រាជធានីភ្នំពេញ ៖រឿងដែលលោកវរសេនីយ៍ទោ សុខ រ័ត្ន ប្រព្រឹត្ដអំពើពុករលួយ យកភារកិច្ចតួនាទី ទៅពាក់ព័ន្ធនឹងបទល្មើសព្រៃឈើ គឺជាការរំលោភបំពាន ទៅនឹងលិខិតបេសកកម្ម របស់អគ្គស្នងការនគរបាលជាតិ ដែលបានចាត់តាំង លោកវរសេនីយ៍ទោ សុខ រ័ត្ន ឲ្យចុះឱ្យស្រាវជ្រាវ ស៊ើបអង្កេតបទល្មើស ។ ជាញឹកញាប់ លោកវរសេនីយ៍ទោ សុខ រ័ត្ន បានអួត ថា គាត់ធ្វើអ្វីៗតាមបញ្ជាថ្នាក់លើ យកលុយទៅបំពេញ តម្រូវការថ្នាក់លើ សុទ្ធតែជារឿងប៉ះពាល់កិត្ដិយស របស់ថ្នាក់លើ ដែលកំពុងមានវិធានការតឹងតែង ក្នុងការបង្ក្រាបបទល្មើសព្រៃឈើ។
លោកវរសេនីយ៍ទោ សុខ រ័ត្ន នាយរងការិយាល័យ និងជាប្រធានប្រតិបត្តិ ប្រចាំខេត្តរតនគិរី នៃនាយកដ្ឋាននគរបាល ប្រឆាំងបទល្មើសសេដ្ឋកិច្ច ក្រសួងមហាផ្ទៃ ដែលមានជំនាញ ប្រមាញ់ក្រុមឈ្មួញ រកស៊ីដឹកជញ្ជូនឈើ ឲ្យបង់លុយប្រចាំខែ និងប្រចាំជើង គ្រប់ច្រក ត្រូវបានកម្លាំងនគរបាលសេដ្ឋកិច្ច ក្រសួងមួយក្រុមទៀត ដឹកនាំដោយលោកផ្កាយ៣ ជា សុមេធី វាយបំបែកឆ្នាំងបាយ តាមរយៈការបង្ក្រាប សកម្មភាពដឹកជញ្ជូនឈើខុសច្បាប់ របស់ឈ្មួញទាំងតូចទាំងធំ ដែលធ្លាប់បង់លុយ ជូនលោក សុខ រ័ត្ន។
ឈ្មួញមួយចំនួនបានលើកឡើងថា លោកវរសេនីយ៍ទោ សុខ រ័ត្ន តែងតែបង្ហាញមោទនភាព ក្នុងការប្រើប្រាស់លិខិតបេសកកម្ម របស់អគ្គស្នងការ នគរបាលជាតិ និងយកឈ្មោះ លោកឧត្ដមសេនីយ៍ឯក ជា សុមេធី អគ្គស្នងការរង នគរបាលជាតិ និងជាប្រធាននាយកដ្ឋាននគរបាល ប្រឆាំងបទល្មើស ក្រសួងមហាផ្ទៃ ធ្វើជាលេសដើម្បីកោសរូស បង្ខំឱ្យក្រុមឈ្មួញរកស៊ី ដឹកជញ្ជូនឈើខុសច្បាប់ និងតាមសិប្បកម្មកែច្នៃឈើ ឱ្យបង់លុយតាមតែទំនើងចិត្ត។ ដូចជាគ្រាន់តែថ្លៃក្បាលឡាន លោកវរសេនីយ៍ទោ សុខ រ័ត្ន តម្រូវឱ្យឈ្មួញបង់លុយ ចាប់ពី ៥០ទៅ ២០០ដុល្លារ និងតាមសិប្បកម្ម ត្រូវបង់លុយ ចាប់ពី ២០០ដុល្លារ ឡើងទៅ។
Recent Comments