រាជធានីភ្នំពេញ ៖តាមប្រភព បានបង្ហើឲ្យដឹងថា លោក ប៉ែន ស៊ីម៉ន ដែលជាអគ្គនាយកគយនិងរដ្ឋាករ ត្រូវដល់អាយុចូលនិវត្តន៍ នៅថ្ងៃទី១៥ ខែកញ្ញា ឆ្នាំ២០១៤ ប៉ុន្តែលោក ប៉ែន ស៊ីម៉ន បានរត់ការពន្យារអាយុ កាន់តំណែងជាមេគយ រហូតពេញមួយអាណត្តិតែម្តង ដូច្នេះគ្មានមន្ត្រីណាម្នាក់អាចជ្រែ យកតំណែងលោក ប៉ែន ស៊ីម៉ន បានទេ។
លោក ប៉ែន ស៊ីម៉ន ប្រតិភូរាជរដ្ឋាភិបាល ទទួលបន្ទុកជា អគ្គនាយកគយនិងរដ្ឋាករ ជិតដល់ពេលនឹងត្រូវចូលនិវត្តន៍ នៅប៉ុន្មានខែខាងមុខនេះ ហើយបើគ្មានអ្វីប្រែប្រួលទេនោះ លោក ប៉ែន ស៊ីម៉ន នឹងត្រូវចូលនិវត្តន៍ នៅខែកញ្ញា ឬថ្ងៃទី០១ ខែតុលា ឆ្នាំ២០១៤ ខាងមុខនេះ ពោលគឺតំណែងនេះ កំពុងតែមានអ្នករត់ការ ជាច្រើនផងដែរ ប៉ុន្តែមិនដឹងថា មន្ត្រីថ្នាក់ណាខ្លះទេ ដែលមានឆ្អឹងអណ្តែត ព្រោះគេដឹងថា តំណែងគ្រប់គ្រងមន្ត្រីគយ ដែលមានតួនាទីប្រមូលពន្ធ ជូនរដ្ឋដ៏សំខាន់មួយនេះ អាចនឹងធ្លាក់ទៅលើ មន្ត្រីឬសាច់ញាតិជំនិតបំផុត របស់លោក ប៉ែន ស៊ីម៉ន ក្នុងករណីដែលគាត់ សុំពន្យារអាយុចូលនិវត្តន៍ មិនបានជោគជ័យ។
មន្ត្រីគយ មួយចំនួន បានលើកឡើងថា មន្ត្រីគយស័ក្តិក្រហម ចំនួន ២ឈុត ដែលជិតដល់អាយុចូលនិវត្តន៍ បាននាំគ្នារត់ការស្នើសុំ ពន្យារអាយុចូលនិវត្តន៍ គឺឈុតទី១ មាន ១១នាក់និងឈុតទី២ មាន ២០នាក់ សរុបទាំងអស់ មានចំនួន ៣១នាក់ ហើយមានភ្នាក់ងារគយសាមញ្ញ មួយចំនួនទៀតដែលភាគច្រើន កំពុងបម្រើការងារ នៅច្រកប៉ោយប៉ែត និងខេត្តព្រះសីហនុ ដល់អាយុចូលនិវត្តន៍ទៅហើយ ប៉ុន្តែត្រូវបានថ្នាក់លើ ឬប្រធានអង្គភាព ឲ្យបន្តការងារដោយតែងតាំង ជាទីប្រឹក្សា ឬជំនួយការជាដើម ព្រោះតែភ្នាក់ងារគយចាស់ៗទាំងនោះមានជំនាញច្បាស់លាស់ ខាងប្រព្រឹត្តអំពើពុករលួយប្រមូលលុយក្រោមតុ យកទៅចែកគ្នា ធ្វើមានធ្វើបានផ្ទាល់ខ្លួន។
ការរត់ការពន្យារអាយុចូលនិវត្តន៍ ត្រូវបានធ្វើឡើងពី អគ្គនាយកដ្ឋានគយនិងរដ្ឋាករ សុំហត្ថលេខាពីរដ្ឋមន្ត្រីក្រសួងហិរញ្ញវត្ថុ រហូតមានការចេញ ព្រះរាជក្រឹត្យផងដែរ ហើយជាគោលការណ៍ គេអនុញ្ញាតឲ្យមន្ត្រី ដែលមានជំនាញ ពុករលួយឬមន្ត្រីដែលមានមុខ ចុះពង្រឹងមូលដ្ឋានជួយបក្សអាចទទួលបានសិទ្ធិ ពន្យារអាយុចូលនិវត្តន៍ ក្នុងគោលបំណងសំខាន់ៗចំនួន២ គឺទី១ មន្ត្រីគយចាស់ៗទាំងនោះ មានស្មារតីចាយលុយដែលបានមកពី អំពើពុករលួយ ដើម្បីពង្រឹងបក្ស ជួយជ្រោមជ្រែងដល់ការបោះឆ្នោត នាពេលខាងមុខនេះ និងទី២ ថ្នាក់ដឹកនាំគយមិនទុកចិត្ត ចំពោះមន្ត្រីគយជំនាន់ថ្មី ដែលមានគំនិតចង់ផ្លាស់ប្តូរ របៀបរបបអសកម្ម ហើយគយជំនាន់ថ្មី មិនសូវគិតគូររឿងពង្រឹងបក្ស ។
Recent Comments