ការកាប់បំផ្លាញព្រៃឈើនៅតាមតំបន់ព្រៃការពារព្រៃសហគមន៍ជាពិសេសនៅ ដែនជម្រកសត្វព្រៃលំផាត់ និងព្រៃសហគមន៍របស់ជនជាតិភាគតិចនៅស្រុកវ៉ឺនសៃ ត្រូវបានកាប់បំផ្លាញយ៉ាងវិនាសហិនហោច ដោយសារតែការបំផុសពីឈ្មួញកណ្តាលមួយចំនួន។ ក្រុមហ៊ុនរបស់ឧកញ៉ា ទ្រី ភាព ដែលជាប្រធានរដ្ឋបាលនិងជាអ្នកចាត់ចែងកាន់ការងារលុយកាក់ បានបង្កើតទីតាំងស្តុកឈើដ៏ធំមួយកន្លែងនៅក្បែរច្រកព្រំដែនអន្តរជាតិ អូរយ៉ាដាវ ក្នុងភូមិប៉ក់ធំ ឃុំប៉ក់ញ៉ៃ ដើម្បីងាយស្រួលដឹកជញ្ជូនទៅលក់នៅស្រុកយួនហើយទីតាំងស្តុកឈើដ៏ធំ មួយនេះ ចាំប្រមូលទិញពីឈ្មួញកណ្តាល ឬឈ្មួញតូចតាចទាំងយប់ទាំងថ្ងៃមានប៉ុន្មានទិញទាំងអស់ដោយលោក សាល ចាំទូទាត់លុយកាក់។
ជាគោលការណ៍ក្រុមហ៊ុន ទ្រី ភាព ទទួលបានសិទ្ធិផ្តាច់មុខក្នុងការប្រមូលទិញឈើដែលបានមកពីការបង្ក្រាប របស់សមត្ថកិច្ចនិងមន្ត្រីជំនាញ ប៉ុន្តែភាពជាក់ស្តែងលោក សាល បានចាត់តាំងបណ្តាញឲ្យចាំប្រមូលទិញឈើប្រណីតពីប្រជាពលរដ្ឋនិង ឈ្មួញតូចតាចនៅតាមបណ្តាស្រុក ដើម្បីដឹកជញ្ជូនយកមកស្តុកទុកនៅឃ្លាំងដ៏ធំនៅក្បែរច្រកព្រំដែន អន្តរជាតិអូរយ៉ាដាវ។ ការប្រមូលទិញឈើប្រណីតដែលគ្មានប្រភាពច្បាស់លាស់ ភាគច្រើនជាឈើដែលបានមកពីការកាប់បំផ្លាញនៅតាមព្រៃសហគមន៍ ដែនជម្រកសត្វព្រៃលំផាត់ នៅទូទាំងខេត្តរតនគិរី ហាក់ដូចជាការលើកទឹកចិត្តឲ្យឈ្មួញតូចតាចនិងប្រជាពលរដ្ឋកាប់បំផ្លាញ ព្រៃឈើយ៉ាងវិនាសហិនហោច ដូចដែលប្រជាពលរដ្ឋមួយចំនួនបានលើកឡើងថាក្រុមហ៊ុនឧកញ៉ា ទ្រី ភាព បានពាក់ព័ន្ធយ៉ាងជ្រៅជាមួយឧក្រិដ្ឋកម្មបំផ្លាញព្រៃឈើនៅក្នុង ខេត្តរតនគិរី ដែលទាមទារឲ្យរដ្ឋមន្ត្រីក្រសួងកសិកម្មត្រួតពិនិត្យទប់ស្កាត់បញ្ហា នេះឡើងវិញជាបន្ទាន់ ដែលយ៉ាងហោចណាស់បង្ហាញពីការយកចិត្តទុកដាក់អនុវត្តន៍កំណែទម្រង់ ស៊ីជម្រៅរបស់លោក ហ៊ុន សែន ឲ្យមានប្រសិទ្ធភាព ។
