ក្រុមអ្នករកស៊ីដឹកជញ្ជូនទំនិញទាំងតូចទាំងធំបានឲដឺង ថា ទីតាំងជញ្ជីងថ្លឹងរថយន្តចំនួន២កន្លែងនៅក្នុងខេត្តកំពត ទី១មានទីតាំងនៅឃុំតានី ស្រុកអង្គរជ័យ និងទី២ ស្ថិតនៅឃុំកោះតូច ស្រុកទឹកឈូ ដោយក្រុមជញ្ជីងថ្លឹងរថយន្តទាំង២កន្លែងនេះ ស្ថិតក្រោមការគ្រប់គ្រងដោយផ្ទាល់ពីលោក ពេជ្រ រដ្ឋា ជាអនុប្រធានមន្ទីរសាធារណការនិងដឹកជញ្ជូនខេត្តកំពត។ ជាទូទៅក្រុមជញ្ជីងថ្លឹងរថយន្តទាំង២កន្លែងនេះមិនសូវឃើញចាប់ឃាត់ រថយន្តដឹកជញ្ជូនលើសទម្ងន់ឲ្យចូលថ្លឹងនោះទេគឺគេឃើញតែតៃកុងរថយន្ត នៅពេលបើកបរឆ្លងកាត់ទីតាំងជញ្ជីងនោះត្រូវឈប់បន្តកន្ទុយគ្នាខ្លះ ចូលទៅកត់ឈ្មោះរថយន្ត ឆ្លងកាត់ដើម្បីទុកទូទាត់លុយប្រចាំខែ សម្រាប់អ្នកដឹកជញ្ជូនទំនិញឆ្លងកាត់រៀងរាល់ថ្ងៃជាប្រចាំ ប៉ុន្តែសម្រាប់អ្នករកស៊ីដឹកជញ្ជូនទំនិញដែលយូរៗត្រូវបើកឆ្លងកាត់ ម្តងត្រូវតែចូលបង់លុយភ្លាមៗឲ្យទៅកូនចៅរបស់លោក ពេជ្រ រដ្ឋា ខានមិនបាន។
ទីតាំងជញ្ជីងថ្លឹងរថយន្តចំនួន២កន្លែងរបស់មន្ទីរ សាធារណការនិងដឹកជញ្ជូនខេត្តកំពត ដែលបង្កើតឡើងច្រើនឆ្នាំមកហើយ នោះ មិនមែនថ្លឹងរថយន្តដឹកទំនិញលើសទម្ងន់នោះទេ ព្រោះក្រុមមន្ត្រីដែលប្រចាំការនៅទីតាំងថ្លឹងរថយន្តនោះ មានក្រុមមន្ត្រីជំនាញរាប់ក្បាលឡានដឹកលើសទម្ងន់យកលុយយ៉ាង អនាធិបតេយ្យបំផុត រហូតដល់ក្រុមអ្នករកស៊ីដឹកជញ្ជូនទំនិញបានរិះគន់ថា ទីតាំងជញ្ជីងថ្លឹងរថយន្តទាំង២កន្លែងរបស់មន្ទីរសាធារណការខេត្តកំពត បានក្លាយជាជញ្ជីងថ្លឹងលុយ និងថ្លឹងតៃកុងរថយន្ត ឲ្យចូលកត់ឈ្មោះនិងចំនួនជើងដែលត្រូវបើកបរឆ្លងកាត់ជញ្ជីងថ្លឹង រថយន្តទុកយកទូទាត់បង់លុយប្រចាំខែទៅតាមចំនួនជើងដែលដឹកជញ្ជូនតិចឬ ច្រើនមិនខ្វល់ខ្វាយពីការខូចខាតផ្លូវស្ពាន ។
ក្រុមជញ្ជីងថ្លឹងរថយន្តរបស់លោក ពេជ្រ រដ្ឋា អាចក្លាយទៅជាទីតាំងថ្លឹងលុយ និងថ្លឹងតៃកុងឡានប្រមូលលុយយកទៅច្រកហោប៉ៅបានរាប់លានរៀលក្នុង មួយខែៗមិនដែលមាននរណាហ៊ាន មាត់ គេសង្ស័យថាលោក ខូយ ឃុនហួរ ជាអភិបាលខេត្តកំពត ក៏ដូចជាលោក លឹម សំបូរ ជាប្រធានមន្ទីរសាធារណការខេត្តកំពត បានឃុបឃិតគ្នា ទុកឲ្យលោក ពេជ្រ រដ្ឋា ធ្វើអ្វីៗតាមតែអំពើចិត្ត។ ទាំងលោក ខូយ ឃុនហួរ និងលោក លឹម សំបូរ ត្រូវគេសង្ស័យថាបានទទួលផលប្រយោជន៍ជាប់ជាប្រចាំពីការបិទភ្នែកបិទ ត្រចៀកឲ្យក្រុមជញ្ជីងថ្លឹងរថយន្តរបស់លោក ពេជ្រ រដ្ឋា ធ្វើអ្វីៗតាមតែអំពើចិត្តគ្មានក្រែងញញើតពីច្បាប់ទម្លាប់ បើទោះបីជាទីតាំងជញ្ជីងថ្លឹងរថយន្តនេះបង្កភាពក្តៅក្រហាយដល់ អ្នករកស៊ីដឹកជញ្ជូនទំនិញនិងប៉ះពាល់អារម្មណ៍ប្រជាពលរដ្ឋបែបណាក៏ដោយ ក៏លោក ខូយ ឃុនហួរ មិនឈឺក្បាលដែរ ។
កូនចៅរបស់លោក ពេជ្រ រដ្ឋា បានអួតអាងទៀតថា ប្រាក់ចំណូលដែលបានមកពីការរាប់ក្បាលឡានយកលុយតាមរបៀបពុករលួយ មិនមែនពួកគេយកទៅច្រកហោប៉ៅផ្ទាល់ខ្លួននោះទេ គឺមានបែងចែកថ្នាក់ខេត្ត ថ្នាក់មន្ទីរនិងថ្នាក់ក្រសួង ដូច្នេះបើចង់ពិនិត្យស្រាវជ្រាវពីករណីអំពើពុករលួយ មិនអាចធ្វើបាននោះទេព្រោះអ្វីៗបានកើតឡើងជាលក្ខណៈប្រព័ន្ធ។ លោក ហ៊ុន សែន ធ្លាប់បានអួតអាងអំពីយុទ្ធសាស្ត្រលុបបំបាត់អំពើពុករលួយ លុបបំបាត់កុងត្រូលជជុះ ប៉ុន្តែរឿងពិតដែលលោក ពេជ្រ រដ្ឋាកំពុងដាក់ប៉ុស្តិ៍ជជុះជ្រកក្រោមស្លាកជញ្ជីងថ្លឹងរថយន្ត ផ្ទុកលើសទម្ងន់កំពុងធ្វើសកម្មភាពយ៉ាងអនាធិបតេយ្យផ្គើនទៅនឹងការព្រមានរបស់លោក ហ៊ុន សែន ៕
Recent Comments