយល់ជាដាច់ខាត។បើមិនដូច្នេះទេ អំពើពុករលួយក្នុងក្រសួងហិរញ្ញវត្ថុនឹងរាលដាលកាន់តែខ្លាំងឡើងៗ ជាក់ស្ដែងមួយរយៈពេលចុងក្រោយនេះ បុគ្គលឯកវិរដេដ្ឋ និងបក្ខពួកមិនត្រឹមតែបន្តប្រព្រឹត្តអំពើអាក្រក់ប៉ុណ្ណោះ ទេគឺថែមទាំងព្រមានលើមន្ត្រីណាដែលហា៊នលាតត្រដាងមុខមាត់ពិត របស់ខ្លួនទៀតផង៕
Recent Comments