បច្ចុប្បន្ននេះ មេការរបស់ក្រុមហ៊ុន ទ្រី ភាព ដ៏មានឥទ្ធិពលប្រចាំខេត្តរតនគិរីឈ្មោះ សាល កំពុង ស្ពាយលុយយកទៅបើកប្រាក់ខែ ជូនសមត្ថកិច្ចនិងមន្ត្រីជំនាញដែលជួយសម្របសម្រួលសម្រាប់ ការដឹកជញ្ជូនឈើខុសច្បាប់របស់ក្រុមហ៊ុន ទ្រី ភាព និងដើម្បីការពារមុខជំនួញប្រមូលទិញឈើឲ្យចៀសផុតពីឧបសគ្គផ្សេងៗ។ គេឆ្ងល់ថា មួយរយៈចុងក្រោយនេះកម្លាំងនគរបាលសេដ្ឋកិច្ចក្រសួងមហាផ្ទៃ បានចុះទៅបង្ក្រាបការដឹកជញ្ជូនឈើខុសច្បាប់ នៅលើទឹកដីខេត្តរតនគិរី ប៉ុន្តែសម្រាប់ការដឹកជញ្ជូនឈើខុសច្បាប់របស់ក្រុមហ៊ុន ទ្រី ភាព បែរជាមិនហ៊ានប៉ះពាល់ទៅវិញ មិនដឹងជាមានអាថ៌កំបាំងអ្វី ដែលទាមទារឲ្យថ្នាក់លើពិនិត្យមើលបញ្ហានេះឡើងវិញ ។
រឿងដែលគួរឲ្យភ្ញាក់ផ្អើលបំផុតនោះ កម្លាំងនគរបាលក្រសួងមហាផ្ទៃ បានចាប់ឃាត់រថយន្តដឹកឈើប្រណីតខ្នាតធំចំនួន២គ្រឿងនៅស្រុកវ៉ឺន សៃ ដែលគេដឹងថា ឈើទាំងនោះជារបស់ក្រុមហ៊ុន ទ្រី ភាព ត្រូវបានដឹកជញ្ជូនមិនប្រក្រតី ហើយការបង្ក្រាបឈើប្រណីតដ៏រាលដាលនៅទូទាំងខេត្តរតនគិរី កម្លាំងនគរបាលសេដ្ឋកិច្ចក្រសួងមហាផ្ទៃ បានអនុវត្តន៍ទៅតាមស្មារតីនៃអង្គប្រជុំជាមួយរដ្ឋមន្ត្រី ក្រសួងមហាផ្ទៃ។ ប៉ុន្តែទីបំផុតកងកម្លាំងដែលចុះទៅបង្ក្រាបចាប់ឃាត់រថយន្តដឹកឈើ ប្រណីតចំនួន២គ្រឿងរបស់ក្រុមហ៊ុន ទ្រី ភាព បានក្លាយជាអ្នករងគ្រោះត្រូវថ្នាក់លើស្តីបន្ទោស ហើយខាងអាជ្ញាធរខេត្តរតនគិរី ដែលគេសង្ស័យថាទទួលបានផលប្រយោជន៍ពីក្រុមហ៊ុន ទ្រី ភាព យូរឆ្នាំមកហើយបាន ប្រតិកម្មបន្ទោសទៅលើកម្លាំងនគរបាលសេដ្ឋកិច្ចក្រសួងមហាផ្ទៃពី ការរំលោភអំណាចឬការអនុវត្តមិនត្រឹមត្រូវតាមគោលការណ៍របស់ ក្រសួងមហាផ្ទៃ។
លោក សាល ជាប្រធានរដ្ឋបាលនិងជាអ្នកកាន់លុយឲ្យក្រុមហ៊ុន ទ្រី ភាព សម្រាប់ការទូទាត់ទិញឈើប្រណីតឬបើករបបឲ្យសមត្ថកិច្ចនិងមន្ត្រី ពាក់ព័ន្ធមានភាពមិនស្មោះត្រង់បានយកឥទ្ធិពលរបស់ក្រុមហ៊ុន ទ្រី ភាព ទៅប្រើប្រាស់សម្រាប់ផលប្រយោជន៍ផ្ទាល់ខ្លួន ។
Recent Comments